﻿२ इतिहास.
6.
अले सोलोमनं प्रार्थना यात, “हे परमप्रभु, जि खिउँगु सुपाँचय् च्‍वने धकाः छिं धयादीगु दु। 
आः छि न्‍ह्याबलें च्‍वनादीत जिं छगः तःजिगु देगः दय्‌कागु दु।” 
जुजु सोलोमन फहिल, अले थःगु न्‍ह्यःने दनाच्‍वंपिं इस्राएलया खलःयात थथे धकाः सुवाः बिल, 
“परमप्रभु इस्राएलयाम्‍ह परमेश्‍वरया प्रशंसा या। वय्‌कलं जिमि बाः दाऊदयात थ्‍व बचं बियादीगु खः, अले व पूरा नं यानादीगु दु, छाय्‌धाःसा वय्‌कलं थथे धयादिल, 
‘जिमि मनूतय्‌त मिश्रं पित हयागु दिनंनिसें आः तक जिं जिगु आराधना यायेत इस्राएल देशय् गन नं देगः दय्‌केत थाय् ल्‍ययागु मदुनि। जिमि मनूत इस्राएलीतय् नायः जुइत जिं सुयातं नं मल्‍यया। 
तर आः जिं यरूशलेमयात जिगु आराधना यायेगुथाय् व दाऊदयात जिमि मनूतय्‌त शासन यायेत ल्‍ययागु दु।’ 
“सोलोमनं हानं धाल, ‘इस्राएलयाम्‍ह परमप्रभु परमेश्‍वरया आराधना यायेत जिमि बाः दाऊदं देगः छगः दय्‌केगु इच्‍छा याःगु खः।’ 
अय्‌नं परमप्रभुं वयात धयादिल, ‘जिगु निंतिं छगः देगः दय्‌केगु इच्‍छा यानाः छं खःगु हे यात, 
अय्‌नं व छं गुबलें दय्‌के खनी मखु, छं थः हे काय्‌नं जिगु देगः दय्‌की।’ 
“आः परमप्रभुं थःगु बचं पूरा यानादिल। जिमि बाःया लिपा जि इस्राएलयाम्‍ह जुजु जुयागु दु। अले परमप्रभु इस्राएलयाम्‍ह परमेश्‍वरया नांया इज्‍जतया लागिं जिं छगः देगः नं दय्‌कागु दु। 
बाचाया सनू जिं देगलय् तयागु दु। परमप्रभुं इस्राएलीतलिसें चिनादीगु बाचा च्‍वयातःगु ल्‍वहं पौत उकी तयातःगु दु।” 
अनंलि सोलोमन फुक्‍क खलःया न्‍ह्यःने वनाः वेदीया लिक्‍क दन। अले थःगु ल्‍हाः ल्‍ह्वनाः प्रार्थना यात। 
सोलोमनं छगू कँय्‌यागु दबू दय्‌काः तःधंगु चुकया दथुइ तःगु खः। व २.२ मिटर ताहाः, २.२ मिटर तब्‍या अले व १.३ मिटर तजाः। व उगु दबुलिइ वन अले सकसिनं खंक पुलिं चुयाः थःगु ल्‍हाः स्‍वर्गपाखे ल्‍ह्वन। 
वं प्रार्थना यात, “हे परमप्रभु इस्राएलयाम्‍ह परमेश्‍वर, स्‍वर्ग व पृथ्‍वीइ छि थें ज्‍याःम्‍ह मेम्‍ह सुं हे ईश्‍वर मदु। थः मनूतलिसें छिं थःगु बाचा पूरा यानादी। अले इमिसं दुनुगलंनिसें छिगु खँ न्‍यनाः जीवन हन धाःसा इमित थःगु दयामाया क्‍यनादी। 
छिं थः दास जिमि अबु दाऊदयात छु बचं बियादीगु खः व छिं पूरा यानादीगु दु। छिं थःगु म्‍हुतुं जक धयामदी, ज्‍या नं याना क्‍यनादीगु दु। 
“आः हे परमप्रभु, इस्राएलयाम्‍ह परमेश्‍वर, छिं जिमि बाः दाऊदयात बियादीगु थ्‍व बचं नं पूरा यानादिसँ, ‘छं थें छिमि काय्‌पिन्‍सं नं जिगु आज्ञा पालन यात धाःसा छिमि परिवारय् इस्राएलया जुजु जुइत न्‍ह्याबलें मनू दयाच्‍वनी।’ 
आः हे परमप्रभु इस्राएलयाम्‍ह परमेश्‍वर, छिं थः दास दाऊदयात बियादीगु बचं पूरा यानादिसँ। 
“तर हे परमेश्‍वर, छु छि धात्‍थें पृथ्‍वीइ मनूतय्‌गु दथुइ च्‍वनादी फइ ला? स्‍वर्ग हे छिगु लागि चिधं धाःसा जिं दय्‌कागु थ्‍व देगः छि च्‍वनेत गन गाइ धकाः? 
