﻿उपदेशक.
8.
बुद्धि दुम्‍ह मनू थें मेपिं सु दु? थुपिं खँया अर्थ सुनां स्‍यू? बुद्धिं मनूतय्‌गु ख्‍वालय् जः बी, अले तं पिहां वःगु ख्‍वाःयात नं हीकाबी। 
जिं धाये, जुजुया आज्ञा मानय् या, छाय्‌धाःसा छं परमेश्‍वरया न्‍ह्यःने पाफःगु दु। 
छ जुजुया न्‍ह्यःनं बिदा जुयावनेत हथाय् चाये मते। छुं नं मभिंगु खँया पंलिनाः क्‍वःछी मते छाय्‌धाःसा जुजुयात छु इच्‍छा दु वं व हे याइ। 
जुजुया वचनय् फुक्‍क शक्ति दु। सुनानं जुजुयात थथे धाये फइ ला, “छसपोलं छाय् थथे यानादियागु?” 
सुनां जुजुया आज्ञा मानय् याइ, वयात मभिं जुइ मखु। अले बुद्धि दुम्‍हय्‌सिया नुगलय् पाय्‌छिगु इलय् खःकथंया खँ सीके फइ। 
मनूतय्‌के न्‍ह्याथें ज्‍याःगु दुःखकष्‍ट वःसां फुक्‍क खँया निंतिं पाय्‌छिगु ई व पाय्‌छिगु लँ खः। 
लिपा जुइगु खँ सुनानं सीके फइ मखु। अथे जुयाः मनूतय्‌त सुनां लिपा थथे जुइ धकाः धाये फइ? 
फय्‌यात पनेगु सुयाके नं शक्ति दइ मखु। अथे हे थः सीगु दिं सुनानं सरय् याये फइ मखु। लडाइँया इलय् सुयातं बिदा दइ मखु, अथे हे मभिं याइपिन्‍सं नं वपाखें बचय् याये फइ मखु। 
थ्‍व संसारय् याःगु फुक्‍क ज्‍या यात जिं बांलाक ध्‍यान बियाः स्‍वयाबलय् थुपिं फुक्‍क खँ खनागु दु। मेपिन्‍त क्‍वत्‍यला थःगु हानि याइगु छगू ई दु। 
अले जिं मभिंपिन्‍त थुंगु नं खनागु दु। इपिं पवित्रगु थासय् वने वयेगु नं याइगु अले थुकिया निंतिं शहरय् हनाबना याका जुइ। थ्‍व नं सितिं वंगु खँ खः। 
सुं नं मनुखं मभिंगु ज्‍या यात अले वयात याकनं हे दण्‍ड मबिल धाःसा मनूतय्‌सं नुगलय् मभिंगु ज्‍या यायेगु ग्‍वसाः ग्‍वइ। 
अय्‌नं मभिंपिं मनूतय्‌सं मभिंगु ज्‍या याःसां अप्‍वः ई म्‍वाना हे च्‍वनी, अथे जूसां परमेश्‍वरया भय मानय् याइपिन्‍त व वय्‌कःया न्‍ह्यःने क्‍वमिलु जुइपिन्‍त भिं हे जुइ धकाः नं जिं स्‍यू। 
तर मभिंपिन्‍सं परमेश्‍वरया भय मकाःगुलिं इमिगु भिं जुइ मखु अले इमिगु दिंत किचथें ताहाकः जुइ मखु। 
संसारय् छगू मेगु सितिं वंगु खँ जुयाच्‍वंगु दु, मभिंम्‍हय्‌सित दयेमाःगु दण्‍ड धर्मीम्‍हय्‌सित लाइ। धर्मीम्‍हय्‌सित दयेमाःगु दण्‍ड मभिंम्‍हय्‌सित लाइ। जिं धाये थ्‍व नं सितिं वंगु खँ खः। 
अथे जुयाः न्‍ह्यइपुकेगु याःसां ज्‍यू धकाः जिं सल्‍लाह बी, छाय्‌धाःसा थ्‍व संसारय् मनूतय्‌सं नयेगु, त्‍वनेगु व न्‍ह्यइपुकीगु सिबय् मेगु छुं नं भिंगु मदु। अले थ्‍व संसारय् परमेश्‍वरं बियादीगु जिवंकाछि वयात वयागु थःगु थाकुगु ज्‍याय् खुशी जुयाः ग्‍वाहालि यानादी। 
संसारय् मनूतय्‌सं मिखा तीमस्‍युसे चां न्‍हिं मद्यंसे याःगु ज्‍या स्‍वयेत व बुद्धि छु खः धकाः थुइकेत जिं थःगु मन बिया, 
अनंलि परमेश्‍वरं यानादीगु फुक्‍क खँ जिं खना। थ्‍व संसारय् छु जुयाच्‍वंगु व सुनानं थुइके फइ मखु। मनूतय्‌सं थुकियात फुक्‍क बलं माःसां नं थुपिं खँया मतलब थुइके फइ मखु। छुं जुयाः बुद्धि दुम्‍ह मनुखं जिं थुकिया मतलब पक्‍का हे स्‍यू धकाः धाःसां नं पाय्‌छिगु खँ वं सीके फइ मखु। 
