﻿अय्‍यूब.
30.
“तर आः, जि स्‍वयाः चिधिकःपिं जि खनाः हेस्‍यानाः न्‍हिलीगु। इमि अबुपिन्‍त जिं जिगु फै पिवाः च्‍वनिपिं खिचातनापं तयेत तकं मल्‍वःपिं ताय्‌केगु। 
इमिगु ल्‍हायागु बल जिगु लागि छु ज्‍यालगय् जू धकाः? इमिगु शक्ति खतम जुइ धुंकूगु खः। 
इपिं गरीब व नये मखनाः गंसि जुइ धुंकल। इपिं चान्‍हय् चान्‍हय् मरुभूमिया सुख्‍खा थासय् चाःहिला जुइगु। 
नयेत इमिसं झालं चि सवाः वःगु जडिबुटी इमिगु नयेगु नसा तुफिमाया हा खः। 
इमित मनूतय्‌गु समाजं पितिनाछ्वःगु दु। खुँयात हालाः लिनायंकूगु थें सकसिनं इमित हालाः लिनायंकीगु। 
इपिं गंगु खुसिया चिरिबाःगु जमिनय् व ततःग्‍वःगु ल्‍वहंधीया कापीइ च्‍वनेमाल। 
पशुत थें इपिं झालय् हालीगु, अले सिमाचाया क्‍वय् ग्‍वारा चिनाः च्‍वनीगु। 
इपिं नां मदुपिं मूर्खपिं व देशं पितिनाछ्वःपिं खः। 
“आः जितः इमि काय् म्‍ह्याय्‌पिन्‍सं हेस्‍याइगु। इमिगु दथुइ जि न्‍हिइकीगु खँ जूगु दु। 
इमिसं जितः क्‍वह्यंकीगु, इपिं जिपाखें तापाक च्‍वनीगु, इपिं जितः थुकलं बीत लिचिली मखु। 
छाय्‌धाःसा परमेश्‍वरं जितः बल मदुम्‍ह व ग्‍वाहालि मदुम्‍ह यानादीगु दु, इमिसं जितः थःगु फुक्‍क तं प्‍वंकीगु। 
इपिं जिगु जवपाखे ग्‍वाः ग्‍वाः वयाः दं वइगु, इमिसं जिगु तुतिया लागि जाः तइगु, अले जितः नाश यायेत लँ दय्‌कीगु। 
इमिसं जिगु लँ थुनाबीगु, सुयागुं ग्‍वाहालि मदय्‌कं हे इपिं जितः नाश यायेत ताःलाइगु। 
ह्वातां चालाच्‍वंगु पखाःया ह्वतं इपिं मन्‍ह्यं मन्‍ह्यं दुहां वइगु, दुंगु पःखालं इपिं घ्‍वातुमत्तुघ्‍वानाः वइगु। 
भयनं जितः घेरय् याइगु, जिगु इज्‍जतयात फसं थें ब्‍वय्‌कायंकीगु। जिगु सुरक्षा सुपाँय् थें मदयावनीगु। 
“आः जिगु प्राण जिगु दुने हे कम जुयाः वनाच्‍वंगु दु। सास्‍तीया दिनं जितः न्‍हियान्‍हिथं थःगु पन्‍जलय् ज्‍वंगु दु। 
चान्‍हय् जिगु फुक्‍क क्‍वँचय् च्‍वास्‍स मिंक सुइगु। जितः जूगु सास्‍ती दी हे मखु। 
तःधंगु शक्तिं परमेश्‍वरं जिगु वसः ज्‍वनादी। वय्‌कलं जिगु गतां ज्‍वनादी। 
परमेश्‍वर थःम्‍हं हे जितः ध्‍याचलय् वांछ्वयादीगु दु, जि धू व नौ थें जूगु दु। 
“हे परमेश्‍वर, जिं छितः बिन्‍ति याये, तर छिं लिसः बियादी मखु, जि छिगु न्‍ह्यःने दने तर छिं वास्‍ता हे यानामदी। 
छि जि प्रति निष्‍ठुर जुयादीगु दु, थःगु फुक्‍क शक्तिं जितः हमला यानाच्‍वनादीगु दु। 
छिं जितः ज्‍वनाः फय्‌या न्‍ह्यःने वान्‍छ्वयादी। छिं जितः ग्‍वःफसय् फुत्त वान्‍छ्वयादी। 
छिं जितः मृत्‍युया ल्‍हातय् लःल्‍हानादी धकाः जिं स्‍यू, फुक्‍क म्‍वाःपिं थ्‍यनेमाःगु थासय् थ्‍यंकादी। 
“दुःख जुयाः ग्‍वाहालि फ्‍वनीबलय् सुनानं मगाःमचाःम्‍ह मनूया विरोधय् थःगु ल्‍हाः ल्‍ह्वनी मखु। 
छु जि आपतय् लाःपिनिगु निंतिं मख्‍वया ला? छु गरीबतय्‌गु निंतिं जिगु नुगः मख्‍वः ला? 
जिं भिं जुइगु आशा यानागु खः, तर उकिया पलेसा मभिं वल। जःयागु आशा यानागु खः, तर खिउँगु वल। 
जिगु दुने हलचल जुयाच्‍वंगु दु, जिगु दुःखया दिं वये धुंकल। 
निभाः मदय्‌कः हे जिगु ख्‍वाः खिउँसे च्‍वनाः जि हाकुस्‍य च्‍वने धुंकल, ग्‍वाहालिया निंतिं बिन्‍ति यायेत जि सभाय् दनाच्‍वने। 
जि ध्‍वंचातय् किजा जूगु दु, न्‍हिकांझंगःत जि पासापिं जूगु दु। 
जिगु छेंगू हाकुयाः ब्‍वलावइ। ज्‍वर वयाः जिगु म्‍ह च्‍याःगु दु। 
जिगु वीणाया लय् मृत्‍युया म्‍ये जूगु दु, जिगु बाँसुरी धाःसा ख्‍वःपिनिगु सः थें जूगु दु।” 
