﻿भजन.
84.
कोरह वंशयापिनिगु भजन, लय् तइम्‍हय्‌सिगु निंतिं – गित्तिया कथं हे दक्‍व शक्ति दुम्‍ह परमप्रभु, छि च्‍वनादीगु थाय् गुलि यइपुसे च्‍वँ! 
जितः परमप्रभुया चुकय् दुहां वने यः, जितः परमप्रभुया देगलय् च्‍वने मास्‍ति वः। दुनुगलंनिसें जिं म्‍वाःम्‍ह परमेश्‍वरया लागि लय्‌तातां म्‍ये हाले। 
चखुंचातय्‌सं नं स्‍वः दय्‌कूगु दु, इखुंचातय्‌गु नं थःगु हे छेँ दु, इमिसं थः मस्‍तय्‌त छिगु वेदी लिक्‍क तइ, दक्‍व शक्ति दुम्‍ह परमप्रभु, जिमि जुजु, जिमि परमेश्‍वर। 
धन्‍य खः छिगु देगलय् च्‍वनाः न्‍ह्याबलें प्रशंसाया म्‍ये हालीपिं मनूत। सेला 
धन्‍य खः छिं बल बियादीपिं अले सियोन पर्वतय् वने मास्‍ति वय्‌काच्‍वंपिं मनूत। 
इपिं बाकाया ब्‍यासिया दथुइ जुयावनीबलय् इमिसं उकियात लः बुयावइगु थाय् यानाबी, न्‍हापा वःगु वां अन पुखूत जाइ। 
इपिं लँय् वनाच्‍वनीबलय् झन बल्‍लाइ, अले सियोन पर्वतय् परमेश्‍वरया न्‍ह्यःने खनेदय्‌कः वइ। 
हे परमप्रभु, दक्‍व शक्ति दुम्‍ह परमेश्‍वर, जिगु प्रार्थना न्‍यनादिसँ। हे याकूबया परमेश्‍वर, जिपाखे न्‍हाय्‌पं बियादिसँ। सेला 
हे परमेश्‍वर, जिमिगु ढाल, छिं अभिषेक जूम्‍ह जिमि जुजुयात सुवाः बियादिसँ। 
हे परमेश्‍वर, छन्‍हु छिगु चुकय् च्‍वनेगु मेथाय् द्वःछिन्‍हु स्‍वयाः भिं। दुष्‍टतय्‌गु पालय् च्‍वनेगु स्‍वयाः जिमि परमेश्‍वरया देगःया ध्‍वाखा पिवाः जुइगु यः। 
परमप्रभु परमेश्‍वर सूर्य व ढाल खः, परमप्रभुं दया माया यानादी अले इज्‍जत बियादी। भिंगु ज्‍या याइपिन्‍त वय्‌कलं फुक्‍क भिंगु बियादी। 
दक्‍व शक्ति दुम्‍ह परमप्रभु! धन्‍य खः छितः भरोसा याःपिं मनूत। 
