﻿नहेम्‍याह.
7.
पखाः दय्‌केगु ज्‍या सिधये धुंकाः जिं थाय् थासय् लुखा तया। अले देगलय् पिवाः च्‍वनीपिं मनूत, म्‍ये हालीपिं मनूत व लेवीत ल्‍यया। 
जिं जिमि किजा हनानीनापं किल्‍लाया कप्‍तान हनन्‍याहयात यरूशलेमय् शासन यायेगु जिम्‍मा बिया। व मेपिं मनूत स्‍वयाः तसकं विश्‍वास याये बहःम्‍ह व परमेश्‍वरया ग्‍याःभय काइम्‍ह खः। 
जिं इमित धया, “बांलाक निभाः मत्‍वतले यरूशलेमया ध्‍वाखात चाय्‌के मते। ध्‍वाखाय् पिवाः च्‍वनीपिं मनूत ज्‍याय् दुबलय् हे लुखा तिनाः चुकू तयाब्‍यु। यरूशलेमय् च्‍वंपिं छुं मनूत ल्‍य, इमित शहरया रक्षा यायेत थाय् थासय् ति। अले छुं मनूतय्‌त इमिगु छेँया न्‍ह्यःने पिवाः ति।” 
शहर तःधं अले थाय् यक्‍व दु। मनूत धाःसा कम अले आः तक नं छेँ मदय्‌कानी। 
उकिं भारदारत, हाकिमत व मनूतय्‌त, परिवार परिवार यानाः धलखय् नां च्‍वयेगु निंतिं मुंकेत जिमि परमेश्‍वरं जितः हःपाः बियादिल। जिं दकलय् न्‍हापा लिहां वःपिनिगु वंशावली लुइका। उकी थथे च्‍वयातःगु जिं खना। 
बेबिलोनयाम्‍ह जुजु नबूकदनेसरं ज्‍वनायंकूपिं थ्‍व प्रान्‍तयापिं मनूत मध्‍ये अनं यरूशलेम व यहूदाय् थथःगु शहरय् लिहांवःपिं मनूत थुपिं हे खः। 
इमि नायःपिं यरूबाबेल, येशूअ, नहेम्‍याह, अजर्याह, राम्‍याह, नहमानी, मोर्दकै, बिल्‍शान, मिसपेरेत, बिग्‍वै, नेहूम व बानाह खः। 
लिहांवःपिं इस्राएली मिजंतय्‌गु नां धलः व ल्‍याः थथे दु – परोशया सन्‍तान २,१७२ म्‍ह 
शपत्‍याहया सन्‍तान ३७२ म्‍ह 
आराया सन्‍तान ६५२ म्‍ह 
येशूअ व योआबया घरानापाखें पहत-मोआबया सन्‍तान २,८१८ म्‍ह 
एलामया सन्‍तान १,२५४ म्‍ह 
जत्तूया सन्‍तान ८४५ म्‍ह 
जक्‍कैया सन्‍तान ७६० म्‍ह 
बिन्‍नूईया सन्‍तान ६४८ म्‍ह 
बेबैया सन्‍तान ६२८ म्‍ह 
अज्‍गादया सन्‍तान २,३२२ म्‍ह 
अदोनीकामया सन्‍तान ६६७ म्‍ह 
बिग्‍वैया सन्‍तान २,०६७ म्‍ह 
आदीनया सन्‍तान ६५५ म्‍ह 
हिजकियापाखें आतेरया सन्‍तान ९८ म्‍ह 
हाशूमया सन्‍तान ३२८ म्‍ह 
बेजैया सन्‍तान ३२४ म्‍ह 
हारीपया सन्‍तान ११२ म्‍ह 
गिबोनया सन्‍तान ९५ म्‍ह 
बेथलेहेम व नतोपायापिं मनूत १८८ म्‍ह 
अनातोतयापिं मनूत १२८ म्‍ह 
बेथ-अज्‍मावेतयापिं मनूत ४२ म्‍ह 
किर्यत-यारीम, कपीरा व बेरोतयापिं मनूत ७४३ म्‍ह 
रामा व गेबायापिं मनूत ६२१ म्‍ह 
मिकमाशयापिं मनूत १२२ म्‍ह 
बेथेल व ऐयापिं मनूत १२३ म्‍ह 
मेगु नेबोयापिं मनूत ५२ म्‍ह 
मेगु एलामयापिं मनूत १,२५४ म्‍ह 
हारीमयापिं मनूत ३२० म्‍ह 
यरीहोयापिं मनूत ३४५ म्‍ह 
लोद, हादीद व ओनोयापिं मनूत ७२१ म्‍ह 
सेनाहयापिं मनूत ३,९३० म्‍ह 
पुजाहारीत– येशूअया परिवारपाखें यदायाहया सन्‍तान ९७३ म्‍ह 
इम्‍मेरया सन्‍तान १,०५२ म्‍ह 
