﻿२ इतिहास.
29.
हिजकिया निइन्‍यादँ दुबलय् जुजु जूगु खः। वं यरूशलेमय् निइगुदँ राज्‍य यात। वया मांया नां अबिया, जकरियाया म्‍ह्याय् खः। 
थः पुर्खा दाऊद थें जुयाः वं परमप्रभुया मिखाय् भिंगु ज्‍या यात। 
थःगु शासनया न्‍हापांगु दँया न्‍हापांगु लाय् वं परमप्रभुया देगःया लुखात चाय्‌काः उमित ल्‍ह्वन। 
वं पुजाहारीत व लेवीतय्‌त देगःया पुर्बपाखेया चुकय् मुंकल। 
अले इमित थथे धाल, “हे लेवीत, जिगु खँ न्‍यँ! आः थःपिन्‍त शुद्ध या, अले परमप्रभु छिमि पुर्खातय् परमेश्‍वरयागु देगःयात शुद्ध या। देगः दुने दुगु अशुद्ध सकतां परमप्रभुया देगलं पिने चीकाछ्व। 
झी पुर्खातय्‌सं विश्‍वासघात यानाः परमप्रभु झी परमेश्‍वरया मिखाय् मभिंगु ज्‍या यात। इमिसं वय्‌कःयात त्‍वःतल अले वय्‌कः च्‍वनादीगु थाय्‌या छुं वास्‍ता मया। इपिं वय्‌कःपाखें फस्‍वल। 
इमिसं देगःया लुखात तिनाबिल, मत च्‍याकेगु नं त्‍वःताबिल। इमिसं इस्राएलया परमेश्‍वरयागु पवित्र थासय् गुँगू थनेगु व होमबलि छायेगु त्‍वःतल। 
“उकिं परमप्रभु यहूदा व यरूशलेमलिसें तंचायादिल। अले वय्‌कलं अन छु जुइके बियादिल, व खनाः फुक्‍कं ग्‍यात, वातां जुल अले हिस्‍यात। थ्‍व खँ छिमिसं बांलाक स्‍यू। 
उकिं यानाः हे झी पुर्खातय्‌त तरवारं स्‍यात, झी काय्‌म्‍ह्याय्‌पिं व कलाःपिन्‍त ज्‍वना यंकूगु दु। 
आः वय्‌कःया तं चीकाछ्वयेत जितः परमप्रभु झी परमेश्‍वरलिसें छगू बाचा चिने मास्‍ति वःगु दु। 
जिमि काय्‌पिं, आः ई सितिकं छ्वये मते। छाय्‌धाःसा परमप्रभुं वय्‌कःया न्‍ह्यःने दनाः वय्‌कःया सेवा यायेत, वय्‌कःया न्‍ह्यःने ज्‍या यायेत व गुँगू थनेत छिमित ल्‍ययादीगु दु।” 
अले थुपिं लेवीत ज्‍या यायेत न्‍ह्यचिल – कहातीतपाखें – अमासैया काय् महत व अजर्याहया काय् योएल। मरारीतपाखें – अब्‍दीया काय् कीश व यहललेलया काय् अजर्याह। गेर्शोनीतपाखें – जिम्‍माहया काय् योआ व योआया काय् अदन। 
एलीजापानया सन्‍तानपाखें – शिम्री व यहीएल। आसापया सन्‍तानपाखें- जकरिया व मत्तन्‍याह। 
हेमानया सन्‍तानपाखें – यहीएल व शिमी। यदूतूनया सन्‍तानपाखें – शमायाह व उज्‍जीएल। 
इमिसं थःपिनि लेवी थःथितितय्‌त मुंकाः थःपिन्‍त अर्पण यात। अले परमप्रभुया व्‍यवस्‍थाकथं जुजुं आज्ञा ब्‍यू थें इपिं परमप्रभुया देगः पवित्र यायेत दुने दुहां वन। 
पुजाहारीत पवित्र थाय्‌यात शुद्ध यायेत उकिया दुने दुहां वन। इमिसं परमप्रभुया देगः दुने दुगु फुक्‍क अशुद्ध चिज परमप्रभुया देगलं पिने चुकय् हल। लेवीतय्‌सं उपिं अशुद्ध चिजयात किद्रोनया बेंसीइ यंकाः वांछ्वयाबिल। 
न्‍हापांगु लाया न्‍हापांगु दिनय् इमिसं पवित्र यायेगु ज्‍या न्‍ह्याकल, अले च्‍यागूगु दिंखुन्‍हु इपिं दलान तक थ्‍यंगु खः। अनंलि इमिसं परमप्रभुया देगः पवित्र यायेत मेगु च्‍यान्‍हु बीकल। न्‍हापांगु लाया झिंखुगूगु दिंखुन्‍हु इमिसं व ज्‍या सिधय्‌कल। 
अले इमिसं जुजु हिजकियायाथाय् वनाः थथे धाल, “जिमिसं देगः छगलं होमबलिया वेदी व उकिया फुक्‍क थलबल अले देछाःगु मरि तयेगु तेबिल व उकिया फुक्‍क सामान शुद्ध यानागु दु। 
थः जुजु जूबलय् आहाजं विश्‍वासघात यानाः वान्‍छ्वया तःगु फुक्‍कं सामान नं जिमिसं अर्पण यानागु दु। आः उपिं फुक्‍क सामान परमप्रभुया वेदीया न्‍ह्यःने दु।” 
