﻿अय्‍यूब.
7.
“पृथ्‍वीइ मनुखं तसकं थाकुक ज्‍या याये म्‍वा ला? वयागु दिंत ज्‍यालाय् ज्‍या याइपिं मनूतय्‌गु थें मच्‍वं ला? 
बहनिया सिचुगु किचः मालीम्‍ह दासं थें अथवा थःगु ज्‍यालाया निंतिं आय्‌बुइक पियाच्‍वनीम्‍ह च्‍यः थें। 
अथे हे लाला पतिकं जि सितिं वंक म्‍वानाच्‍वना, अले चच्‍छि चच्‍छिं जितः दुःखकष्‍ट जक जूगु दु। 
जि द्यनेत ग्‍वतुलेबलय् जिं बिचाः यायेगु, ‘जि गुबलय् दनेगु?’ तर चा ताहाकः जुयावनी, अले जि सुथय् तक उखेंथुखें फपुलाच्‍वनेगु। 
जिगु म्‍ह कि हे कि व घाःपुइंनं जाःगु दु, अले जिगु छेंगू तज्‍यानाः न्‍हि पिहांवयाच्‍वंगु दु। 
कापः थाइम्‍हय्‌सिगु थूचा स्‍वयाः याकनं जिगु दिंत ब्‍वांय् वनाच्‍वंगु दु, जिगु दिंत आशा मदय्‌क नाश जुइ। 
हे परमेश्‍वर, जिगु जीवन ला फय्‌यागु छम्‍हू सासः जक खः धकाः ताय्‌कादिसँ। जिं हाकनं भिंगु दिं खनी मखुत। 
आः जितः खंगु छिगु मिखां हाकनं जितः गुबलें खनी मखुत, छिं जितः मालादी, तर जि दइ मखु। 
गथे सुपाँय् छ्यालब्‍याल जुइ अले खने मदयावनी, अथे हे चिहानय् वनीपिं हाकनं गुबलें लिहां वइ मखु। 
व हाकनं गुबलें छेँय् लिहां वइ मखु, अले वयात म्‍हस्‍यूपिन्‍सं वयात ल्‍वःमंकी। 
अथे जुयाः जि सुम्‍क च्‍वने मखु, जि पीर दुगु मनं हाले, जिगु तं दुगु प्राणं उजुर याये। 
छु जि समुद्र खः ला? अथवा समुद्रयाम्‍ह ग्‍यानापुम्‍ह जन्‍तु खः ला? छाय् छिं जितः स्‍वयेत पिवाः तयादियागु? 
जिगु लासां जितः आराम बी, जिगु खातां जिगु दुःखयात कम यानाबी धकाः जिं बिचाः यायेबलय् 
छिं जितः म्‍हगसय् ख्‍यानादी, दर्शनतपाखें छिं जिगु सातु कयादी। 
उकिं जितः थ्‍व थःगु शरीरय् च्‍वनाच्‍वनेगु स्‍वयाः गःपः तिकाः सिनावनेगु हे यः। 
जिं जिगु जीवनयात घृणा याना, जितः म्‍वाये हे मंमदये धुंकल। जितः त्‍वःतादिसँ, छाय्‌धाःसा जिगु जीवनया छुं अर्थ मदु। 
मनू छु हे खः धकाः छिं वयात यक्‍वः महत्‍व बीत? मनू छु हे खः धकाः छिं वयागु वास्‍ता यायेत? 
मनू छु हे खः धकाः सुथ पतिकं छिं वयात जाँचय् यानादीत अथवा छकःपतिकं वयागु मन स्‍वयेत? 
छु छिं पलख नं जितः स्‍वयेगु त्‍वःतादी मखु ला? अथवा जितः याकःचा त्‍वःतादी मखु ला? 
हे मनूतय्‌त रक्षा यानादीम्‍ह, जिं पाप यानागु जूसां छिगु छु स्‍यन? छिं छाय् जितः ताकय् यानादियागु? छु जि छिगु निंतिं भार जुयागु दु ला? 
छिं छाय् जिगु अपराध माफ यानामदियागु अले जिगु पाप क्षमा यानामदियागु? आः जि याकनं हे चिहानय् थ्‍यनी। छिं जितः मालादीबलय् जि दइ हे मखु।” 
