﻿एज्रा.
7.
यक्‍व दँ लिपा, फारसयाम्‍ह जुजु अर्तासास्‍तया पालय् एज्रा नांयाम्‍ह छम्‍ह मनू दु। एज्रा सरायाहया काय् खः। सरायाह अजर्याहया काय् खः। अजर्याह हिल्‍कियाहया काय् खः। 
हिल्‍कियाह शल्‍लूमया काय् खः। शल्‍लूम सादोकया काय् खः। सादोक अहीतूबया काय् खः। 
अहीतूब अमर्याहया काय् खः। अमर्याह अजर्याहया काय् खः। अजर्याह मरायोतया काय् खः। 
मरायोत जरयाहया काय् खः। जरयाह उज्‍जीया काय् खः। उज्‍जी बुक्‍कीया काय् खः। 
बुक्‍की अबीशूया काय् खः। अबीशू पीनहासया काय् खः। पीनहास एलाजारया काय् खः। एलाजार दकलय् तःधंम्‍ह पुजाहारी हारूनया काय् खः। 
एज्रा परमप्रभु इस्राएलयाम्‍ह परमेश्‍वरं मोशायात ब्‍यूगु व्‍यवस्‍था बांलाक स्‍यनेसःम्‍ह शास्‍त्री खः। वयात परमप्रभु परमेश्‍वरया सुवाः दुगुलिं वं फ्‍वंगु फुक्‍क खँ जुजुं वयात बिल। थथे जूगुलिं एज्रा बेबिलोनं यरूशलेमय् वल। 
जुजु अर्तासास्‍तया न्‍हय्‌गूगु दँय् छपुचः इस्राएलीत बेबिलोनं यरूशलेमय् वल। उगु पुचलय् पुजाहारीत, लेवीत, देगलय् म्‍ये हालीपिं व देगलय् पिवाः च्‍वनिपिं व देगलय् सेवा याइपिं नं दुथ्‍याः। 
व हे जुजुया न्‍हय्‌गूगु दँया न्‍यागूगु लाय् एज्रा यरूशलेमय् थ्‍यंकः वल। 
न्‍हापांगु लाया न्‍हापांगु न्‍हिखुन्‍हु व बेबिलोनं पिहां वःगु खः। अले परमेश्‍वरया ग्‍वाहालिं न्‍यागूगु लाया न्‍हापांगु दिंखुन्‍हु यरूशलेमय् थ्‍यंकः वल। 
छाय्‌धाःसा एज्रां थःत परमप्रभुयागु व्‍यवस्‍था ब्‍वनेत व पालन यायेत अले थुकियागु विधि व नियम इस्राएलय् स्‍यनेत देछाःगु खः। 
परमप्रभुं इस्राएलयात बियादीगु व्‍यवस्‍था व उजं बांलाक स्‍यूम्‍ह पुजाहारी व शास्‍त्री एज्रायात जुजु अर्तासास्‍तं थथे च्‍वयातःगु अधिकार पौ बिल – 
जुजुतय् नं जुजु अर्तासास्‍तपाखें, स्‍वर्गयाम्‍ह परमेश्‍वरयागु व्‍यवस्‍थाया शास्‍त्री पुजाहारी एज्रायात ज्‍वजलपा! 