हे परमप्रभु जिमि परमेश्‍वर, थःदासया प्रार्थना व इनाप छिं न्‍यनादिसँ। जिं छिगु न्‍ह्यःने यानाच्‍वनागु प्रार्थना व इनाप न्‍यनादिसँ। 
छिं थ्‍व देगलय् चान्‍हि मिखा ब्‍वयाच्‍वनादीमा। छिं थ्‍व थासय् थःगु नां तये धकाः धयादीगु खः। उकिं छिकपिनि दासं थ्‍व थाय्‌यात स्‍वयाः प्रार्थना याइबलय् छिं न्‍यनादिसँ। 
छिकपिनि दास व छिकपिनि मनूत इस्राएलीतय्‌सं थ्‍व थाय्‌यात स्‍वयाः प्रार्थना याइबलय् इमिगु बिन्‍ति छिं न्‍यनादिसँ। थः च्‍वनादीगु थाय् स्‍वर्गय् इमिगु बिन्‍ति न्‍यनादिसँ, अले न्‍यनाः इमित क्षमा यानादिसँ। 
“सुनानं थः जःलाखःलाया विरोधय् अपराध यात धाःसा, अले वयात पाफय्‌कल धाःसा वं थ्‍व देगः दुने छिगु वेदीया न्‍ह्यःने पाफल धाःसा, 
छिं स्‍वर्गं न्‍यनाः वकथं हे यानादिसँ। थः दासतय्‌गु दथुइ न्‍याय यानादिसँ। द्वं याःम्‍ह मनूयात पाय्‌छिगु सजाँय बियादिसँ। द्वंमयाःम्‍हय्‌सित त्‍वःतकादिसँ। 
“छिकपिनि मनूत इस्राएलीत छिगु विरोधय् पाप याःगुलिं शत्रुतपाखें बुइबलय् अले इपिं छिथाय् लिहां वयाः छिगु नां कयाः थ्‍व देगलय् छितः प्रार्थना व इनाप यानाः छिथाय् लिहां वइबलय् 
छिं स्‍वर्गं इमिगु प्रार्थना न्‍यनादिसँ व थः मनूत इस्राएलीतय्‌गु पाप क्षमा यानादिसँ। अले इमित व इमि पुर्खायात थःम्‍हं बियादीगु देशय् लितहयादिसँ। 
“छिगु विरोधय् इमिसं पाप याःगुलिं आकाशं वा मवल धाःसा, अले छिं दुःख बियादीगुलिं पस्‍ताय् चायाः क्‍वमिलु जुयाः छिगु नां काकां थ्‍व देगःपाखे स्‍वयाः छितः प्रार्थना यात धाःसा, 
हे परमप्रभु, छिं स्‍वर्गय् इमिगु बिन्‍ति न्‍यनादिसँ, अले थः दासत इस्राएलीतय्‌गु पाप क्षमा यानादिसँ। इमित इपिं जुइमाःगु खःगु लँपु स्‍यनादिसँ। छिं थः मनूतय्‌त न्‍ह्याबलें अधिकार यायेत बियादीगु थ्‍व देशय् हाकनं वा वय्‌कादिसँ। 
“थ्‍व देशय् अनिकाल वा महामारी जुइबलय् क्‍वाःगु फसं वा क्‍वःबुइँचाया बथानं अन्‍न नाश यानाबीबलय् वा छिकपिनि मनूतय्‌त इमि शत्रुतय्‌सं हमला याइबलय् वा इमिगु दथुइ न्‍ह्यागु नं विपत्ति वा ल्‍वय् वइबलय् 
इमिगु प्रार्थना न्‍यनादिसँ। छिकपिनि मनूत इस्राएलीत मध्‍ये सुनानं नुगः मछिंकाः थ्‍व देगःपाखे थःगु ल्‍हाः ल्‍ह्वनाः प्रार्थना यात धाःसा 
इमिगु प्रार्थना न्‍यनादिसँ। स्‍वर्गय् थः च्‍वनादीगु थासय् छिं इमिगु प्रार्थना न्‍यनादिसँ अले इमित क्षमा यानादिसँ। छिं सकलें मनूतय्‌गु नुगःया बिचाः स्‍यू। उकिं वयागु ज्‍याकथं वयात लिच्‍वः बियादिसँ। छाय्‌धाःसा छिं जक मनूया नुगःयात म्‍हस्‍यू। 
