﻿अय्‍यूब.
32.
अय्‍यूबं थःत धर्मीम्‍ह ताय्‌कूगु जुयाः उपिं स्‍वम्‍ह मनुखं अय्‍यूबयात लिसः बीगु त्‍वःतल। 
तर राम वंशयाम्‍ह बुजी, बारकेलया काय् एलीहू अय्‍यूब खनाः तसकं तंचाल, छाय्‌धाःसा अय्‍यूबं थःत परमेश्‍वरयात स्‍वयाः धर्मी ठहरय् यात। 
उपिं स्‍वम्‍ह पासापिं खनाः नं व तंचाल। छाय्‌धाःसा अय्‍यूबयात लिसः बीत इमिके छुं लिसः हे मदु। खः ला इमिसं वयात दोषी ठहरय् याःगु खः। 
इपिं अय्‍यूबलिसें खँ ल्‍हानाच्‍वंतले एलीहू सुम्‍क च्‍वनाच्‍वंगु खः। छाय्‌धाःसा इपिं व स्‍वयाः थकालिपिं खः। 
तर उपिं स्‍वम्‍हय्‌सिके अय्‍यूबयात लिसः बीत छुं लिसः मदुगु खनाः एलीहू तंचाल। 
अले बुजी, बारकेलया काय् एलीहूं थथे धाल, “जि ला चिधिकःनि, अले छिकपिं बुरा जुइ धुंकल। उकिं जिं भय कयागु खः। छिकपिन्‍त जिगु बिचाः कनेत ग्‍यानागु खः। 
जिं बिचाः याना, ‘उमेरं न्‍ववायेमा, अले यक्‍व दँ दुपिन्‍सं बुद्धि स्‍यनेमा।’ 
तर मनूतय्‌गु दुने परमेश्‍वरया आत्‍मा दु, दक्‍व शक्ति दुम्‍ह परमेश्‍वरयागु सासः, गुम्‍हय्‌सिनं इमित दुग्‍यां बी। 
बुरापिं जक बुद्धि दुपिं जुइ मखु, अथवा न्‍याय थूपिं बुरापिं जक जुइ मखु। 
“उकिं जिगु खँ न्‍यनादिसँ! धकाः जिं धाये। जिं छु स्‍यू व जिं धाये। 
जि सुम्‍क च्‍वनाः छिकपिनिगु खँ न्‍यनाच्‍वना। छिकपिन्‍सं दुग्‍यांया खँग्‍वः मालादीबलय् जिं छिकपिनिगु धापू ध्‍यान बियाः न्‍यनाच्‍वना। 
जिं ध्‍यान बियाः छिकपिनिगु खँ न्‍यना, स्‍वयादिसँ! सुनानं अय्‍यूबयागु खँ मखु धकाः मधा। छिकपिं मध्‍ये सुनानं वय्‌कःया जवाःसवाःया लिसः मब्‍यू। 
‘जिमिसं बुद्धि काये धुन’ धकाः छिकपिन्‍सं धयादी मते। ‘मनुखं मखु, परमेश्‍वरं हे वयात लिसः बियादीमा।’ 
तर अय्‍यूबं जिगु विरोधय् न्‍ववागु मदु। छिकपिन्‍सं थें जिं वयात लिसः बी मखु। 
“हे अय्‍यूब, छं स्‍वम्‍ह पासापिनिगु नुगः क्‍वतुंगु दु, छिकपिन्‍सं छुं लिसः बियादी मखु, धायेत छिकपिन्‍के छुं हे मदु। 
छिकपिन्‍सं न्‍वमवाः धकाः जिं पियाच्‍वनेगु ला? छाय्‌धाःसा छिकपिं अन दनाच्‍वनी, लिसः बी हे मखु। 
आः जिं नं लिसः बी, जिं नं थःगु बिचाः प्‍वंके। 
छाय्‌धाःसा जिके यक्‍व खँ दु, जिगु दुने दुगु आत्‍मां जितः करं क्‍यंकी, 
स्‍वयादिसँ! जिगु प्‍वाः पुसा तयातःगु दाखमद्य थें च्‍वं। दाखरसयागु न्‍हूगु म्‍हिचा थें पूरा फ्‍वंगाःगु दु। 
शान्‍ति काय्‌त जिं न्‍ववायेमाः, जिं थःगु म्‍हुतुप्‍वाः चाय्‌काः लिसः बीमाः। 
जिं सुयागुं पंली मखु। जिं सुं मनूयात फुरफुरे याये मखु। 
छाय्‌धाःसा जिं फुरफुरे याये सःगु जूसा, जितः सृष्‍टि याःम्‍हय्‌सिनं जितः याकनं ल्‍ह्वनायंकीगु जुइगु।” 
