﻿भजन.
89.
दाऊद नाप परमेश्‍वरया बाचा व इस्राएलया दुर्दशा, लय् तइम्‍हय्‌सिगु निंतिं – एज्रा एतानया मश्‍किल जिं परमप्रभुया सदां दयाच्‍वनीगु दया मायाया म्‍ये हालाच्‍वने, छि पुस्‍तां पुस्‍ता तक थः मनूत प्रति विश्‍वास याये बहःम्‍ह जुयादी धकाः जिं मनूतय्‌त कनाच्‍वने। 
छिगु सदां दयाच्‍वनीगु दया माया अले छिगु विश्‍वास याये बहःसू आकाश थें थातं च्‍वनी धकाः जिं स्‍यू। 
छिं धयादिल, “जिं थःम्‍हं ल्‍ययाम्‍हनापं बाचा चिनागु दु, थः दास दाऊदलिसे पाफयागु दु, 
‘छिमि छम्‍ह सन्‍तान न्‍ह्याबलें जुजु जुयाच्‍वनी, छंगु सिंहासनयात पुस्‍तां पुस्‍ता तक तये।’” सेला 
हे परमप्रभु, स्‍वर्गय् छिगु अजू चायापुगु ज्‍याया प्रशंसा जुइ, स्‍वर्गदूततय्‌गु पुचलय् छि विश्‍वास याये बहःम्‍ह खः धकाः प्रशंसा जुइ। 
छाय्‌धाःसा स्‍वर्गय् परमप्रभु थें जाःम्‍ह सुं नं मदु, परमप्रभुनापं ज्‍वःलाःम्‍ह सुं नं स्‍वर्गयाम्‍ह प्राणी मदु। 
परमेश्‍वर पवित्र मनूतय्‌गु सभाय् तसकं इज्‍जत यायेमाःम्‍ह व थः जःखः च्‍वंपिं फुक्‍क स्‍वयाः अप्‍वः ग्‍याये माःम्‍ह खः। 
हे दक्‍व शक्ति दुम्‍ह परमप्रभु परमेश्‍वर, छि थें ज्‍याःम्‍ह सु दु धकाः? हे परमप्रभु, फुक्‍क खँय् छि विश्‍वास याये बहःम्‍ह खः। 
छिं तःधंगु लबु थाहां वयाच्‍वंगु समुद्रय् राज्‍य यानादी, उकियागु लबु थाहां वइबलय् छिं हे उकियात शान्‍त यानादी। 
छिं हे तःधिकःम्‍ह समुद्रया जन्‍तुयात काच्‍याक कुचुक यानादिल, छिं थः शत्रुतय्‌त थःगु ल्‍हाःया बलं छ्यालब्‍याल यानादिल। 
आकाश व पृथ्‍वी छिगु हे खः, संसार व उकी दुगु फुक्‍क छिं हे दय्‌कादीगु खः। 
उत्तर व दच्‍छिन छिं दय्‌कादीगु खः, तबोर व हेर्मोन पर्वत छिगु नामय् लय्‌लय्‌तातां म्‍ये हाली। 
छि गुलि बल्‍लाःम्‍ह खः! छिगु बल गुलि तःधं! 
धार्मिकता व न्‍याय छिगु सिंहासनया जग खः। छिगु सदां दइगु दया माया व विश्‍वास याये बहःसू छिकपिनि दूतत जुयाः छिगु न्‍ह्यः न्‍ह्यः वनी। 
हे परमप्रभु, धन्‍य खः भजन हालाः छिगु आराधना याइपिं, व छिगु दयाया जलय् म्‍वानाच्‍वनिपिं मनूत। 
इपिं न्‍हिच्‍छि हे छिगु हे नामय् लय्‌ताइ। अले इपिं छिगु हे धार्मिकताया कारणं च्‍वय् थाहां वनी। 
छाय्‌धाःसा छि हे इमिगु महिमा व शक्ति खः। अले छिगु हे दया मायां जिमित बल्‍लाकादीगु दु। 
हे परमप्रभु, छिं जिमित रक्षा याइम्‍ह ल्‍ययादिल, छि इस्राएलया पवित्र परमेश्‍वरं हे जिमित जुजु बियादिल। 
यक्‍व न्‍हापा छिं थः विश्‍वास यायेबहःपिं मनूतय्‌त दर्शन बियाः थथे धयादिल, “जिं छम्‍ह नांजाःम्‍ह सिपाइँयात ग्‍वाहालि यानागु दु, जिं मनूतय् दथुं ल्‍ययाम्‍ह छम्‍ह मनूयात राज्‍ययागु सिंहासन बियागु दु। 
जिं जिमि दास दाऊदयात कयाः थःगु पवित्र चिकनं अभिषेक यानागु दु। 
जिगु बल न्‍ह्याबलें वयाके दयाच्‍वनी। जिगु शक्तिं वयात बल्‍लाकाबी। 
सुं शत्रुं वयात झंगः लाये खनी मखु, सुं दुष्‍टं वयात क्‍वह्यंके खनी मखु। 
जिं वया शत्रुतय्‌त वयागु न्‍ह्यःनं नाश यानाबी, अले वयात मयय्‌किपिन्‍के विपत्ति हयाबी। 
