﻿अय्‍यूब.
26.
अले अय्‍यूबं लिसः बिल, 
“जि शक्ति मदुम्‍ह मनूयात छिं गय् यानाः ग्‍वाहालि यानादिल? जि बल मदुगु ल्‍हाः दुम्‍हय्‌सित छिं गय् यानाः बचय् यानादिल? 
जि बुद्धि मदुम्‍ह मनूयात छिं छु सल्‍लाह बियादिल? अले छिं गुगु तःधंगु दुग्‍यां क्‍यनादिल? 
थज्‍याःगु खँ ल्‍हायेत छितः सुनां ग्‍वाहालि यात? अले छिगु म्‍हुतुं सुयागु आत्‍मां न्‍ववात? 
“सीपिनिगु आत्‍मा लःया क्‍वय् थरथर खानाच्‍वंगु दु, अन च्‍वंपिं फुक्‍कसिगु आत्‍मा नं। 
मृतलोक परमेश्‍वरया न्‍ह्यःने नांगां जूगु दु, विनाशयाइगु थाय् ह्वातां जूगु दु। 
वय्‌कलं खालि थासय् उत्तरयागु आकाशयात चक्‍कंकादी, अले खालिगु थासय् पृथ्‍वीयात यख्‍खानादी। 
वय्‌कलं लःयात थःगु सुपाँचं भुनादी, अय्‌नं उकिया तौलं सुपाँय् तज्‍यानाः वइ मखु। 
थःगु सुपाँय् चक्‍कंकाः पुन्‍हिया तिमिलायात त्‍वपुयादी। 
वय्‌कलं लःयात अलग यानादीबलय् क्षितिज दय्‌कादिल, वय्‌कलं दिं व चाया दथुइ सिमाना तयादिल। 
वय्‌कलं ब्‍वःबीबलय् आकाशया जग थुरथुर खाइ, अले ग्‍यानाः थारान्‍हुइ। 
थःगु शक्तिं वय्‌कलं समुद्रयात शान्‍त यानादिल, अले थःगु दुग्‍यानं तःधिकःम्‍ह समुद्री जन्‍तुयात कुचा कुचा यानादिल। 
वय्‌कःया सासलं आकाश सफा जुल। सुल्‍ल न्‍ह्यानाच्‍वंम्‍ह सर्पयात वय्‌कःया ल्‍हातं सुयाबिल। 
थ्‍व ला वय्‌कःया शक्तिया छुमां जक खः, झीसं न्‍यनागु वय्‌कःया खुसखुस खँ ल्‍हाःगु सः जक खः। वय्‌कःया शक्ति दुगु हाःसः सुनां थुइके फइ?” 
