﻿यशैया.
2.
आमोजया काय् यशैयायात यहूदा व यरूशलेमया बारे परमेश्‍वरं ब्‍यूगु दर्शन थ्‍व हे खः– 
लिपांगु दिनय् परमप्रभुया देगः पलिस्‍था यानातःगु पर्वत मेगु फुक्‍क पर्वत स्‍वयाः मू वंगु जुयाः थापं जुइ। व हिमालत स्‍वयाः तसकं तःजाः जुइ, अले फुक्‍क जातित अन मूंवइ। 
अले यक्‍व मनूत वयाः थथे धाइ, “वा, झीपिं परमप्रभुया पर्वत, याकूबया परमेश्‍वरयागु देगलय् वनेनु। अनंलि वय्‌कलं हे झीपिं वय्‌कःयागु लँपुइ वने फयेमा धकाः झीत थःगु लँपु स्‍यनादी।” अले व्‍यवस्‍था सियोनं व परमप्रभुया वचन यरूशलेमं पिहां वइ। 
वय्‌कलं जाति जातितय्‌गु दथुइ न्‍याय यानादी। अले यक्‍व मनूतय्‌गु ल्‍वापुख्‍यापु मिलय् यानादी। इमिसं थःगु तरवारयात मुगलं दायाः हलोया फालि व भालायात ईंचा दय्‌की। जाति जातितय् दथुइ ल्‍वापुख्‍यापु जुइ मखु, अले लडाइँया निंतिं सुनानं स्‍यनेकने याइ मखु। 
अय् याकूबया सन्‍तानत, वा, झीपिं परमप्रभुया जःलय् न्‍यासि वनेनु। 
हे परमप्रभु, छिं थः प्रजा याकूबया सन्‍तानयात त्‍वःतूगु दु, इमिसं थःगु देशयात पुर्बयागु थितिकुतिं जाय्‌कूगु दु, इमिसं पलिश्‍तीतय्‌सं थें जादु क्‍यनी अले इमिसं बिदेशीतनापं स्‍वापु तइ। 
इमिगु देश लुँ व वहलं जाःगु दु अले अन च्‍वंपिन्‍त धन-सम्‍पत्ति छुं हे मगाःमचाः जूगु मदु। इमिगु देश सलया सलं जक जाःगु दु अले इमिगु रथला ल्‍याः खाये हे मफु। 
इमिगु देश मूर्तिया मूर्ति जक जाःगु दु, इमिसं थःगु हे ल्‍हातं दय्‌कूगु मूर्तियात पुजा याःगु दु। 
उकिं यानाः फुक्‍कसिगु हेला व बेइज्‍जत जुइ। हे परमप्रभु, इपिं सुयात नं क्षमा यानादी मते। 
परमप्रभुया दण्‍डपाखें बचय् जुइत व वय्‌कःया महिमा, तःजिगु शक्तिपाखें सुपिलेत इपिं तग्‍वःगु ल्‍वहं व गुफाय् दुहांवनी। 
परमप्रभुया दिं वयाः मनूतय्‌गु फुइँ व तःधंछु नाश जुयावनी। थ्‍व दिंखुन्‍हु परमप्रभुयात जक तःधंकेगु जुइ। 
उखुन्‍हु दक्‍व शक्ति दुम्‍ह परमप्रभुं फुइँ यानाजुइपिं व तःधंछुया जुइपिं सकसित क्‍वमिलु यानादी। 
वय्‌कलं लेबनानया ततःमागु स्‍वसिमा व बाशान देशया बबल्‍लाःगु स्‍वसिमा थें च्‍वंपिं फुक्‍क तःधंछु मनूतय्‌त नाश यानादी। 
वय्‌कलं ततःजाःगु पर्वत व डाँडात थें च्‍वंपिं फुक्‍कसित माथं वंकादी। 
वय्‌कलं ततःजाःगु धरहरा व बबल्‍लाःगु पःखाःत थें च्‍वंपिं फुक्‍कसित थुनाबी, 
वय्‌कलं दक्‍वसिबय् तःधंगु व तसकं बांलाःगु जहाज थें च्‍वंपिं फुक्‍कसित नाश यानादी। 
वय्‌कलं मनूतय्‌गु घमण्‍डयात क्‍वमिलु यानादी। व दिंखुन्‍हु मूर्तित फुक्‍कं मदय्‌का छ्वइ। अले परमप्रभुयात जक तःधंकेगु जुइ। 
परमप्रभुं पृथ्‍वीइ ग्‍यानापुगु छ्वया हयादीबलय् परमप्रभुया दण्‍डपाखें बचय् जुइत व वय्‌कःया महिमा व तःजिगु शक्तिपाखें सुपिलेत इपिं तग्‍वःगु ल्‍वहंया गुफाय् व जमिनया प्‍वालय् दुहांवनी। 
व दिंखुन्‍हु मनूतय्‌सं आराधना यायेत थःम्‍हं दय्‌कूगु वहः व लुँया मूर्तित छुं व चिकंलापाया न्‍ह्यःने वान्‍छ्वया बी। 
पृथ्‍वीयात लिगिलिगि संकेत परमप्रभु दनादीबलय्, परमप्रभुया दण्‍डपाखें बचय् जुइत व वय्‌कःया महिमा व तःजिगु शक्तिपाखें सुपिलेत इपिं तग्‍वःगु ल्‍वहंया गुफाय् व जमिनया प्‍वालय् दुहांवनी। 
छम्‍हू जक सासः दुम्‍ह मनूतय्‌के भलसा तये मते। व छु हे मू वंम्‍ह खः धकाः? 
