﻿२ इतिहास.
7.
सोलोमनं प्रार्थना यायेधुंकाः स्‍वर्गं मि कुहां वयाः होमबलि व मेमेगु बलियात भस्‍म यानाबिल। अले परमप्रभुया महिमां देगः जाल। 
परमप्रभुया महिमां देगः जाःगुलिं पुजाहारीत परमप्रभुया देगलय् दुहां वने मफुत। 
आकाशं मि कुहां वयाच्‍वंगु व परमप्रभुया महिमा देगलय् च्‍वनाच्‍वंगु खनाः इस्राएलीत पुलिं चुयाः भ्‍वसुल। अले इमिसं परमप्रभुयात आराधना यानाः सुभाय् ब्‍युब्‍युं धाल, “परमप्रभु भिंम्‍ह खः, वय्‌कःया दयामाया न्‍ह्याबलें दयाच्‍वनी।” 
अले जुजु व सकल मनूतय्‌सं परमप्रभुया न्‍ह्यःने बां बिल। 
जुजु सोलोमनं निइनिद्वःम्‍ह द्वहं व छगू लाख व निइद्वःम्‍ह फै-दुगु बां बिल। जुजु व सकल मनूतय्‌सं थुकथं परमेश्‍वरया देगःयात देछाल। 
पुजाहारीतय्‌सं लेवीतय्‌सं थें थथःगु थाय् काल। अले दाऊद जुजुं परमप्रभुया प्रशंसा यायेत व सुभाय् बीत दय्‌कूगु बाजंत कयाः थुकथं परमप्रभुया प्रशंसा यात, “वय्‌कःया दयामाया न्‍ह्याबलें दयाच्‍वनी।” गुबलय् पुजाहारीत लेवीतय् चुलिंचू दन पुजाहारीतय्‌सं थथःगु तुरही पुल। अबलय् सकल इस्राएलीत अन दनाच्‍वन। 
अनंलि सोलोमनं परमप्रभुया देगःया न्‍ह्यःने चुकया दथुइच्‍वंगु ब्‍वयात अर्पण यात। अन वं होमबलि व मेलबलिया दाः छाल। छाय्‌धाःसा वं दय्‌कूगु कँय्‌यागु वेदीइ होमबलि, अन्‍नबलि व दाःया ब्‍व मन्‍ह्यन। 
सोलोमन व सकल इस्राएलीतय्‌सं न्‍हय्‌न्‍हु तक बल्‍चाबाय्‌या नखः हन। सोलोमननापं ग्‍वाः ग्‍वाः मनूत दु। इपिं उत्तरय् च्‍वंगु लेबो हमातंनिसें दच्‍छिनय् च्‍वंगु मिश्रया खुसिचा थें ज्‍याःगु तापाःगु थासं वःगु खः। 
च्‍यान्‍हु खुन्‍हु इमिसं क्‍वचाःगु सभा यात, छाय्‌धाःसा न्‍हय्‌न्‍हु तक इमिसं वेदीयात देछायेगु ज्‍याझ्‍वः यात अले मेगु न्‍हय्‌न्‍हु तक नखः हन। 
न्‍हय्‌गूगु लाया निइस्‍वंगूगु दिनय् वं मनूतय्‌त थथःगु छेँ छ्वल। इपिं परमप्रभुं दाऊद, सोलोमन व थः प्रजा इस्राएलयात भिं यानादीगुलिं दुनुगलंनिसें लय्‌ताः। 
थुकथं सोलोमन जुजुं देगः व दरबार दय्‌के सिधय्‌कल। अनंलि वं देगलय् व दरबारय् छु छु यायेगु बिचाः याःगु खः व सुथां लाक्‍क पूरा यात। 
अले परमप्रभुं सोलोमनयात चान्‍हय् दर्शन बियाः थथे धाल, “जिं छंगु प्रार्थना न्‍यनेधुन, थ्‍व देगःयात थःगु निंतिं बां बीगु थाय्‌कथं ल्‍ययागु दु। 
“गबले गबले जिं वा वयेगु दिकाबी वा अन्‍नया बाली नाश यायेत क्‍वःबुइँचात छ्वयाहये वा थः मनूतय्‌थाय् महामारी छ्वयाहये, 
जिगु थःगु नां बियातःपिं जिमि मनूतय्‌सं जितः प्रार्थना यात अले जितः मालाः थःम्‍हं यानाच्‍वंगु मभिंगु ज्‍या त्‍वःतल धाःसा जिं इमिगु बिन्‍ति न्‍यने, जिं इमिगु पाप क्षमा यानाबी अले हाकनं इमिगु देशयात च्‍वन्‍ह्याकाबी। 
जिं थ्‍व देगलय् मिखा ब्‍वयाच्‍वने। अन याःगु फुक्‍क प्रार्थना न्‍यनेत जिं थःगु न्‍हाय्‌पं बियाच्‍वने। 
छाय्‌धाःसा जिगु नां न्‍ह्याबलें थुकी दयाच्‍वनेमा धकाः जिं थ्‍व देगःयात ल्‍ययागु दु, अले अर्पण यानागु दु। जिगु मिखा व मन न्‍ह्याबलें थुकी वनाच्‍वनी। 
“छगू खँय् धाःसा, छं अबुनं थें छं विश्‍वास याये बहःम्‍ह जुयाः जिगु सेवा यात धाःसा अले जिगु नियम पालन यात धाःसा, जिं धयागु फुक्‍क खँ यात धाःसा, 
जिं छंगु सिंहासनयात बल्‍लाकाबी। जिं छिमि अबु दाऊदयात थथे धकाः बचं बियागु खः, ‘इस्राएलय् राज्‍य यायेत छिमि परिवारय् न्‍ह्याबलें छम्‍ह मनू दइ।’ 
तर छिमिसं फहिलाः जिं छिमित बियागु नियम व आज्ञा त्‍वःताः मेपिं द्यःत पुजायात धाःसा, 
जिं छिमित बियागु देशं छिमित लिनाछ्वये, अले जिगु नांया इज्‍जतया लागिं जिं अर्पण यानागु थ्‍व देगःयात त्‍वःताबी। जाति जातियापिं मनूतय्‌सं थुकियात हेस्‍याइ अले थुकियात क्‍वह्यंका स्‍वइ। 
आः थ्‍व देगः तःजिगु जूसां थ्‍वयागु न्‍ह्यःनं वनीपिं सकसिनं छक्‍क जुयाः थथे धाइ, ‘छाय् परमप्रभुं थ्‍व देशयात व थ्‍व देगःयात थथे यानादीगु जुइ?’ 
“मनूतय्‌सं लिसः बी, ‘थः पुर्खातय्‌त मिश्रं पित हयादीम्‍ह परमप्रभु थः परमेश्‍वरयात त्‍वःताः इमिसं मेपिं द्यःतय्‌त मानय् यानाः भागियानाः पुजा यात। उकिं परमप्रभुं थ्‍व विपत्ति इमिथाय् हयादीगु खः।’” 