जिगु साम्राज्‍य दुने च्‍वंपिं सुं नं मनू, पुजाहारी व लेवी यरूशलेमय् वने न्‍ह्याःसा छनापं वने फु धकाः जिं आज्ञा बी। 
एज्रा, जि व जिमि न्‍हय्‌म्‍ह सल्‍लाह बीपिन्‍सं छन्‍त यहूदा व यरूशलेमय् छ्वयाच्‍वनागु दु। छं अन छिमित पालन यायेत ब्‍यूगु परमेश्‍वरयागु व्‍यवस्‍था बांलाक मानय् याःगु दु कि मदु? अले अनयागु हालत गय् गथे च्‍वं व स्‍व। 
जिं व जिमि सल्‍लाह बीपिन्‍सं यरूशलेमय् च्‍वनादीम्‍ह इस्राएलया परमेश्‍वरयात थःगु इच्‍छां बियागु लुँ व वहः नं छं यंकि। 
छिमिसं फुक्‍क बेबिलोन प्रान्‍तय् मुनेत्‍यंगु लुँ व वहः अले मनूतय्‌सं व पुजाहारीतय्‌सं यरूशलेमय् इमि परमेश्‍वरया देगःया निंतिं थःगु इच्‍छां देछाःगु नं छं यंकि। 
थ्‍व धिबां द्वहंत, भ्‍याःचात, चिधिकःपिं भ्‍याःचात अले उपिंनापं अन्‍नबलि व त्‍वँसा-बलिया सामान न्‍या, अले उमित यरूशलेमय् दुगु छिमि परमेश्‍वरया देगःया वेदीइ बलि छा। 
ल्‍यं दुगु वहः व लुँ छ व छिमि यहूदी दाजुकिजापिन्‍सं थःगु इच्‍छा कथं छ्यले फु अय्‌नं व परमेश्‍वरया इच्‍छा कथं जुइमाः। 
“छिमि परमेश्‍वरया देगलय् सेवा यायेत छंगु जिम्‍माय् ब्‍यूगु फुक्‍क थलबल यरूशलेमया परमेश्‍वरयात लःल्‍हानाब्‍यु। 
छिमि परमेश्‍वरया देगःया निंतिं मेगु छुं माःसा जुजुया धुकुतिं यंकि। 
“यूफ्रेटिसया पच्‍छिमयागु प्रान्‍तयापिं सकल दांभरितय्‌त जिं थ्‍व उजं बी – स्‍वर्गयाम्‍ह परमेश्‍वरयागु व्‍यवस्‍थाया शास्‍त्री पुजाहारी एज्रां फ्‍वंगु न्‍ह्यागु नं ज्‍वरय् यानाः ब्‍यु, 
वहः ३,४०० किलोग्राम तक, छ्व १०,००० किलोग्राम तक, दाखमद्य २,००० लिटर तक, जैतूनया चिकं २,००० लिटर तक अले माक्‍व चि वयात ब्‍यु। 
स्‍वर्गयाम्‍ह परमेश्‍वरयात वय्‌कःया देगःया निंतिं माःगु फुक्‍क छिमिसं बांलाक ब्‍यु। मखुसा जि व जिमि काय्‌पिन्‍के परमेश्‍वरया तं लाइ। 
पुजाहारीत, लेवीत, म्‍ये हालीपिं, ध्‍वाखाय् पिवाः च्‍वनिपिं, देगलय् सेवा याइपिं वा परमेश्‍वरया थ्‍व देगःयागु मेमेगु ज्‍या याइपिन्‍के सरकारी कर वा महसूल कायेगु छिपिं छ्यान्‍जेतय्‌त अधिकार मदु धकाः छिमिसं सीकि। 
“छ एज्रां धाःसा छंके दुगु छिमि परमेश्‍वरयागु बुद्धिकथं यूफ्रेटिसया पच्‍छिमयागु प्रान्‍तयापिं छिमि परमेश्‍वरयागु व्‍यवस्‍था पालन यानाः न्‍याय याइपिं मनूत व हाकिमत ल्‍य। व्‍यवस्‍था मस्‍यूपिन्‍त धाःसा छं स्‍यँ। 
छिमि परमेश्‍वरयागु व्‍यवस्‍था व जुजुयागु कानून पालन मयाइपिं न्‍ह्याम्‍ह हे जूसां वयात स्‍यानाछ्वयाः वा देशं पितिनाछ्वयाः वा धन-सम्‍पत्ति जफत यानाः वा कुनाः सजाँय बीमाः।” 
परमप्रभु झी पुर्खातय् परमेश्‍वर धन्‍य खः। वय्‌कलं हे यरूशलेमय् दुगु परमप्रभुया देगःयात हनाबना तयेत जुजुयागु मनय् थ्‍व बिचाः तयादिल, 
अले जुजु, वयात सल्‍लाहबीपिं व जुजुया ततःधंपिं भारदारतय्‌त जितः सदां दइगु दयामाया याइपिं दय्‌कादिल। उकिं परमप्रभु जिमि परमेश्‍वरयागु ल्‍हाः जिके दु धकाः सीकाः जिं साहस याना, अले जिनापं यरूशलेमय् थाहां वनेत इस्राएलयापिं नायःत मुंका। 
