﻿२ इतिहास.
3.
सोलोमनं यरूशलेमया मोरीयाह डाँडाय् परमप्रभुया देगः दय्‌केगु ज्‍या शुरु यात। मोरीयाह डाँडा परमप्रभुं सोलोमनया अबु दाऊदयात दर्शन बियादीगु थाय् व यबूसी अरौनाया खला दुगु थाय् खः। दाऊदं तयार याःगु थासय् हे सोलोमनं देगः दय्‌कल। 
सोलोमन जुजुं थः जुजु जूगु प्‍यंगूगु दँया निगूगु लाया निगूगु दिनय् देगः दय्‌केगु ज्‍या शुरु यात। 
सोलोमन जुजुं दय्‌कूगु परमेश्‍वरया देगः निइन्‍हय्‌गू (२७) मिटर ताहाकःगु व ९ मिटर तब्‍यागु खः। 
देगःया न्‍ह्यःने उकिया ब्‍या ति हे ९ मिटर हाकःगु व गुंगू ९ मिटर तःजाःगु छगू फः दु। दुनेपाखे धाःसा वं उकियात भिंगु लुं भुनाबिल। 
मू कोथाया अंगलय् थसिँया सिँपौत तयाबिल, अले उकियात भिंगु लुं भुनाबिल, उकी ताय्‌गः सिमा व सिखःयागु बुत्ता दय्‌कल। 
वं देगःयात बांलाःगु व थिकेय्-थिकेगु ल्‍वहं व पर्वेम देशं हःगु लुं छाय्‌पियाबिल। 
वं उकिया अंगः, धलिं चौकोस व लुखात लुं भुनाबिल, अले वं अंग-अंगलय् करूबतय्‌गु चित्र कियाः दय्‌कल। 
वं देगःया ब्‍या ति हे महा-पवित्रगु थाय् ९ मिटर हाकःगु व ९ मिटर तब्‍यागु दय्‌कल। वं दुनेपाखे उकियात निइगू तन भिंगु लुं भुनाबिल। 
न्‍यासः व न्‍हयेगू (५७०) ग्राम लुँ कयाः नकिं दय्‌कल। वं च्‍वय्‌यागु कोथा कोथाया अंगः नं लुं भुनाबिल। 
वं महा-पवित्रगु थासय् कियाः निम्‍ह करूबतय्‌गु चित्र दय्‌काः लुं भुनाबिल। 
निम्‍ह करूबया पपू छगू च्‍वकांनिसें मेगु च्‍वका तक ९ मिटर ताहाः। छम्‍ह करूबया छपु पपू २.२ मिटर ताहाः, अले देगःया अंगलय् थिल। वयागु मेगु पपू धाःसा मेम्‍ह करूबया पपू थीक २.२ मिटर हे ताहाः। 
अथे हे मेम्‍ह करूबया छपु पपू देगःया अंगः थीक २.२ मिटर ताहा, अले वयागु मेगु पपू धाःसा मेम्‍ह करूबया पपू थीक २.२ मिटर हे ताहाः। 
निम्‍ह करूबया पपूत ९ मिटर तक न्‍यनावंगु दु। उपिं थथःगु तुतिइ दनाच्‍वंगु दु। उमिगु ख्‍वाः दुनेपाखे स्‍वःगु दु। 
हाकनं वं वँचुगु, प्‍याजीगु, ह्याउँगु रंगया का व मलमलया कापःया पर्दा दय्‌कल। अले उकी करूबतय्‌गु बुट्टा दय्‌कल। 
देगःया न्‍ह्यःनेपाखे वं १५.५-१५.५ मिटर तःजाःगु निगः थां दय्‌कल। निगलं थांया च्‍वय्‌यागु ब्‍व २.२-२.२ मिटर तःजाः। 
वं सिखःयागु माला दय्‌कल। अले सिखःयात थांया च्‍वय्-च्‍वय्‌यागु ब्‍वतिइ तल। वं सच्‍छिगः धालेग्‍वः दय्‌कल अले उकियात सिखलं यख्‍खानाबिल। 
वं देगःया न्‍ह्यःने उपिं निगः थां थन। छगः दच्‍छिनपाखे थन, छगः थां उत्तरपाखे थन। वं दच्‍छिनपाखे च्‍वंगु थांया नां याकीन व उत्तरपाखे च्‍वंगु थांया नां बोअज तल। 
