﻿२ इतिहास.
30.
परमप्रभु इस्राएलया परमेश्‍वरया निंतिं छुत्‍काराया नखः हनेत यरूशलेमय् परमप्रभुया देगलय् वा धकाः हिजकियां इस्राएल व यहूदाया फुक्‍क मनूतय्‌थाय् खबर छ्वल। अले एफ्राइम व मनश्‍शेया मनूतय्‌त नं पौ छ्वल। 
जुजु, वया भारदारत व यरूशलेमयापिं फुक्‍क खलकं निगूगु लाय् छुत्‍काराया नखः हनेगु क्‍वःछित। 
गाक्‍क पुजाहारीतय्‌सं थःपिन्‍त शुद्ध मयाःगु जुयाः अले मनूत नं यरूशलेमय् मुं मवःगु जुयाः इमिसं पाय्‌छिगु इलय् नखः हने मफुगु खः। 
थ्‍व खँ जुजु व फुक्‍क मनूतय्‌त यल। 
अले इमिसं बेर्शेबांनिसें दान तक हे इस्राएलया फुक्‍क थासं मनूत परमप्रभु इस्राएलया परमेश्‍वरया निंतिं छुत्‍काराया नखः हनेत यरूशलेमय् वये हे माः धकाः घोषणा यायेगु क्‍वःछित। थ्‍व स्‍वयां न्‍ह्यः व्‍यवस्‍थाय् च्‍वया तः थें यक्‍व मनूत वयाः थ्‍व नखः हंगु मदुनि। 
उकिं जुजु व वया भारदारतपाखें पौत कयाः अले जुजुया आज्ञा कथं खबर ब्‍यूवंपिं मनूत इस्राएल व यहूदाया फुक्‍क थासय् थथे धाधां चाचाःहिलाः जुल, “हे इस्राएलया मनूत! छिमिगु देश अश्‍शूरीतय्‌सं त्‍याकाकाःसां छिपिं इमिगु ल्‍हातं बचय् जुल। अब्राहाम, इसहाक व इस्राएलया परमप्रभु परमेश्‍वरपाखे छिपिं लिहां वा, अले वय्‌कः बचय्‌जूपिं छिमिथाय् लिहां झाइ। 
छिपिं थः पुर्खा व छिमि थःथितिपिं थें जुइ मते। इमिसं ला परमप्रभु इमि पुर्खातलिसे विश्‍वासघात याःगु खः। परमेश्‍वरं इमित ग्‍याइगु कारण दय्‌कादिल। व छिमिसं थःपिन्‍सं हे खंगु दु। 
थः पुर्खातय्‌सं थें छिमिसं जिद्दी याये मते। बरु परमप्रभुया न्‍ह्यःने क्‍वमिलु जुयाः वय्‌कलं न्‍ह्याबलेंया निंतिं शुद्ध यानादीगु वय्‌कःया पवित्र थासय् दुहां हुँ। परमप्रभु छिमि परमेश्‍वरया सेवा या, अले वय्‌कःया तं छिमिगुपाखें चिलावनी। 
“छिपिं परमप्रभुयाथाय् लिहां वल धाःसा छिमि थःथितिपिं व छिमि काय् म्‍ह्याय्‌पिन्‍त ज्‍वनायंकूपिन्‍सं इमित दया माया याइ। अले इपिं थ्‍व देशय् लिहां वयेखनी। छाय्‌धाःसा परमप्रभु छिमि परमेश्‍वर दया माया दुम्‍ह खः। छिपिं वय्‌कःपाखे लिहां वल धाःसा वय्‌कलं थःगु ख्‍वाः छिमिगुपाखें फस्‍वय्‌कादी मखु।” 
खबर ब्‍यूवंपिं मनूत एफ्राइम व मनश्‍शे कुलया इलाकाया शहर शहरय् वन, इपिं जबूलून कुलया इलाका तक हे वन। तर मनूत इपिं खनाः न्‍हिल, अले इमित लाय्‌बुल। 
अय्‌नं आशेर, मनश्‍शे व जबूलूनया छुं मनूत क्‍वमिलु जुयाः यरूशलेमय् वन। 
जुजु व वया भारदारतय्‌सं परमप्रभुया वचनकथं ब्‍यूगु आज्ञा मानय् यायेत परमेश्‍वरया ल्‍हातं यहूदाया मनूतय्‌त छगू हे मन बियादिल। 
निगूगु लाय् सोडा मतःगु मरिया नखः हनेत यक्‍व मनूत यरूशलेमय् मुंवल। 
