﻿अय्‍यूब.
16.
अले अय्‍यूबं लिसः बिल, 
“जिं थज्‍याःगु खँ यक्‍व न्‍यनागु दु। छिकपिं सकलें दुःखं जाःगु सान्‍त्‍वना बीपिं खः, 
छिकपिनिगु म्‍वाःमदुगु खँ गुबलें सिधइ मखु ला? छितः छुकिं दिक्‍क चाय्‌कल, मदिक्‍क जवाःसवाः यानाच्‍वन। 
जि छिगु थासय् दुगु जूसा जिं नं छिं थें हे खँ ल्‍हाये फइगु। छिगु विरोधय् बांलाक भाषण बियाः छिगुपाखे थःगु छ्यं संके फइगु। 
तर जिगु म्‍हुतुं छितः हःपाः बीगु, जिं न्‍ववानागु सान्‍त्‍वनाया वचनं छितः शान्‍ति दइगु। 
अय्‌नं जि न्‍ववात धाःसां, जिगु दुःखकष्‍ट कम जुइ मखु। जि सुम्‍क च्‍वंसां, जिगु सास्‍तीं जितः त्‍वःती मखु। 
तर हे परमेश्‍वर, छिं जितः त्‍यानुकादीगु दु। छिं जिगु फुक्‍क परिवारयात सखाप यानादीगु दु। 
छिं जितः चिनादीगु दु। अले थ्‍व खँ साक्षी जूगु दु। जि क्‍वँय् व छेंगू जक जूगु दु, थुकिं हे जिगु विरोधय् साक्षी बी। 
परमेश्‍वरं जितः घृणा यानादी अले तंम्‍वय् काचाकुचु यानादी, अले वय्‌कः जिगु विरोधय् वा किरिकिरि न्‍ह्ययादी। जिमि शत्रुं जितः तग्‍वः मिखां स्‍वइ। 
मनूतय्‌सं जितः हेस्‍याःगु दु, इमिसं जिगु न्‍यतालय् च्‍याराक्‍क दाःगु दु, इपिं जिगु प्‍यखेरं जिगु विरोधय् छप्‍पँ जूगु दु। 
परमेश्‍वरं जितः मभिंपिं मनूतय्‌गु ल्‍हातय् त्‍वःतादीगु दु, दुष्‍ट मनूतय्‌गु ल्‍हातय् वांछ्वयादीगु दु। 
जि ला याउँक च्‍वनाच्‍वनागु खः, तर वय्‌कलं जितः चुंचुं यानादिल, वय्‌कलं जितः ककु ज्‍वनाः कुचा कुचा यानादिल। वय्‌कलं जितः थःगु निशाना दय्‌कादीगु दु। 
वय्‌कःया धनुष वाण कय्‌किपिं जिगु प्‍यखेरं दु। दया मतसें वय्‌कलं जिगु जलासेँलय् प्‍वाः खनाबिल। वय्‌कलं जिगु खाइप्‍वः बँय् प्‍वंकादीगु दु। 
तःक्‍वः हे वय्‌कलं जितः घाःपाः यानादी। छम्‍ह बहादुर सिपाइँनं थें वय्‌कलं जितः हमला यानादिल। 
जिगु म्‍ह त्‍वपुयेत जिं भांग्रा सुया, जिगु थःगु कपाः धुलय् थुना। 
ख्‍वख्‍वं जिगु न्‍यताः ह्याउँसे च्‍वने धुंकल। जिगु मिखाया प्‍यखेरं तसकं खिउँसे च्‍वने धुंकल। 
अय्‌नं जिपाखें ल्‍वायेलीगु जूगु मदु। अय्‌नं जिगु प्रार्थनाय् दोष मदु। 
हे पृथ्‍वी, जिगु हियात त्‍वपुइ मते! अले जिगु बिन्‍ति गुबलें मदीमा! 
आः नं स्‍वर्गय् जिगु साक्षी दी। जिगु निंतिं लिसः बीत च्‍वय् छम्‍ह वकील तयार दु। 
जिगु लागिं धयाबीम्‍ह जिमि पासा दु, तर जिगु मिखां परमेश्‍वरया न्‍ह्यःने ख्‍वबि हाय्‌की, 
मनुखं थः पासाया निंतिं बिन्‍ति याःथें सीमानिम्‍ह मनूया निंतिं वं परमेश्‍वरयात बिन्‍ति याइ, 
जि आः यक्‍व म्‍वाइ मखुत। जि वने धुंकाः हाकनं लिहां वये मखुत।” 