जिं वयात सदां दइगु दया माया यानाच्‍वने, अले वनापं विश्‍वास याये बहःम्‍ह जुयाच्‍वने, जिगु नांपाखें वयागु शक्ति अप्‍वयावनी। 
जिं वयागु राज्‍य भूमध्‍यसागरंनिसें यूफ्रेटिस खुसि तक थ्‍यंकाबी। 
वं जितः थथे धकाः सःती, ‘छि जिमि बाः, जिमि परमेश्‍वर व जिगु उद्धारया ल्‍वहंधी खः।’ 
हाकनं जिं वयात थः तःधिकःम्‍ह काय् व पृथ्‍वीया जुजुपिनि नायः दय्‌काबी। 
जिगु सदां दयाच्‍वनीगु दया माया वयाके दयाच्‍वनी, अले जिं वनापं चिनागु बाचा न्‍ह्याबलें दयाच्‍वनी। 
जिं वया वंशयात न्‍ह्याबलें तयातये, अले आकाश दतले वयागु सिंहासन दयाच्‍वनी। 
वया सन्‍तानं जिगु व्‍यवस्‍थायात त्‍वःतल धाःसा जिगु नियमकथं मजुल धाःसा, 
जिगु विधियात हाचांगाल धाःसा, जिगु आज्ञा पालन मयात धाःसा, 
जिं इमिगु अपराधया सजाँय कथिं, व इमिगु अधर्मया सजाँय कोर्रां बी। 
अय्‌नं जिं जिगु माया दाऊदपाखें चीकाछ्वये मखु। अले जिं वयात बियागु बचं पूमवंकुसें त्‍वःते मखु। 
जिं थःगु बाचा त्‍वथुले नं मखु, जिं थःगु म्‍हुतुं वयात बियागु बचं लित काये नं मखु। 
जिं थःगु पवित्र नामय् न्‍ह्याबलेंया लागि बचं बियागु दु, जिं दाऊदलिसे गुबलें मखुगु खँ ल्‍हाये मखु। 
वयागु वंश न्‍ह्याबलें दयाच्‍वनी अले जिगु न्‍ह्यःने वयागु सिंहासन सूर्य थें दयाच्‍वनी। 
व तिमिला थें न्‍ह्याबलेंया लागि पलिस्‍था जुइ, आकाशया साक्षी ला विश्‍वास यायेबहः जुइ।” सेला 
अय्‌नं छिं थःम्‍हं अभिषेक यानादीम्‍हय्‌सित त्‍वःतादीगु दु, इन्‍कार यानादीगु दु, अले छि वलिसें तंचायादीगु दु। 
छिं थः दासनापं चिनादीगु बाचायात त्‍वःतादीगु दु, छिं वयागु श्रीपेच बँय् वान्‍छ्वयाः अशुद्ध यानादीगु दु। 
छिं वयागु शहरत रक्षा याइगु फुक्‍क पखाः थुनादीगु दु, अले वया किल्‍ला भज्‍यंक स्‍यंकादीगु दु। 
अनं जुयाः वनीपिं सकसिनं वयात लुतय् याःगु दु, वया जःलाखःलातय्‌सं वयात हिस्‍याइगु। 
छिं वया शत्रुतय्‌त बल्‍लाकादिल, वया फुक्‍क शत्रुतय्‌त लय्‌ताय्‌कादीगु दु। 
हानं छिं वयागु तरवारया धाःयात हीकादीगु दु, अले छिं लडाइँलय् वयात ग्‍वाहालि यानादीगु मदु। 
छिं वयागु गौरव सिधय्‌कादीगु दु, अले वयागु सिंहासन बँय् वांछ्वयादीगु दु। 
वयागु ल्‍याय्‌म्‍हया दिं छिं कम यानादीगु दु, छिं वयात लज्‍यां त्‍वपुयादीगु दु। सेला 
हे परमप्रभु, गुबलय् तक? छु छिं न्‍ह्याबलें जिमिगुपाखें थःगु ख्‍वाः फस्‍वय्‌कादीगु ला? छिगु तं गुबलय् तक मि थें च्‍यानाच्‍वनीगु? 
जिगु जीवन गुलि चिहाकः धकाः लुमंकादिसँ। छिं छाय् मफतय् मनूतय्‌त सृष्‍टि यानादियागु? 
सु मनू न्‍ह्याबलें म्‍वानाच्‍वनी? सुनां थःत कालया शक्तिपाखें बचय् याये फइ? सेला 
हे परमप्रभु, छिगु न्‍हापायागु सदां दइगु दया माया गन वन? छिं थःगु विश्‍वास याये बहःसुलिइ दाऊदनापं पाफयादीगु गन दु? 
लुमंकादिसँ हे परमप्रभु, गथे मनूतय्‌सं छिकपिनि दासयात बेइज्‍जत यात, अले गथे यानाः जिं छितः आराधना मयाइपिं जातियापिं मनूतय्‌गु हेला सह यानाच्‍वना। 
छिकपिनि शत्रुतय्‌सं जितः हिस्‍यागु दु, हे परमप्रभु, इमिसं छिं अभिषेक यानादीम्‍ह जुजुयात पला पलाखय् हिस्‍याइगु। 
न्‍ह्याबलें परमप्रभुया प्रशंसा या! आमेन! आमेन! 