इमिसं यरूशलेमय् मेपिं द्यःतय्‌गु वेदीत चीकाबिल, अले थाय् थासय् दुगु धुपाँय् च्‍याकीगु वेदीत नं लिकयाः किद्रोनया बेंसीइ वांछ्वयाबिल। 
उगु लाया झिंप्‍यंगूगु दिंखुन्‍हु इमिसं छुत्‍काराया नखःया निंतिं मचाम्‍ह भ्‍याःचात स्‍यात। पुजाहारीत व लेवीत लज्‍या चाल अले थःपिन्‍त शुद्ध यानाः होमबलित परमप्रभुया देगलय् हल। 
परमेश्‍वरया मनू मोशाया व्‍यवस्‍थाकथं इमिसं देगलय् थथःगु थाय् काल। पुजाहारीतय्‌सं लेवीतय्‌गु ल्‍हातं हि कयाः वेदीइ छ्वाकल। 
यक्‍व मनूतय्‌सं थःत शुद्ध याःगु मदु। उकिं परमप्रभुया न्‍ह्यःने थथःम्‍ह मचाम्‍ह भ्‍याःचा शुद्ध याये मफुपिं थुपिं अशुद्ध जूपिं सकसिगुं निंतिं लेवीतय्‌सं छुत्‍काराया नखःया मचापिं भ्‍याःचात स्‍याये माल। 
एफ्राइम, मनश्‍शे, इस्‍साखार व जबूलून कुलं वःपिं मध्‍ये यक्‍वसिनं थःत शुद्ध याःगु मदुनि। अय्‌नं इमिसं विधि स्‍वयाः अःखः वनाः छुत्‍काराया नखः हन। तर हिजकियां थथे धकाः इमिगु निंतिं प्रार्थना यात, “हे भिंम्‍ह परमप्रभु, 
सुनां सुनां थः पुर्खाया परमप्रभु परमेश्‍वरयात दुनुगलंनिसें मालाच्‍वंगु दु इपिं विधिकथं शुद्ध मजूसां इपिं सकसितं क्षमा यानादिसँ।” 
परमप्रभुं हिजकियाया प्रार्थनाया लिसः बियादिल। वय्‌कलं मनूतय्‌त क्षमा यानादिल अले मनूतय्‌त लंकादिल। 
यरूशलेमय् मुंवःपिं इस्राएली मनूतय्‌सं न्‍हय्‌न्‍हु तक लय्‌लय्‌तातां सोडा मतःगु मरिया नखः हन। अले पुजाहारी व लेवीतय्‌सं परमप्रभुया निंतिं तसकं न्‍ह्यइपुक बाजं थानाः न्‍हियान्‍हिथं परमप्रभुया प्रशंसा यात। 
परमप्रभुया सेवा गथे यानाः यायेगु धकाः थुइके धुकूपिं लेवीतय्‌त हिजकियां प्रशंसा यात। थुकथं इमिसं मेलबलि छाछां परमप्रभु इमि पुर्खातय् परमेश्‍वरया प्रशंसा यायां न्‍हय्‌न्‍हु तक इमिसं नया हे च्‍वन। 
मनूत सकलें मेगु न्‍हय्‌न्‍हु तक अन च्‍वनेत मानय् जुल। उकिं इमिसं लय्‌लय्‌तातां मेगु न्‍हय्‌न्‍हु तक नखः हन। 
यहूदाया जुजु हिजकियां मनूतय्‌गु निंतिं द्वःछिम्‍ह द्वहं व न्‍हय्‌द्वःम्‍ह फै-च्‍वलय् अले भारदारतय्‌सं मनूतय्‌गु निंतिं द्वःछिम्‍ह द्वहं व झिद्वःम्‍ह फै-च्‍वलय् बिल। अले यक्‍व पुजाहारीतय्‌सं थःत शुद्ध यात। 
यहूदाया फुक्‍क खलः, पुजाहारीत व लेवीत अले इस्राएलं वःपिं फुक्‍क मनूतनापं उत्तरी इस्राएल व यहूदाय् च्‍वनाच्‍वंपिं इस्राएलया विदेशीत अले यहूदायापिं मनूत सकसिनं लसता हन। 
यरूशलेमय् तसकं लसतां जाल। छाय्‌धाःसा इस्राएलया जुजु दाऊदया काय् सोलोमनया इलंनिसें थुखे यरूशलेम थथे गुबलें जूगु मदुनि। 
अले पुजाहारीत व लेवीत दनाः मनूतय्‌त सुवाः बिल, परमेश्‍वरं इमिगु खँ न्‍यनादिल छाय्‌धाःसा इमिगु प्रार्थना स्‍वर्गय् वय्‌कः च्‍वनादीगु पवित्र थासय् थ्‍यन। 