कन्‍हय् खुन्‍हु सुथं न्‍हापां हिजकिया जुजु शहरया हाकिमतय्‌त मुंकाः परमप्रभुया देगलय् वन। 
इमिसं राज्‍य, पवित्रथाय् व यहूदाया निंतिं शुद्ध जुइगु बलिकथं न्‍हय्‌म्‍ह द्वहं, न्‍हय्‌म्‍ह भ्‍याःचा, न्‍हय्‌म्‍ह फै व न्‍हय्‌म्‍ह दुगुचा हल। जुजुं हारूनया सन्‍तान पुजाहारीतय्‌त थुपिं फुक्‍कं परमप्रभुया वेदीइ छायेगु आज्ञा बिल। 
उकिं इमिसं न्‍हापा द्वहंत स्‍यात, अले उमिगु हि कयाः वेदीइ छ्वाकल, अनं लिपा भ्‍याःचात स्‍यात, अले उमिगु हि कयाः वेदीइ छ्वाकल, अनं लिपा फैचात स्‍यात अले उमिगु हि कयाः वेदीइ छ्वाकल। 
शुद्ध जुइगु बलिया दुगुत धाःसा जुजु व खलःया न्‍ह्यःने हल, अले इमिसं दुगुतय् छेनय् थथःगु ल्‍हाः तल। 
अनंलि पुजाहारीतय्‌सं उपिं दुगुचात स्‍यात, अले इस्राएलया फुक्‍क मनूतय्‌गु निंतिं प्रायश्‍चित यायेत उकिया हि शुद्ध जुइगु बलिकथं वेदीइ प्‍वंकल। छाय्‌धाःसा जुजुं इस्राएलया फुक्‍क मनूतय्‌गु निंतिं होमबलि व शुद्ध जुइगु बलि छायेगु आज्ञा ब्‍यूगु खः। 
जुजुं लेवीतय्‌त दाऊदं व जुजुया अगमवक्ता गाद व नातान अगमवक्तां क्‍वःछिनातःगु नियमकथं भुस्‍याः वीणा व सारंगीनापं परमप्रभुया देगलय् थथःगु ज्‍याय् तल। थ्‍व नियम परमप्रभुं थः अगमवक्तापाखें बियादीगु खः। 
उकिं लेवीत दाऊदं न्‍हापा छ्यःगु थें ज्‍याःगु बाजं व पुजाहारीत थथःगु तुरहीनापं दन। 
उकिं हिजकियां होमबलि वेदीइ छायेगु आज्ञा बिल। होमबलि छायेगु ज्‍या शुरु जूबलय् मनूतय्‌सं परमप्रभुयात प्रशंसा यायां म्‍ये हाल, अले तुरही पुइपिन्‍सं तुरही, बाजं थाइपिन्‍सं दाऊद जुजुं न्‍हापा छ्यःगु थें ज्‍याःगु बाजंत थात। 
खलःयापिं सकल मनूतय्‌सं परमप्रभुयात आराधना यात, म्‍ये हालीपिन्‍सं म्‍ये हाल अले तुरही पुइपिन्‍सं तुरही पुल। होमबलि छायेगु ज्‍या सिमधःतले थथे जुया तुं च्‍वन। 
अनंलि हिजकिया जुजु अले वनापं दुपिं सकल मनूतय्‌सं छ्यं क्‍वछुकाः परमप्रभुयात आराधना यात। 
जुजु व वया हाकिमतय्‌सं लेवीतय्‌त दाऊद जुजु व अगमवक्ता आसापं च्‍वःगु भजन हालाः परमप्रभुया प्रशंसा यायेगु आज्ञा बिल। उकिं इमिसं लय्‌लय्‌तातां प्रशंसाया म्‍ये हाल अले थःगु छ्यं क्‍वछुकाः परमेश्‍वरयात आराधना यात। 
हिजकियां थः प्रजायात थथे धाल, “आः छिमिसं परमप्रभुया निंतिं थःपिन्‍त देछाःगु दु। छिपिं छिमिगु बलि व सुभाय्‌या बलि ज्‍वनाः परमप्रभुया देगलय् वा।” उकिं खलःयापिं मनूतय्‌सं बलि व सुभाय्‌या बलि हल, अले थःगु इच्‍छां बी मास्‍तिवय्‌कूपिं सकसिनं थथःगु होमबलि हल। 
खलःयापिं मनूतय्‌सं परमप्रभुयात होमबलि छायेत न्‍हयेम्‍ह द्वहं, सछिम्‍ह (१००) भ्‍याःचा व निसःम्‍ह (२००) मिजंम्‍ह फै हल। 
मेलबलि बीत फ्‍यायातःपिं पशुत खुसःम्‍ह (६००) द्वहं व स्‍वद्वःम्‍ह (३,०००) फै व दुगु दु। 
थुपिं दक्‍व पशुतय्‌गु छेंगू तुला कायेत पुजाहारीतय् ल्‍याः कम जूगुलिं लेवीतय्‌सं उगु ज्‍या सिमधतले इमित ग्‍वाहालि बिल। मेपिं पुजाहारीतय्‌सं थःपिन्‍त पवित्र मयातले इमित ग्‍वाहालि याना हे च्‍वन। लेवीत थःत पवित्र यायेत पुजाहारीत स्‍वयाः होशियार जू। 
होमबलि यक्‍व दु, अले मेलबलिया दाः, होमबलिनापं छाइगु त्‍वँसाबलि नं दु। थुकथं देगलय् आराधनाया सेवा हाकनं शुरु जुल। 
परमेश्‍वरं थःमनूतय्‌गु निंतिं यानादीगु ज्‍यां यानाः हिजकिया व फुक्‍क मनूत लय्‌ताल। छाय्‌धाःसा थ्‍व याकनं हे सिधःगु खः। 
