﻿अय्‍यूब.
29.
अय्‍यूबं थःगु खँ धया तुं च्‍वन। वं धाल, 
“जिगु अवस्‍था न्‍हापा परमेश्‍वरं जितः स्‍वयादीगु इलय् थें जूगु जूसा गुलि ज्‍यूगु। 
उबलय् वय्‌कःया मत जिगु छ्यंया च्‍वय् थीगु। जि खिउँगुलिइ थुखे उखे वनेबलय् वय्‌कलं जितः जः बियादीगु। 
उपिं जिगु दकलय् बांलाःगु दिं खः, उबलय् परमेश्‍वरया लिक्‍कया स्‍वापुं जिगु छेँयात सुवाः बीगु। 
उबलय् दक्‍व शक्ति दुम्‍ह परमेश्‍वर जिनापं दइगु, अले जिमि काय्‌म्‍ह्याय्‌पिं जिगु प्‍यखें दनाच्‍वनीगु। 
च्‍वलेचात व सातपाखें जिं यक्‍व दुरु दय्‌केगु, अले ल्‍वहंया ल्‍वहं जक दुगु थासय् नं जैतूनत बांलाक सयावइगु। 
“चुकय् च्‍वनेत जि शहरया मू ध्‍वाखां जुयावनेबलय् 
जि खनाः ल्‍याय्‌म्‍हपिं मनूतय्‌सं लँ त्‍वःताबीगु अले बुरापिं मनूत दनीगु। 
हाकिमतय्‌सं नवाय्‌गु दीकीगु अले थःगु म्‍हुतुइ ल्‍हाः तइगु। 
भारदारतय्‌गु सः हे बन्‍द जुइगु, इमिगु मेचा थक्‍वय् प्‍यपुनीगु। 
जिं न्‍ववानागु न्‍यंपिन्‍सं जितः धन्‍य धाइगु, जितः खँक्‍वसिनं जिगु तारिफ याइगु। 
छाय्‌धाःसा ग्‍वाहालि फ्‍वनीबलय् गरीबतय्‌त अले हाःनाः मदुपिं बौ मदुपिन्‍त जिं बचय् याना। 
सीत्‍यंम्‍ह मनुखं जितः आशिष बीगु, अले जिं भाःत मदुम्‍हय्‌सित लय्‌लय्‌तातां म्‍ये हालीपिं यानाबीगु। 
जिं धार्मिकतायात वसः थें फिना, इन्‍साफयात जिं जिगु वसः व फेटा थें पुना। 
कांया लागि जि मिखा जुया, अले लंगराया लागि तुति। 
मगाःमचाःपिनिगु लागि जि अबु थें खः। जि मुद्दाय् म्‍हमस्‍यूम्‍ह मनूया पंलीगु। 
जि मभिंम्‍ह मनूया वाकुधीयात त्‍वःथुला बीगु, अले वयागु म्‍हुतुं जिं शिकारयात लाकाकायेगु। 
“जि यक्‍व म्‍वाइ, ‘अले याउँक छेँय् हे सी धकाः आशा यानागु। 
जिगु हा लःपाखे न्‍यनावनी अले चच्‍छि हे जिगु कचाय् सुतिलः च्‍वनी। 
जिगु महिमा जिके दुने न्‍ह्याबलें ताजा जुयाच्‍वनी, अले जिगु ल्‍हातय् धनु न्‍ह्याबलें न्‍हूगु जुयाच्‍वनी।’ 
“मनूतय्‌सं यक्‍व आशा यानाः जिगु खँ न्‍यनीगु, अले जिगु सल्‍लाहया निंतिं सुम्‍क पियाच्‍वनीगु। 
जिं न्‍ववाये धुंकाः इमिसं छुं खँ तनी मखु। जिगु खँ इमिगु नुगलय् वा वइबलय् बँ प्‍याथें प्‍याइगु। 
मनूतय्‌सं वा वइगु पियाच्‍वं थें जितः नं पियाच्‍वनीगु। बसन्‍तया इलय् वइगु वा थें इमिसं जिगु वचनयात त्‍वनीगु। 
जि मुसुहुं न्‍हिलेबलय् इमित साहस दइगु। जिगु चकंगु ख्‍वाः इमिगु लागिं मू वंगु जुइगु। 
जिं इमित लँ क्‍यनेगु अले इमि नायः जुयाच्‍वनीगु। जुजुं थः सेनायात लडाइँलय् यंकूगु थें जिं इमित यंकेगु। जिं नुगः मछिंकाच्‍वंपिन्‍त सान्‍त्‍वना बीगु।” 
