﻿अय्‍यूब.
38.
अले परमप्रभुं अय्‍यूबयात ग्‍वःफय्‌या दथुं थथे लिसः बियादिल, 
“ज्ञान मदुगु खँ ल्‍हानाः जिगु योजनायात स्‍यंकेत स्‍वःम्‍ह व सु खः? 
मिजंम्‍ह थें जनी च्‍यु, जिं छन्‍त न्‍यने, छं लिसः ब्‍यु! 
“जिं पृथ्‍वीयागु जग तयाबलय् छ गन दु? छंके दुग्‍यां दुसा जितः धा! 
सुनां थुकिया नाप क्‍वःछित? छं ला सी हे माःगु। सुनां थुकी नापय् यायेगु खिपः यख्‍खात? 
पृथ्‍वीयात छुकिं त्‍यवः बियातःगु दु? थुकिया मू ल्‍वहं सुनां तल? 
उगु दिंया सुथ न्‍हापांया नगुतय्‌सं मिलय् जुयाः म्‍ये हाल। अले स्‍वर्गदूतत लय्‌तायाः दनाः तस्‍सलं हाल। 
“समुद्र पृथ्‍वीया गर्भं पंम्‍हुयाः पिहां वःबलय् सुनां समुद्रयात लुखाया ल्‍युने बन्‍द यानाबिल? 
उबलय् जिं उकियात सुपाँय्‌या कापतं त्‍वपुया, अले तसकं खिउँगुलिं उकियात हिना? 
उकिया लुखात व चुकूत खःगु थासय् तया, जिं उकिया सिमाना क्‍वःछिनाबलय्, 
जिं धया, ‘थन तक जक छ वये फइ, थ्‍व स्‍वयाः न्‍ह्यःने मखु। थन हे छंगु तःधंगु लबुत दीमा।’ 
“छु छं थःगु जीवनय् गुबलें सुथयात आज्ञा बियागु दु ला? अथवा सुथ न्‍हापांयात वयागु थाय् क्‍यनाबियागु दु ला? 
चाया मभिंगु ज्‍या यात अन्‍त यायेत छं पृथ्‍वीया कुन्‍चाय् तक निभाःयात चकंका बियागु दु ला? 
जः लिक्‍क वःगु थें पृथ्‍वीं छगू छापया क्‍वय् चा थें आकार काइ, उकियात ज्‍वाल ज्‍वाल च्‍वंगु रँगं बांलाकातःगु दु। 
गुम्‍ह दुष्‍टं इमिगु जःयात सःति, व उपिंपाखें तापानावनी। 
“छ समुद्रया मुहान तक वनागु दु ला? छ उकिया तज्‍जाःगु थाय् माः वनागु दु ला? 
छन्‍त सुनानं गुबलें मृत्‍युलोकया लुखा क्‍यंगु दु ला? तसकं खिउँगुया लुखात छं गुबलें खंगु दु ला? 
छं पृथ्‍वी गपाय्‌धं स्‍यू ला? छं थ्‍व खँ स्‍यूसा जितः धा! 
“जःया मुहान गन दु? खिउँगु गन च्‍वनी? 
छं उपिं फुक्‍कसित उमिगु थासय् यंके फु ला? उमिगु छेँ वनीगु लँ छं स्‍यू ला? 
धात्‍थें हे छं थ्‍व फुक्‍क खँ स्‍यूगु जुइफु, छाय्‌धाःसा छ उबलय् बुइ धुंकूगु खः। छ गुलि यक्‍व म्‍वाये धुंकल! 
“छ च्‍वापुया धुकुतिइ वनागु दु ला? अथवा प्‍वँ मुंकातःगु थाय् छं खनागु दु ला? 
गुकियात जिं आपत जुइबलय्‌या लागि, अर्थात युद्ध व लडाइँया लागि ल्‍यंकातयागु दु। 
गुगु लँपुं हाबलासा थुखे उखे न्‍यनाः पिहां वइ वा पुर्बयागु फय् पृथ्‍वीइ प्‍यखें ब्‍वय्‌की? 
तसकं वा वःगुया लागि सुनां नहर म्‍हुल? नँ न्‍यानाः वइगु वाफय्‌या निंतिं लँ सुनां तयार याःगु दु 
मनू मदुगु जमिनय् मरुभूमियात प्‍याकेत, 
झिजांमिजां दंगु ज्‍या मवंगु जमिनयात लुधंकेत, अले सुख्‍खा जमिनय् घाँय् बुइकेत सुनां लँ तयार यात? 
छु आकाशं वइगु वाया सुं अबु दु ला? सुतिया अबु सु खः? 
च्‍वापु व सुतिलःया मां सु खः? 
छाय्‌धाःसा गुबलें गुबलें लः बरफय् हिली अले ल्‍वहं थें छाइ, गुबलें तज्‍जाःगु समुद्र धीचिनी। 
“छं किरकिटी नगु पुचःयात ची फु ला? वा मृगशिरा नगु पुचःयात छ्वासुका बी फु ला? 
छं नगु पुचःयात खःगु खःगु इलय् पिकाये फु ला? अथवा सप्‍तर्षि नगु व वया पुचःयात उमिगु लँय् यंके फु ला? 
छं आकाशया नियम स्‍यू ला? छं पृथ्‍वीइ आकाशया व नियम नीस्‍वने फु ला? 
“छं तःसलं हालाः सुपाँय्‌यात उजं बी फु ला? अले थःत खुसिबालं त्‍वपुये फु ला? 
छं हाबलासायात उमिगु लँपुइ आज्ञा बी फु ला? उमिसं, ‘जिपिं थन दु धकाः धाइ ला?’ 
सुनां नुगःयात बुद्धि बिल? अथवा मनयात दुग्‍यां बिल? 
सुपाँय्‌यात ल्‍याः खाये फुम्‍ह सु बुद्धिमान दु? आकाशय् दुगु लःया धुकूयात प्‍वंके फुम्‍ह सु बुद्धिमान दु, 
गबले धू छाइ अले चाया धी प्‍यपुनी? 
“छं मिसाम्‍ह सिंहया निंतिं शिकार मालाबी फु ला? अले सिंहतय् पित्‍याः छं लुधंके फु ला, 
गबले इपिं थःगु गुफाय् हमला यायेत सुलाच्‍वनी वा सुलाच्‍वंगु थासय् पियाच्‍वनी? 
सँक्‍वःया मस्‍त परमेश्‍वरयात बिन्‍ति यायां नयेपित्‍याकाः थुखे उखे ब्‍वयाजुइबलय् उमित सुनां नयेगु नसा बी ला?” 
