﻿नहेम्‍याह.
8.
अबलय् इपिं सकल मनूत छप्‍पँ जुयाः लः ध्‍वाखाया न्‍ह्यःनेया चुकय् मुन। अले इमिसं परमप्रभुं इस्राएलीतय्‌त बियादीगु मोशाया व्‍यवस्‍थायागु सफू हयेत शास्‍त्री पुजाहारी एज्रायात इनाप यात। 
उकिं न्‍हय्‌गूगु लाया न्‍हापांगु दिंखुन्‍हु एज्रां मनूत मुंगु थासय् व्‍यवस्‍थाया सफू हल। अन मिसा मिजं व न्‍यनाः थुइके फुगु उमेर जुइ धुंकूपिं सकल मनूत दु। 
ध्‍वाखाया दुने लाःगु चुकय् सुथंनिसें बहनि तक एज्रां तःसलं व्‍यवस्‍था ब्‍वनाः न्‍यंकल अले मनूतय्‌सं न्‍हाय्‌पं बियाः न्‍यन। 
एज्रा थज्‍याःगु हे ज्‍याया निंतिं हे दय्‌कूगु छगू सिँयागु दबुलिइ दन। वयागु जवपाखे मत्तित्‍याह, शेमा, अनायाह, उरियाह, हिल्‍कियाह व मासेयाह दनाच्‍वंगु दु। वयागु खवपाखे पदायाह, मीशाएल, मल्‍कियाह, हाशूम, हशबदाना, जकरिया व मशुल्‍लाम दनाच्‍वंगु दु। 
अले दबुलिइ दनाच्‍वंम्‍ह एज्रां फुक्‍क मनूतय्‌सं खंक व्‍यवस्‍थाया सफू पुइकल। वं सफू पुइकेवं मनूत दन। 
एज्रां परमप्रभु दकलय् तःधंम्‍ह परमेश्‍वयात प्रशंसा यात। अले सकल मनूतय्‌सं थथःगु ल्‍हाः ल्‍ह्वनाः थथे धकाः लिसः बिल, “आमेन, आमेन!” अले बँय् तक छ्यं क्‍वछुकाः इमिसं परमप्रभुयात आराधना यात। 
लेवीत, येशूअ, बानी, शरेबियाह, यामीन, अक्‍कूब, सब्‍बतै, होदियाह, मासेयाह, कलीता, अजर्याह, योजावाद, हानान व पलयाहं मनूतय्‌त थथःगु थासय् दनाच्‍वंबलय् हे व्‍यवस्‍था थुइकाबिल। 
इमिसं परमेश्‍वरया व्‍यवस्‍थाया सफू बांलाक ब्‍वनाः उकियागु अर्थ मनूतय्‌सं थुइके फय्‌क कनाबिल। 
थथे व्‍यवस्‍थाया वचन न्‍यनाः सकलें मनूत ख्‍वयाच्‍वंगुलिं राज्‍यपाल नहेम्‍याह, शास्‍त्री पुजाहारी एज्रा व मनूतय्‌त स्‍यनाच्‍वंपिं लेवीतय्‌सं इपिं सकसितं धाल, “थौंया दिं परमप्रभु छिमि परमेश्‍वरया निंतिं पवित्र जू। उकिं ख्‍वये मते, हाले मते।” 
नहेम्‍याहं इमित धाल, “आः छेँ वनाः भिंगु नसा व साःगु दाखमद्यनापं भ्‍वय् न हुँ। थःगु निंतिं भ्‍वय् ज्‍वरय् याये मफुपिन्‍त नं ब्‍व छ्वयाब्‍यु। थौंया दिं झी प्रभुया निंतिं पवित्र जू। नुगः मछिंके मते, परमप्रभुयागु लसता हे छिमिगु बल खः।” 
लेवीतय्‌सं थथे धयाः मनूतय्‌त सुम्‍क तल, “सुम्‍क च्‍वँ, थौंया दिं पवित्र दिं खः, नुगः मछिंके मते।” 
अले सकल इस्राएलीत छेँ वनाः न्‍ह्यइपुइकाः भ्‍वय् नल। थःके दुगु नसा मेपिन्‍त इनाबिल, छाय्‌धाःसा व्‍यवस्‍थाया सफुतिं ब्‍वनाः न्‍यंकूगु खँ इमिसं बांलाक थुल। 
न्‍हय्‌गूगु लाया निन्‍हु खुन्‍हु सकल मनूतय् परिवार परिवारया नायःत, पुजाहारीत व लेवीत व्‍यवस्‍थाया वचन बांलाक थुइकेत एज्रायाथाय् मुन। 
इस्राएलीत न्‍हय्‌गूगु लाया नखःबलय् बल्‍चाय् च्‍वनेगु यायेमाः धकाः परमप्रभुं मोशापाखें आज्ञा बियादीगु खँ व्‍यवस्‍थाय् च्‍वयातःगु इमिसं खंकल। 
अले इमिसं थथःगु शहरय् व यरूशलेमय् थज्‍याःगु बुखँ छ्वल, “व्‍यवस्‍थाय् च्‍वया तः थें पहाडय् हुँ, जैतून, थकुराः, मेहदी, ताय्‌गः सिमा व मेमेगु यक्‍व हः दुगु सिमाया कचामचा कयाहयाः बल्‍चा दय्‌कि।” 
उकिं मनूत वनाः सिमाया कचामचा कयाहल। अले इमिसं छेँया कःसिइ, चुकय्, परमेश्‍वरया देगःया चुकय्, लः ध्‍वाखाया चुकय् व एफ्राइम ध्‍वाखाया चुकय् थथःगु लागिं बल्‍चा दय्‌कल। 
बेबिलोनं लिहांवःपिं सकसिनं बल्‍चात दय्‌काः उकी च्‍वन। धात्‍थें नूनया काय् यहोशू इस्राएलया नायः जूबलय् निसें कयाः थुबलय् तक इस्राएलीतय्‌सं गुबलय् नं थुकथं न्‍ह्यइपुइकाः बल्‍चाबाय्‌या नखः हंगु मदुनि। 
न्‍हियान्‍हिथं न्‍हापांगु दिनंनिसें लिपांगु दिं तक एज्रां परमेश्‍वरया व्‍यवस्‍थाया सफुतिं ब्‍वनाः न्‍यंकल। इमिसं न्‍हय्‌न्‍हु तक नखः हन अले च्‍यान्‍हु खुन्‍हु नियमकथं सभा जुल। 