थथे जिमि पुर्खातय्‌त बियादीगु देशय् इमिसं थः म्‍वाःतले छिगु भय काइ अले छिगु आज्ञा पालन याइ। 
“सुं परदेशीं गुम्‍ह इस्राएली मखु छिगु तःधंगु नां, बल्‍लाःगु ल्‍हाः व ताहाकः यानातःगु ल्‍हाःया बारे न्‍यनाः तापालं वयाः थ्‍व देगःपाखे स्‍वयाः प्रार्थना यात धाःसा 
छिं वयागु प्रार्थना न्‍यनादिसँ। थः च्‍वनादीगु स्‍वर्गय् छिं वयागु प्रार्थना न्‍यनादिसँ। वं इनाप याःथें यानादिसँ। अले संसारया फुक्‍क जातिं छिकपिनि मनूत इस्राएलीतय्‌सं थें छितः म्‍हसीमा अले छिगु आज्ञा पालन यायेमा। इमिसं थ्‍व देगः जिं छिगु नांया इज्‍जतया लागिं दय्‌कागु खः धकाः नं सी। 
“छिकपिनि मनूत छिं इमित छ्वयादीगु लँपुइ थः शत्रुतलिसें लडाइँ यायेत पिहां वनीबलय् इमिसं छिं ल्‍ययादीगु थ्‍व शहरपाखे व जिं छिगु नांया निंतिं दय्‌कागु थ्‍व देगःपाखे स्‍वयाः छितः प्रार्थना यात धाःसा 
अबलय् इमिगु बिन्‍ति न्‍यनादिसँ। स्‍वर्गय् इमिगु प्रार्थना न्‍यनादिसँ, अले इमित त्‍याकादिसँ। 
“इमिसं छिगु विरोधय् पापयात धाःसा (छाय्‌धाःसा पाप मयाःम्‍ह सुं मनू मदु) अले इपिं खनाः तंचायाः छिं इमित इमि शत्रुतय्‌गु ल्‍हातय् बियादिल अले इमित ज्‍वनाः तापाःगु वा सतिगु देशय् यंकल धाःसा, 
अले इमित ज्‍वनायंकूगु देशय् इमित होश वल व छिथाय् लिहां वयाः इमिसं इमित ज्‍वनायंकूगु देशय्, ‘जिमिसं पाप यानागु दु, बांमलाःगु व्‍यवहार यानागु दु, मभिंगु ज्‍या यानागु दु’ धकाः छितः प्रार्थना यात धाःसा 
अले इमित ज्‍वना यंकूगु देशय् हाकनं छिपाखे दुनुगलंनिसें लिहां वयाः इमि पुर्खातय्‌त छिं बियादीगु इमिगु देश व छिं ल्‍ययादीगु थ्‍व शहर व छिगु नांया निंतिं जिं दय्‌कागु थ्‍व देगःपाखे स्‍वयाः इमिसं प्रार्थना यात धाःसा 
इमिगु प्रार्थना न्‍यनादिसँ! थः च्‍वनादीगु स्‍वर्गय् इमिगु प्रार्थना व बिन्‍ति न्‍यनादिसँ। इमिगु मुद्दा त्‍याकादिसँ। अले छिकपिनि मनूतय्‌सं याःगु फुक्‍क पाप क्षमा यानादिसँ। 
“हे जिमि परमेश्‍वर, थःगु मिखा चाय्‌कादिसँ। अले थ्‍व थासय् जिमिसं यानाच्‍वनागु प्रार्थना ध्‍यान बियादिसँ। 
“हे परमप्रभु परमेश्‍वर, दनाः छि थःगु शक्तिया सनूनापं थःगु आरामया थासय् झासँ। हे परमप्रभु परमेश्‍वर छिकपिनि पुजाहारीतय्‌त उद्धारया वसः फिकादिसँ। छु भिंगु खः, उकी छिकपिनि मनूत लय्‌तायाच्‍वनेमा। 
हे परमप्रभु परमेश्‍वर, थःम्‍हं अभिषेक यानादीम्‍ह जुजुयात स्‍वीकार यानादिसँ। थः दास दाऊदयात यानादीगु मायायात लुमंकादिसँ।” 
