﻿उपदेशक.
5.
परमेश्‍वरया देगलय् बांलाक बिचाः यानाः जक हुँ, अन मूर्ख जुयाः बलि छायेत वनेगु स्‍वयाः न्‍यनेत हुँ, छाय्‌धाःसा मूर्खतय्‌सं द्वंकागु दु धकाः थुइके फइ मखु। 
नवायेत हथाय् चाये मते, परमेश्‍वरया न्‍ह्यःने नवायेत छं थःगु मनय् हथाय् चाये मते। परमेश्‍वर स्‍वर्गय् च्‍वनादी अले छ थ्‍व संसारय् दु। अथे जुयाः छं नवायेगु खँ कम जुइमा। 
गथे यक्‍व धन्‍दां म्‍हगस खनी अथे हे यक्‍व खँ नवातकी मूर्ख खँ नं पिहां वइ। 
छं परमेश्‍वरयात भाकल यायेबलय् व पूवंकेत लिबाके मते। मूर्खनापं वय्‌कः लय्‌तायादी मखु। छं थःगु भाकल पूवंकि। 
भाकल यानाः नं पूमवंकेगु स्‍वयाः ला भाकल हे मयायेगु बांलाः। 
छं नवाःगु खं छन्‍त पाप मलाकेमा, अले देगःया दूतयात, “जिं यानागु भाकल भूल जुल,” धकाः धाये म्‍वालेमा। छं नवाःगु कारण परमेश्‍वर तंम्‍वयाः छाय् छंगु ल्‍हाःया ज्‍यायात नाश याके बीगु? 
यक्‍व म्‍हगस म्‍हंकेगु व यक्‍व खँग्‍वःत सितिं वंगु खँ खः। अथे जुयाः परमेश्‍वरया भय कायेगु या। 
छुं जुयाः छं छगू जिल्‍लाय् चीमिपिन्‍त क्‍वत्‍यलातःगु व इमिगु निंतिं न्‍याय व अधिकार मजूगु खन धाःसा अजू चाये मते, छाय्‌धाःसा फुक्‍क अधिकार याइपिं अले व स्‍वयाः च्‍वय् च्‍वंपिं तःधंपिं अधिकार याइपिन्‍त नं इमिगु वास्‍ता यायेत तयातःगु खः। 
बुँइ सःगु फुक्‍कसिनं कायेगु याइ। जुजु थःम्‍हं नं बुं हे फाइदा काइ। 
सुनां धिबायात माया याइ। वयात न्‍ह्याक्‍व धिबा दःसां गाइ मखु। धन सम्‍पत्तिया लोभ याइम्‍हय्‌सित न्‍ह्याक्‍व लबः दःसां गाइ मखु। थ्‍व नं सितिं वंगु खँ खः। 
धन-सम्‍पत्ति अप्‍वः दइबलय् नयेगु म्‍हुतु नं अप्‍वः दयावइ। अले मालिकयात धन-सम्‍पत्ति स्‍वयाच्‍वनेगु बाहेक छुं नं फाइदा दइ मखु। 
ज्‍या याइम्‍हय्‌सिनं कम नःसां यक्‍व नःसां स्‍याक्‍क न्‍ह्यः वइ। तर धनीम्‍ह अप्‍वः धन-सम्‍पत्ति दुगुलिं न्‍ह्यवइ मखु। 
जिं थ्‍व संसारय् छगू तसकं ग्‍यानापुगु खँ खनागु दु। मालिकं थःगु नोक्‍सानया निंतिं धन-सम्‍पत्ति मुंकूगु। 
वा वयागु छुं संकटं यानाः वं मुंकूगु धन-सम्‍पत्ति फुनावंगु, गुबलय् वया मस्‍त दइ, वया मस्‍तय्‌गु निंतिं छुं नं ल्‍यं दइ मखु। 
मनू मांया प्‍वाथं पचिनांगां वइ, अले व गथे वःगु खः अथे हे लिहांवनी। वं थःम्‍हं दुखसिया याःगु ज्‍यापाखें थःगु ल्‍हातं छुं नं यंके फइ मखु। 
थ्‍व नं छगू दुःखबलय् जूगु तसकं ग्‍यानापुगु खँ खः। मनू गथे वःगु खः अथे हे तुं लिहां वनेमानि। वयात छु फाइदा दइ धकाः? छाय्‌धाःसा वं दुःखसिया याःगु ज्‍या फुक्‍क फय् थें सितिं वनी। 
वं जिवंकाछि थःगु जीवन तसकं निराश जुयाः दुखकष्‍ट व तंम्‍वया अले खिउँथाय् हे बितय् याइ। 
अनंलि जिं थ्‍व खँ थुल। परमेश्‍वरं बियादीगु थ्‍व चिहाकःगु जीवन दतले थ्‍व संसारय् नयेगु, त्‍वनेगु अले थःम्‍हं तसकं दुखसिया यानागु ज्‍याय् लुधंका च्‍वनेत कुतः यायेगु मनूतय्‌गु निंतिं भिं जुइ, छाय्‌धाःसा व हे इमिगु भाग खः। 
थ्‍व बाहेक परमेश्‍वरं सुं मनूतय्‌त धन-सम्‍पत्ति व बुँज्‍या यायेगु मौका बियादिल अले वं थःगु भाग नाला कायेगु व थःम्‍ह दुखसिया ज्‍या यानाः लय्‌ताया च्‍वनेत बियादी, थ्‍व परमेश्‍वरया वरदान खः। 
वं थःगु जीवनया इलय् यक्‍व ज्‍याखँया अनुभव याइ छाय्‌धाःसा परमेश्‍वरं वयात थःगु नुगःया लसताय् तयादीगु दु। 
