﻿भजन.
7.
दाऊदया भजन, बेन्‍यामीनी कूशया विषयलय् दाऊदं परमप्रभुया न्‍ह्यःने हाःगु भजन हे परमप्रभु जिमि परमेश्‍वर, जि छिगु हे शरणय् वया। जितः लिनाजुइपिं फुक्‍कपाखें जितः बचय् यानादिसँ। 
मखुसा सिंहं थें इमिसं जितः चिचित्‍याइ। जितः सुनानं बचय् याये मफयेक इमिसं कुचा कुचा थली। 
हे परमप्रभु परमेश्‍वर, जिगु ल्‍हातिं छुं मभिंगु ज्‍या जूगु दुसा, 
थः पासायात जिं मभिं यानागु दुसा, छुं म्‍वायेक जिं थः विरोधीतय्‌त हय्‌कयागु दुसा, जिं थज्‍याःगु छुं यानागु दुसा 
जिमि शत्रुतय्‌सं जितः लिनाः ज्‍वनेमा, इमिसं जितः बँय् न्‍हुत्तुमत्तु न्‍हुयाः स्‍यायेमा। सेला 
हे परमप्रभु, दनाः थःगु तं क्‍यनादिसँ। जिमि शत्रुतय्‌गु तंया विरोधय् दनादिसँ। हे परमेश्‍वर, न्‍ह्यलं चाय्‌कादिसँ, अले न्‍याय यानादिसँ। 
जाति जातित छिगु प्‍यखें मुनेमा, अले च्‍वंनिसें इमित शासन यानादिसँ। 
परमप्रभुं फुक्‍क जातिया मनूतय्‌त न्‍याय यानादी। हे परमप्रभु, जिगु न्‍याय यानादिसँ, अले जि गुलि भिंम्‍ह व दोष मदुम्‍ह खः धकाः क्‍यनादिसँ, हे दक्‍वसिबय् तःधंम्‍ह परमेश्‍वर! 
नुगः व बुद्धि दुवालादीम्‍ह हे परमेश्‍वर, छिं न्‍ह्याबलें भिंगु यानादी। दुष्‍टतय्‌गु मभिंगु ज्‍या न्‍हंकादिसँ, अले भिंगु याइपिन्‍त बचय् यानादिसँ। 
जिगु ढाल दक्‍वसिबय् तःधंम्‍ह परमेश्‍वर खः, गुम्‍हय्‌सिनं थःगु खँ न्‍यनीपिन्‍त बचय् यानादी। 
परमेश्‍वर ख्‍वाः स्‍वयाः न्‍याय मयाइम्‍ह न्‍यायाधीश खः, गुम्‍हय्‌सिनं मभिंगु ज्‍या याइपिन्‍त थःगु तं न्‍हियान्‍हिथं क्‍यनादी। 
इमिसं थःगु मन महीकल धाःसा वय्‌कलं थःगु तरवार ज्‍वय्‌कादी। वय्‌कलं थःगु धनुषय् वाण तयाः सालादी। 
वय्‌कलं थःगु ग्‍यानापुगु ल्‍वाभः ज्‍वनादी। वय्‌कलं थःगु मियागु वाण ल्‍ह्वनादी। 
गुम्‍हय्‌सिनं मभिंगु खँ बिचाः याइ, अले मभिंगु ग्‍वसाः ग्‍वयाजुइ, वं छलकपट जक याना जुइ। 
सुनां कर्पिनिगु निंतिं गाः म्‍हुइ व थःम्‍हं म्‍हूगु गालय् थः हे दुनी। 
वं याःगु मभिंगु ज्‍या वयागु हे छेनय् लाःवनी। वं याःगु अत्‍याचार वयागु हे कपालय् लाःवनी। 
वय्‌कःयागु धार्मिकताया कारणं जिं परमप्रभुयात तःधंके। जिं दक्‍व शक्ति दुम्‍ह परमप्रभुया म्‍ये हाले। 
