﻿अय्‍यूब.
6.
अले अय्‍यूबं लिसः बिल, 
“जिगु मनयागु दुःख ताल्‍जुइ लने फःसा, अले जिगु फुक्‍क विपत्ति ताल्‍जुइ तये फःसा 
थ्‍व समुद्रया फि स्‍वयाः झ्‍यातुइगु, उकिं जिगु छाःगु वचनय् अजू चायादी मते। 
छाय्‌धाःसा दक्‍व शक्ति दुम्‍ह परमेश्‍वरयागु वाण जिगु दुने दु। जिगु आत्‍मां उमिगु बिख त्‍वनीगु, परमेश्‍वरयागु आतंक जिगु विरोधय् झ्‍वःलिंक दनाच्‍वंगु दु। 
छु गुँगधा घाँय् दइबलय् हाली ला? अथवा छ्वालि दइबलय् द्वहं हाली ला? 
छुं सवाः मदुगु नसा चि मदय्‌क नइ ला? छु खेँय्‌यागु तुयुगु भागय् छुं सवाः दइ ला? 
जितः नये मास्‍ति वःसां जितः व थी तक नं मयः, थज्‍याःगु नसां जितः बिरामी याइ। 
हाय, जिं परमेश्‍वरयात बिन्‍ति यानागु खँ दुगु जूसा ला ज्‍यूगु नि। जिं आशा यानागु खँ परमेश्‍वरं पूरा यानादीगु जूसा ला ज्‍यूगु नि। 
परमेश्‍वरं जितः चुंचुं याये मास्‍ति वय्‌कादीसा ला ज्‍यूगु नि। वय्‌कलं थःगु ल्‍हाः ल्‍ह्वनाः जितः खतम याःगु जूसा ला ज्‍यूगु नि। 
अथे जूगु जूसा जितः ला याउँसे च्‍वनीगु। सास्‍ती जूबलय् नं जि लय्‌तायाः तिंन्‍हुयेगु, छाय्‌धाःसा पवित्रम्‍हय्‌सिगु वचनयात जिं अस्‍वीकार यानागु मदु। 
सहः यायेत जिके छु हे बल दु धकाः? म्‍वानाच्‍वनेत जिके छु हे आशा दु धकाः? 
छु जिगु बल ल्‍वहंयागु थें च्‍वं ला? अथवा जिगु म्‍ह कँय्‌यागु खः ला? 
छु जिके थःत ग्‍वाहालि यायेगु बल दु ला? छु बुद्धि जिपाखें तापानावंगु मदु ला? 
दक्‍व शक्ति दुम्‍ह परमेश्‍वरया भय त्‍वःतूसां नुगः क्‍वतुंम्‍ह मनूयात पासापिनिगु माया दयेमाःगु खः। 
जिमि किजापिं बर्खाबलय्‌यागु खुसिचात थें भर काये मज्‍यूपिं जुल। न्‍ह्याना वनीगु खुसिचा थें। 
गुबलें गुबलें बरफ नायाः वंगु थें अथवा च्‍वापु नायाः खुसिबाः वःगु थें। 
ताःन्‍वइबलय् खुसिचात तनावनी। छाःगु निभाः लाइबलय् उपिं थःगु थासं मदयावनी। 
बन्‍जाःतय्‌गु पुचः थःगु लँ त्‍वःताः छखेपाखे वनी, इपिं मरुभूमिइ वनी, अन त्‍वनेत छुं दइ मखु, उकिं इपिं सी। 
मेथाय् वनाच्‍वंपिं तेमायापिं बन्‍जाःतय्‌गु पुचलं लः मालि। शेबायापिं लँजुवाःतय्‌सं लः लुइ धकाः आशा यानाः लः मालि। 
इपिं मछाल छाय्‌धाःसा इपिं लः दइ धकाः ढुक्‍क जूगु खः। अन निराश जुइत जक इपिं अन थ्‍यनी। 
धात्‍थें छिकपिं नं आः ग्‍वाहालि मदुगु उपिं खुसिचा थें हे जुइ धुंकल, छिकपिन्‍सं ग्‍यानापुगु छुं खनादिल अले ग्‍यात। 
जितः छुं ब्‍यु अथवा थःगु सम्‍पत्तिं जितः त्‍वःतकेत ध्‍यबा पुलाब्‍यु धकाः जिं धयागु दु ला? 
अथवा जितः शत्रुतय्‌गु ल्‍हातं बचय् यानादिसँ, दया मदुपिनिगु ल्‍हातं जितः त्‍वःतकादिसँ धकाः जिं गुबलें धयागु दु ला? 
जितः थुइकादिसँ अले जि सुम्‍क च्‍वने, जिं गन द्वंकल, जितः धयादिसँ। 
खःगु वचन गुलि स्‍याःचाइगु जुइ, तर छिगु जवाःसवालं छु फाइदा जुल? 
छु छिकपिन्‍त जिगु खँयात भिंके मास्‍ति वः ला? नुगः क्‍वतुंम्‍ह मनूया वचनयात फय् थें ताय्‌कादीया ला? 
छिकपिन्‍सं ला मांबौ मदुपिनिगु लागि चिट्ठा तयादी, थः पासापिन्‍त तकं हिलादी। 
तर आः जितः दया यानादिसँ अले फहिला जिपाखे स्‍वयादिसँ। छु जि छिकपिनि न्‍ह्यःने मखुगु खँ ल्‍हाइम्‍ह थें च्‍वं ला? 
नरम जुयादिसँ, जितः मेगु अन्‍याय यानादी मते, हाकनं बिचाः यानादिसँ, छाय्‌धाःसा जिं छुं बांमलाःगु ज्‍या यानागु मदु। 
जिं मखुगु खँ ल्‍हानाच्‍वंगु धकाः च्‍वना ला? खःगु खँ व मखुगु खँया दथुइ छु पाः व जिं छुतय् याये मफु ला?” 