पशहूरया सन्‍तान १,२४७ म्‍ह 
हारीमया सन्‍तान १,०१७ म्‍ह 
लेवीत- होदबिया व कादमीएलया वंशपाखें येशूअया सन्‍तान ७४ म्‍ह 
म्‍ये हालीपिं – आसापया सन्‍तान १४८ म्‍ह 
देगःया पिवाः च्‍वनिपिं – शल्‍लूम, आतेर, तल्‍मोन, अक्‍कूब, हतीता व शोबैया सन्‍तान मुक्‍कं १३८ म्‍ह 
देगलय् सेवा याइपिं- सीहा, हसूपा व तब्‍बाओत, 
कोरेस, सीआ, पादोन, 
लेबाना, हगाबा, शल्‍मै, 
हानान, गिद्देल, गहर, 
रायाह, रसीन, नकोदा, 
गज्‍जाम, उज्‍जा, पसेह, 
बेजै, मोनिम, नेपुसीम, 
बक्‍बूक, हकूपा, हर्हुर, 
बस्‍लूत, महीदा, हर्शा, 
बर्कोस, सीसरा, तेमह, 
नसीह, व हतीपाया सन्‍तान 
सोलोमनया च्‍यःतय् सन्‍तान – सोतै, सोपेरेत, पारीद, 
याला, दर्कोन, गिद्देल, 
शपत्‍याह, हत्तील, पोकेरेत-हसेबायीम व अमोनया सन्‍तान 
देगलय् सेवा याइपिं व सोलोमनया च्‍यःतय् सन्‍तानया ल्‍याः मुक्‍क ३९२ म्‍ह 
थुपिं मनूत तेल-मेलह, तेल-हर्शा, केरूब, आदोन व इम्‍मेरं यरूशलेमय् वःगु खः। अय्‌नं इमिसं इमि परिवार इस्राएलीत खः धकाः दसि बी मफुत। 
थ्‍व पुचलय् दलायाह, तोबिया, व नकोदाया सन्‍तान दुथ्‍या इपिं मुक्‍क ६४२ म्‍ह 
अले पुजाहारीत मध्‍ये होबायाहया सन्‍तान, हक्‍कोसया सन्‍तान व बर्जिल्‍लैया सन्‍तान नं लिहां वःगु खः। थ्‍व बर्जिल्‍लैं गिलादी बर्जिल्‍लैया छम्‍ह म्‍ह्याय्‌लिसें ब्‍याहा यानाः वयागु हे नां तःगु खः। 
इमिसं वंशावलीइ थथःपिनिगु नां माल अय्‌नं लुइके मफुत, उकिं इमित अशुद्ध मानय् यानाः पुजाहारीया ज्‍यां लिकाल। 
उकिं राज्‍यपालं दकलय् तःधंम्‍ह पुजाहारीं “ऊरीम” व “तुम्‍मीम” छ्यलाः परमप्रभुयाके छु यायेगु धकाः मन्‍यंतले इमित तसकं पवित्र नसा छुं नं नये मते धकाः धाल। 
यहूदाय् लिहांवःपिं मनूतय्‌गु ल्‍याः ४२,३६० म्‍ह दु। 
थुमित त्‍वःता इमि ७,३३७ म्‍ह दासदासीत व म्‍ये हालीपिं २४५ म्‍ह मिसा व मिजं दु। 
इमिके ७३६ म्‍ह सल, २४५ म्‍ह खच्‍चर, 
४३५ म्‍ह ऊँट व ६,७२० म्‍ह गधा दु। 
अले छुं परिवारयापिं नायःतय्‌सं ज्‍याया निंतिं देछा बिल। राज्‍यपालं धुकुतिइ ८.५ किलोग्राम ति लुँ, ५० गः ख्‍वल्‍चा व पुजाहारीतय्‌सं फीगु ५३० ज्‍वः वसः बिल। 
परिवारयापिं मेपिं नायःतय्‌सं ज्‍याया निंतिं धुकुतिइ १७० किलोग्राम ति लुँ व १,२५० किलोग्राम ति वहः बिल। 
मेपिं मनूतय्‌सं १७० किलोग्राम ति लुँ, १,१०० किलोग्राम ति वहः व पुजाहारीतय्‌सं फीगु ६७ ज्‍वः वसः बिल। 
पुजाहारीत, लेवीत, म्‍ये हालीपिं, देगलय् पिवाः च्‍वनिपिं व देगलय् सेवा याइपिं थथःगु शहरय् मेपिं मनूतलिसें च्‍वन। अले इस्राएलया मेपिं मनूत इमिगु थथःगु शहरय् च्‍वन। न्‍हय्‌गूगु ला क्‍यंबलय् सकल इस्राएलीत थथःगु गामय् च्‍वने धुंकूगु खः। 
