﻿२ इतिहास.
10.
रहबाम शेकेमय् वन, छाय्‌धाःसा इस्राएलयापिं सकलें मनूत वयात जुजु दय्‌केत अन हे वंगु खः। 
थ्‍व खँ न्‍यनाः नबातया काय् यारोबाम मिश्र देशं लिहां वल। (व मिश्र देशय् च्‍वनाच्‍वंगु खः, अन व सोलोमन जुजु खनाः ग्‍यानाः बिस्‍युं वंगु खः।) 
अथे जुयाः इस्राएलया नायःतय्‌सं यारोबामयात सःतके छ्वल, अले यारोबाम व इस्राएलयापिं सकलें मनूत वयाः रहबामयात थथे धाल, 
“छिकपिनि अबु सोलोमनं जिमित झ्‍यातुगु कु क्‍वबिकाः जिमिगु जीवनयात थाकुइकाब्‍यूगु खः। उगु झ्‍यातुगु कुयात याउँकादीसा जिमिसं छिगु सेवा याये।” 
रहबामं इमित धाल, “थ्‍व खँय् बिचाः यायेत स्‍वन्‍हुया ई ब्‍यु। छिपिं स्‍वन्‍हु लिपा वा।” उकिं मनूत अनं वन। 
रहबाम जुजुं थः अबु सोलोमन म्‍वानाच्‍वंबलय् वयात सल्‍लाहबीपिं बुरापिं मनूतलिसें खँ ल्‍हात। वं इमित न्‍यन, “थुपिं मनूतय्‌त जिं छु लिसः बीगु, छिकपिनिगु छु सल्‍लाह दु?” 
बुरापिन्‍सं रहबामयात धाल, “छिं थुपिं मनूतय्‌त बांलाःगु व्‍यवहार यानाः थुमित लय्‌ताय्‌कादीसा, अले थुपिंलिसें नाइक खँ ल्‍हानादीसा थुमिसं न्‍ह्याबलें छिगु सेवा याइ।” 
तर व उपिं बुरापिनिगु सल्‍लाह मन्‍यंसें थःनापं ब्‍वलंपिं व थःगु न्‍ह्यःने च्‍वनाच्‍वनीपिं ल्‍याय्‌म्‍हपिंथाय् सल्‍लाह काःवन। 
वं इमित न्‍यन, “जिमिगु कु याउँकाबियादिसँ धकाः जितः बिन्‍ति याःवःपिं मनूतय्‌त झीसं छु लिसः बीगु? जिं छु यायेगु? छिमिगु छु सल्‍लाह दु?” 
इमिसं लिसः बिल, “छिकपिनि अबुं जिमित झ्‍यातुगु जुवा क्‍वबिकादीगु दु, उकियात याउँकादिसँ धकाः छितः धाःवःपिन्‍त थथे धयादिसँ, ‘जिमि अबुया जँ स्‍वयाः जिगु कान्छी पतिं हे तःत्‍याः।’ 
जिमि अबुं छिमित झ्‍यातुगु जुवा क्‍वबिकादीगु खः, तर जिं उगु जुवायात झन झ्‍यातुइकाबी। जिमि अबुं छिमित कोर्रां दाय्‌कादीगु खः, तर जिं छिमित बिच्‍छितय्‌सं न्‍याकाबी।” 
रहबाम जुजुं धाःथें हे स्‍वन्‍हु लिपा यारोबाम व सकलें मनूत वयाथाय् वन। 
जुजुं बुरापिनिगु सल्‍लाह मन्‍यंसे मनूतनापं कडा जुया खँ ल्‍हात, 
जिमि अबुं छिमित झ्‍यातुगु जुवा क्‍वबिकादीगु खः, तर जिं उगु जुवायात झन झ्‍यातुइकाबी। जिमि अबुं छिमित कोर्रां दाय्‌कादीगु खः, तर जिं छिमित बिच्‍छितय्‌सं न्‍याकाबी। 
थुकथं जुजु रहबामं मनूतय्‌गु खँ न्‍यँ हे मन्‍यं छाय्‌धाःसा शीलोयाम्‍ह अहियाहपाखें नबातया काय् यारोबामयात परमप्रभुं धयादीगु वचन पूवनेत वय्‌कलं थज्‍याःगु अवस्‍था हयादीगु खः। 
जुजुं थःगु खँ मन्‍यंगु खनाः मनूत चिल्‍लाय् दनाः हाल, “छु जिपिं दाऊदया वंशया भाग खः ला? यिशैया काय्‌याके जिमिगु छु भाग दु? हे इस्राएल, थथःगु पालय् हुँ। हे दाऊद, थःगु घरानाया धन्‍धा का।” उकिं उत्तरयापिं सकल इस्राएलीत थथःगु छेँ वन। 
तर रहबामं यहूदाया लागाय् च्‍वनाच्‍वंपिं इस्राएलीतय्‌त जक शासन यानाच्‍वन। 
अले जुजु रहबामं दासयात थें ज्‍या याकूपिं मनूतय् नायः अदोनीरामयात इमिथाय् वन। तर इस्राएलीतय्‌सं वयात ल्‍वहँत कय्‌काः स्‍यात। जुजु रहबाम धाःसा थःगु रथय् च्‍वनाः यरूशलेमय् बिस्‍युं वन। 
उबलय्‌निसें आः तक नं उत्तरयापिं इस्राएलीत दाऊदया घरानाया विरोधी जूगु दु। 
