﻿भजन.
16.
दाऊदया भजन जितः रक्षा यानादिसँ, परमेश्‍वर, जि छिगु शरणय् वयागु दु। 
जिं परमप्रभुयात धयागु दु – “छि जिमि प्रभु खः। जिके दुगु फुक्‍कं भिंगु खँ छिगुपाखें हे वःगु खः।” 
देशय्‌ दुपिं पवित्र मनूत फुक्‍कं तःधंके बहःपिं जू, इपिंलिसे च्‍वनेदयाः जि लय्‌ताः। 
मेपिं द्यःतय्‌गु ल्‍यूल्‍यू ब्‍वाँय् जुइपिं मनूतय्‌सं थःगु दुःख थःम्‍हं अप्‍वय्‌काजुइ। जिं इमिगु बां बीगु ज्‍याय् ब्‍वति काये मखु अले जिं थःगु म्‍हुतुं इमिगु नां हे काये मखु। 
परमप्रभु, छि हे जिगु सर्बय खः, जितः माःगु फुक्‍कं छिं बियादीगु दु। छिं जिगु भाग्‍य सुरक्षित तयादीगु दु। 
जितः बियादीगु थाय् गुलि न्‍ह्याइपुसे च्‍वं गपाय्‌सकं तःजिगु सर्बय! 
जितः लँ क्‍यनादीगुलिं जिं परमप्रभुयात तःधंके, चान्‍हय् नं जिगु नुगलं जितः न्‍वानाच्‍वनी। 
जिं स्‍यू, परमप्रभु जिलिसें न्‍ह्याबलें दु। जितः छुकिं नं संके फइ मखु, छाय्‌धाःसा परमप्रभु जिलिसें दु। 
उकिं जिगु नुगः लय्‌ताः, अले चंचं धाः। जिं थःत प्‍यखें सुरक्षित ताय्‌का, 
छाय्‌धाःसा छिं जिगु आत्‍मायात सीपिनिगु दथुइ त्‍वःतादी मखु। अले छितः विश्‍वास याःम्‍हय्‌सित छिं सीगालय् ध्‍वगिकेबी मखु। 
छिं जितः जीवनया लँपु क्‍यनादी छिनापं च्‍वनाः जितः लय्‌ताय्‌केबी। अले थ्‍व लसता जितः सदां सदां बियादी। 
