﻿अय्‍यूब.
10.
“जितः थःगु जीवन हे घच्‍चाये धुंकल। उकिं जिं थःगु दुःख पना मतसें प्‍वंके, जिं थःगु नुगःयागु पीर कने। 
जिं थः परमेश्‍वरयात धाये, जितः दोषी ठहरय् यानादी मते, तर जिगु छु दोष दु, जितः धयादिसँ। 
छि जितः अत्‍याचार यायेत लय्‌तायादी ला? छु छि थःगु फुक्‍क ल्‍हाःया ज्‍या, जितः हेला यानाः लय्‌तायादी ला? दुष्‍टतय्‌गु योजनाय् धाःसा छि न्‍हिलादी। 
छु छिगु मिखा नं मनूयागु मिखा थें खः ला? छु सीमानिम्‍ह मनुखं खं थें छिं नं खं ला? 
छु छिगु दिं सीमानिम्‍हय्‌सिगु दिं थें च्‍वं ला? छिगु दँ मनूयागु दँ थें च्‍वं ला? 
छिं जिके दोष मालादी अले जिगु पाप वात्तुवालाः स्‍वयादी, 
खःला जि छुं दोष मदुम्‍ह खः, अले छिगु ल्‍हातं सुनानं जितः बचय् याये फइ मखु धकाः छिं स्‍यू। 
छिगु हे ल्‍हातं जिगु आकार दय्‌कल अले जितः सृष्‍टि यानादिल। आः व हे ल्‍हातं जितः नाश यानादी ला? 
छिं जितः चायात थें आकार बियादीगु खँ लुमंकादिसँ। छिं जितः हाकनं धुलय् ल्‍वाकछ्यानादीगु ला? 
छु छिं जितः दुरु थें प्‍वंकादियागु मखु ला? धौ थें जितः धीचिंकादियागु मखु ला? 
हाकनं छिं जितः ला व छेंगू फिकादियागु मखु ला? अले क्‍वँय् व हिनुलिं थानाः जितः दय्‌कादियागु मखु ला? 
छिं जितः जीवन बियादिल, छिं जितः सदां दयाच्‍वनीगु दया यानादिल। अले छिं स्‍वयाच्‍वनादीगुलिं हे जिगु आत्‍मा बचय् जुयाच्‍वंगु दु। 
तर छिं सुनां मसीक जितः नाश यायेगु उपाय यानाच्‍वंगु दु धकाः जिं स्‍यू, थ्‍व छिगु मनय् दु धकाः जिं स्‍यू, 
जिं पाप यानागु जूसा छिं जितः स्‍वयाच्‍वनादीगु जुइगु अले जिगु दोषपाखें छिं जितः त्‍वःतामदीगु जुइगु। 
जि धात्‍थें हे दोषी खःसा जितः धिक्‍कार! जि धर्मीम्‍ह खःसां जिं थःगु छ्यं धस्‍वाके मफु, छाय्‌धाःसा जि लज्‍यां जाःगु दु अले जिगु सास्‍तीइ दुंगु दु। 
जिं थःगु छ्यं धस्‍वाकूसां सिंह थें छिं जितः शिकार यानादी। छिं जिगु विरोधय् थःगु तःधंगु शक्ति क्‍यनादी। 
छिं जिगु विरोधय् न्‍हूपिं साक्षीत हयादी, अले जिपाखे थःगु तं न्‍ह्यज्‍याकादी, छिकपिनि सेना लःबू थें जिथाय् वइगु। 
अथे खःसा छिं जितः छाय् मांया प्‍वाथं पिने हयादियागु? जि अन हे खतम जूगु जूसा अले सुनां जितः मखंगु जूसा ज्‍यूगु नि। 
जि द हे मदुगु जूसा ला ज्‍यूगु नि, अथवा मांया प्‍वाथं चिहानय् यंकूगु जूसा ला ज्‍यूगु नि। 
छु जिगु चिहाकःगु जीवन मफुत ला? जिपाखें फस्‍वयादिसँ, जितः भचा सां आराम दयेमा। 
जि तसकं खिउँगु गालय् वने न्‍ह्यः, हाकुगु किचःया देशं गुबलें लिहां मवये न्‍ह्यः, 
तसकं खिउँगु, जः नं खिउँगु थें च्‍वंगु हाकुगु किचः व गोलमालं जाःगु देशय् वने न्‍ह्यः।” 
