﻿श्रेष्‍ठगीत.
7.
हे अजू चाइपुसे च्‍वंम्‍ह ल्‍यासेम्‍ह मिसा, लाकां न्‍ह्यानातःगु छंगु तुति गुलि बांलाः। छम्‍ह कारिगरं दय्‌कातःगु थें छंगु यइपुस्‍से च्‍वंगु तुति रत्‍न थें च्‍वं। 
छंगु तेप्‍चा चाकलाःगु ख्‍वला थें च्‍वं, गुकी ल्‍वाकछ्यानां तःगु दाखमद्य गुबलें मगाः जुइ मखु। छंगु प्‍वाः लिली स्‍वां नं घेरय् यानातःगु छ्वया द्वँ थें खः। 
छंगु दुरूप्‍वःत निम्‍ह हरिण थें च्‍वं, चल्‍लाया निम्‍हनापं बूपिं मचात थें च्‍वं। 
छंगु ककु किसिया दंया धरहरा थें च्‍वं, छंगु मिखा बाथ-रब्‍बीमया ध्‍वाखा लिक्‍क च्‍वंगु हेश्‍बोनया पुखू थें च्‍वं। छंगु न्‍हाय् दमस्‍कसपाखे स्‍वःगु लेबनानया धरहरा थें च्‍वं। 
छंगु छेनय् च्‍वंगु सँ कर्मेल डाँडा थें छन्‍त मुकुट पुइकातःगु दु। छंगु छेनय् च्‍वंगु सँ प्‍याजीगु रंगया पर्दा थें च्‍वं। छंगु सँ खना जुजु तसकं मक्‍ख जुइ। 
छ गुलि बांलाः अले हिसि दु, हे प्रिय, छंगु मायाय् गुलि आनन्‍द दु। 
छंगु शरीर ताय्‌गः सिमा थें च्‍वं, अले छंगु दुरुप्‍वः फलया ज्‍वाँय् थें च्‍वं। 
जिं थथे धया, “जि ताय्‌गः सिमाय् थाहां वने, अले उकिया फल ज्‍वने।” छंगु दुरूप्‍वःत दाखया ज्‍वाँय् थें च्‍वं, छंगु सासः नस्‍वाःगु स्‍याउ थें च्‍वं, 
अले छंगु म्‍हुतु तसकं भिंगु दाखमद्य थें जुइ। ल्‍यासेम्‍ह मिसा म्‍हुतुसि व वा जुया जिगु दाखमद्य बिस्‍तारं जिमि यःम्‍ह प्रिययाके थ्‍यनेमा। 
जि जिम्‍ह यःम्‍ह प्रिययाम्‍ह खः, अले वयागु प्‍याःचाः जिगु हे निंतिं खः। 
हे जितः यःम्‍ह प्रिय, वा झीपिं बुँइ चाःह्यु वनेनु, अले चान्‍हय् गामय् बाय् च्‍वने। 
झीपिं सुथ न्‍हापां हे दाखक्‍यबय् वनेनु, दाखमाय् मुखू ह्वयाच्‍वंगु दु, अले धालय्‌माय् स्‍वां ह्वये त्‍यंगु स्‍वःवनेनु, अन जिं छन्‍त तसकं माया याये। 
दुरुस्‍वांनं नस्‍वाः वय्‌काच्‍वंगु दु, झीगु लुखाय् फुक्‍क कथंया सासाःगु फलत दु। न्‍हूगु पुलांगु फलत, हे जिमि यःम्‍ह प्रिय, जिं छंगु निंतिं ल्‍यंकातयागु दु। 
