﻿एज्रा.
6.
अले जुजु दारायागु आज्ञा कथं बेबिलोनयागु धुकुतिइ तयातःगु पुलांगु भ्‍वंत पुइका स्‍वल। 
मादी प्रान्‍तया एक्‍बातना शहरय् थथे च्‍वयातःगु छगू भ्‍वँ लुल। उकी च्‍वयातःगु लुमन्‍ति पौ थथे दु – 
“कोरेस जुजुयागु न्‍हापांगु दँय् यरूशलेमया देगःया बारे जुजुं छगू आज्ञा-पौ पिकाल। “आज्ञा थ्‍व खः - बां बीत व होमबलि छायेत यरूशलेमया देगः व न्‍हापा दुथाय् हे हाकनं दय्‌केमाः, अले थुकियागु जग न्‍हापायागु थासय् हे तयेमाः। थ्‍व स्‍विगू मिटर तःजाःगु व स्‍विगू मिटर ब्‍या दुगु जुइमाः। 
ततःग्‍वःगु ल्‍वहंया स्‍वँगू तँ द्यःने छगू तँ सिँ तयेमाः। थुकी जूगु खर्च जुजुया धुकुतिं पुलेमाः। 
नबूकदनेसरं यरूशलेमया देगलं बेबिलोनय् हःगु परमेश्‍वरया भवनया लुँ व वहःयागु थलबल नं लितयंकाः यरूशलेमयागु देगलय् तयाबीमाः। व फुक्‍क लितयंकाः परमेश्‍वरया भवनय् थथःगु थासय् तयाबीमाः।” 
उकिं आः पच्‍छिम यूफ्रेटिसयाम्‍ह राज्‍यपाल तत्तनै, शत्तर-बोज्‍नै व प्रान्‍तय् दुपिं छिपिंनापं ज्‍या याइपिं मनूत व देगलं तापाक च्‍वँ। 
छिमिसं देगः दय्‌काच्‍वंगु ज्‍या पने मते। यहूदायाम्‍ह राज्‍यपाल व यहूदी नायःतय्‌सं परमेश्‍वरयागु देगः उकियागु थासय् हे हाकनं दय्‌केमाः। 
व ज्‍याय् इमित ग्‍वाहालि ब्‍यु धकाः जिं छिमित आज्ञा बी। इमिगु खर्च पच्‍छिम यूफ्रेटिस प्रदेशय् मुंगु करं थत्‍थें ब्‍यु, ज्‍या मदीमाः। 
“न्‍हियान्‍हिथं यरूशलेमय् पुजाहारीतय्‌सं छु छु माल धकाः धाइ व फुक्‍कं ब्‍यु। इमित स्‍वर्गयाम्‍ह परमेश्‍वरयात होमबलि छायेत द्वहंत, भ्‍याःचात व चिधिकःम्‍ह भ्‍याःचात अले छ्व, चि, दाखमद्य व जैतूनया चिकं मद्वंक ब्‍यु। 
इमिसं स्‍वर्गयाम्‍ह परमेश्‍वर लय्‌ताइगु बलित छायेमा अले जुजु व जुजुया काय्‌पिनिगु भिंया निंतिं प्रार्थना यायेमा धकाः छिमिसं अथे या। 
“उलि जक मखु सुनां थ्‍व आज्ञा पालन याइ मखु वयागु छेँयागु थां लिकयाः वयात उकिं हे सुया यख्‍खानाब्‍यु धकाः जिं आज्ञा बी। थ्‍व अपराधया निंतिं वयागु छेँयात थुनाः द्वँ दय्‌काब्‍यु। 
यरूशलेमया देगःयात नाश यायेत वा थ्‍व आज्ञायात हीकेत सुं नं जुजुं वा जातिं ल्‍हाः ल्‍ह्वन धाःसा थःगु नांयात अन थापं यानादीम्‍ह परमेश्‍वरं हे इमित नाश यानादीमाः। “जि दारां थ्‍व आज्ञा पिकयागु दु। थुकियात बांलाक मानय् यायेमाः।” 
अथे जुयाः यूफ्रेटिस पारियाम्‍ह राज्‍यपाल तत्तनै अले शत्तर-बोज्‍नै व इपिंनापं ज्‍या याइपिन्‍सं दाराया आज्ञा बांलाक मानय् यात। 
उकिं यहूदीतय् नायःतय्‌सं अगमवक्ता हाग्‍गै व इद्दोया सन्‍तान जकरियापाखें हपाः दयाः ज्‍या बांलाक न्‍ह्यज्‍याकल। इमिसं परमेश्‍वरया आज्ञा कथं अले फारसयापिं जुजुपिं कोरेस, दारा व अर्तासास्‍तपिनिगु आज्ञा कथं देगः दय्‌केगु ज्‍या सिधय्‌कल। 
दारा जुजुं शासनयागु खुगूगु दँयागु अदार लाया स्‍वन्‍हु खुन्‍हु देगःया ज्‍या सिधल। 
उबलय् इस्राएलयापिं मनूत – पुजाहारीत, लेवीत व ज्‍वनायंकाः लित छ्वयाहःपिं मेपिं, सकसिनं लय्‌लय्‌तातां नखः हनाः देगः देछात। 
थ्‍व नखःबलय् इमिसं सछिम्‍ह (१००) द्वहं, निसःम्‍ह (२००) भ्‍याःचा, प्‍यसःम्‍ह (४००) चिधिकःपिं भ्‍याःचा व होमबलि छाल। अले इस्राएलया झिंनिगू कुलया निंतिं झिंनिम्‍ह दुगुचा शुद्ध जुइगु बलिकथं छाल। 
अले इमिसं मोशाया सफुलिइ च्‍वया तः थें यरूशलेमय् देगलय् सेवा यायेत पुजाहारीत व लेवीतय्‌गु थीथी पुचः दय्‌कल। 
न्‍हापांगु लाया झिंप्‍यन्‍हु खुन्‍हु, ज्‍वनायंकाः लित छ्वयाहःपिन्‍सं छुत्‍काराया नखः हन। 
पुजाहारीत व लेवीतय्‌सं छगू मन जुयाः थःपिन्‍त शुद्ध याःगु खः उकिं इपिं सकलें शुद्धपिं खः। अले लेवीतय्‌सं ज्‍वनायंकाः लित छ्वयाहःपिं सकल मनूतय्‌गु निंतिं व थः दाजुकिजा पुजाहारीतय्‌गु निंतिं अले थथःगु निंतिं छुत्‍काराया चिधिकःम्‍ह भ्‍याःचा बलि बिल। 
ज्‍वनाःयंका तयातःगु थासं लिहांवःपिं सकलें इस्राएलीतय्‌सं जक मखु, परमप्रभु इस्राएलया परमेश्‍वरयात आराधना यायेत थःगु थितिकुति त्‍वःतूपिं उगु देशय् च्‍वनाच्‍वंपिं मेगु जातियापिं मनूतय्‌सं नं भ्‍वय् नल। 
अले इमिसं सोडा मतःगु मरिया नखः न्‍हय्‌न्‍हु तक न्‍ह्यइपुक हन। परमप्रभुं अश्‍शूरयाम्‍ह जुजुयागु मन हिलादीगुलिं अले वं इस्राएलयाम्‍ह परमेश्‍वरयागु देगःया ज्‍याय् इमित ग्‍वाहालि ब्‍यूगुलिं इपिं थथे लय्‌ताःगु खः। 
