﻿अय्‍यूब.
42.
अले अय्‍यूबं थथे धकाः परमप्रभुयात लिसः बिल, 
“छिं न्‍ह्यागुं नं यानादी फु धकाः जिं स्‍यू। सुनानं छिगु योजनायात स्‍यंके फइ मखु। 
छिं न्‍यनादिल, ‘ज्ञान मदय्‌कं जिगु योजनायात पने फुम्‍ह सु दु?’ धात्‍थें जिं ला थःम्‍हं हे मस्‍यूगु ततःधंगु ज्‍यायागु बारे खँ ल्‍हानागु दु, गुगु खँ जिं थुइके मफु अले जिगु लागि अजू चायापुस्‍से च्‍वं। 
“छिं धयादिल, ‘आः ध्‍यान बियाः न्‍यँ। जि छलिसें न्‍ववाये, जिं छंके न्‍यने, छं जितः लिसः बी’। 
जिगु न्‍हाय्‌पनं छिगु बारे न्‍हापा हे न्‍यने धुंकूगु खः, तर आः ला जिं छितः थःगु हे मिखां खंगु दु। 
उकिं जिं थःत क्‍वह्यंकाः स्‍वया, अले धू व नउलय् च्‍वनाः पस्‍ताय् चाये।” 
परमप्रभु अय्‍यूबलिसें न्‍ववाये धुंकाः वय्‌कलं एलीपज तेमानीयात धयादिल, “छ व छिमि निम्‍ह पासापिं खनाः जि तम्‍वयागु दु, छाय्‌धाःसा जिम्‍ह दास अय्‍यूबं थें छिमिसं जिगु बारे खःगु खँ मधाः। 
उकिं आः न्‍हय्‌म्‍ह द्वहं व न्‍हय्‌म्‍ह भ्‍याःचा ज्‍वनाः जिम्‍ह दास अय्‍यूबयाथाय् हुँ। अले छिमिसं थःगु निंतिं होमबलि छा। जिम्‍ह दास अय्‍यूबं छिमिगु निंतिं प्रार्थना याइ। जिं वयागु प्रार्थना न्‍यने, अले जिं छिमिगु मूर्खताकथं छिमित व्‍यवहार याये मखु। छाय्‌धाःसा जिम्‍ह दास अय्‍यूबं थें जिगु बारे धायेमाःगु खँ छिमिसं मधाः।” 
अले एलीपज, बिल्‍दद व सोपरं परमप्रभुं इमित या धकाः धयादी थें हे यात, अले थः पासापिनिगु निंतिं अय्‍यूबं प्रार्थना यानाब्‍यूबलय् परमप्रभुं अय्‍यूबयागु प्रार्थना स्‍वीकार यानादिल। 
थुकथं अय्‍यूबं थः पासापिनिगु निंतिं प्रार्थना याये धुंकाः परमप्रभुं अय्‍यूबयागु दुःख चीकादिल। अय्‍यूबयाके न्‍हापा गुलि धन-सम्‍पत्ति दुगु खः उकिया निदुगं परमप्रभुं वयात बियादिल। 
अनंलि अय्‍यूबया फुक्‍क दाजुकिजा, तताकेहेँ व वया न्‍हापायापिं म्‍हस्‍यूपिं मनूत वयाः वलिसें वयागु छेँय् भ्‍वय् नल। अले परमप्रभुं वयाके हयादीगु फुक्‍क विपत्तिया निंतिं इमिसं वलिसें बिलाप यात, अले वयात सान्‍त्‍वना बिल। अले सकसिनं वयात धिबा व लुँयागु अंगू बिल। 
अले परमप्रभुं अय्‍यूबयागु जीवनया लिपांगु ईयात न्‍हापायागु ई स्‍वयाः यक्‍व सुवाः बियादिल। वयाके झिंप्‍यद्वःम्‍ह फै-च्‍वलय्, खुद्वःम्‍ह ऊँट, द्वःछिज्‍वः द्वहं व द्वःछिम्‍ह गधा दत। 
वया न्‍हय्‌म्‍ह काय् व स्‍वम्‍ह म्‍ह्याय् दत। 
वं तःधिकःम्‍ह म्‍ह्याय्‌या नां यमीमा, माइलीम्‍ह म्‍ह्याय्‌या नां कसीआ व चिधिकःम्‍ह म्‍ह्याय्‌या नां केरेन-हप्‍पूक तल। 
सारा देशय् अय्‍यूबया म्‍ह्याय्‌पिं थें बांलाःपिं सुं नं मदु, अले इमि अबुं इमित इमि दाजुकिजापिन्‍त ति हे पु‍र्ख्‍यौली सम्‍पत्ति बिल। 
अनंलि अय्‍यूब मेगु सच्‍छि व पिइदँ म्‍वात, अले वं थः छय्, छुइ व उइ तक खन। 
थुकथं व यक्‍व बुरा जुइ धुंकाः सित। व ताःई तक म्‍वात।
