﻿१ इतिहास.
27.
दँय्‌दसं छगू छगू लाय् २४,००० म्‍ह मनूया पुचलं इस्राएलया सेनाय् सिपाइँ जुयाः ज्‍या याइगु। उगु पुचलय् थुपिं सिपाइँतय्‌गु ज्‍या स्‍वयाः जुजुया सेवा याइपिं द्वःछिम्‍ह सिपाइँया कप्‍तानत, सछिम्‍ह सिपाइँया कप्‍तानत व इमि हाकिमत दु। इस्राएलया सेनाय् ज्‍या याइपिं इपिं इस्राएलीतय्‌गु धलः थथे दु – 
न्‍हापांगु लाया न्‍हापांगु पुचःया कप्‍तान जब्‍दीएलया काय् याशोबाम खः। वयागु पुचलय् २४,००० म्‍ह मनू दु। 
व फारेसया सन्‍तान खः अले न्‍हापांगु लाया निंतिं फुक्‍क फौजया नायःतय् मूम्‍ह खः। 
निगूगु लाया निंतिं पुचःया कप्‍तान अहोही दोदै खः। वयागु पुचलय् मिक्‍लोत न्‍ह्यलुवाः खः। इमिगु पुचलय् २४,००० म्‍ह दु। 
स्‍वंगूगु लाया निंतिं कप्‍तान पुजाहारी यहोयादाया काय् बनायाह खः। व नायः खः। वयागु पुचलय् २४,००० म्‍ह मनू दु। 
थ्‍व बनायाह उपिं स्‍विम्‍ह बहादुरपिं मध्‍ये छम्‍ह व उपिं स्‍विम्‍हया नायः खः। वया लिपा वया काय् अम्‍मीजाबाद वयागु थासय् वल। 
प्‍यंगूगु लाया निंतिं प्‍यम्‍हम्‍ह कप्‍तान योआबया किजा असाहेल खः। वया लिपा वया काय् जबदियाह वयागु थासय् वल। वयागु पुचलय् २४,००० म्‍ह मनू दु। 
न्‍यागूगु लाया निंतिं न्‍याम्‍हम्‍ह कप्‍तान यिज्‍याही शम्‍हूत खः। वयागु पुचलय् २४,००० म्‍ह मनू दु। 
खुगूगु लाया निंतिं खुम्‍हम्‍ह कप्‍तान तकोयाम्‍ह इक्‍केशया काय् ईरा खः। वयागु पुचलय् २४,००० म्‍ह मनू दु। 
न्‍हय्‌गूगु लाया निंतिं न्‍हय्‌म्‍हम्‍ह कप्‍तान एफ्राइम कुलयाम्‍ह पेलोनी हेलेस खः। वयागु पुचलय् २४,००० म्‍ह मनू दु। 
च्‍यागूगु लाया निंतिं च्‍याम्‍हम्‍ह कप्‍तान जेरह वंशयाम्‍ह हूशाती सिब्‍बकै खः। वयागु पुचलय् २४,००० म्‍ह मनू दु। 
गुंगूगु लाया निंतिं गुम्‍हम्‍ह कप्‍तान बेन्‍यामीनया अबीएजेर अनातोती खः। वयागु पुचलय् २४,००० म्‍ह मनू दु। 
झिगूगु लाया निंतिं झिम्‍हम्‍ह कप्‍तान जेरहया वंशयाम्‍ह नतोपाती महरै खः। वयागु पुचलय् २४,००० म्‍ह मनू दु। 
झिंछगूगु लाया निंतिं झिंछम्‍हम्‍ह कप्‍तान एफ्राइम कुलयाम्‍ह बनायाह पिरातोनी खः। वयागु पुचलय् २४,००० म्‍ह मनू दु। 
झिंनिगूगु लाया निंतिं झिंनिम्‍हम्‍ह कप्‍तान ओत्‍निएल वंशयाम्‍ह हेल्‍दै नतोपाती खः। वयागु पुचलय् २४,००० म्‍ह मनू दु। 
इस्राएलया कुल कुलया मू मू हाकिमत थुपिं खः – रूबेन कुल – जिक्रीया काय् एलीएजर, शिमियोन कुल – माकाया काय् शपत्‍याह, 
लेवी कुल – कमूएलया काय् हशब्‍याह, हारून – सादोक, 
यहूदा कुल – एलीहू धाःम्‍ह दाऊदया दाजु, इस्‍साखार कुल – मिखाएलया काय् ओम्री, 
जबूलून कुल – ओबदियाया काय् यिश्‍मायाह, नप्‍ताली कुल – अज्रीएलया काय् यरीमोत, 
एफ्राइम कुल – अजज्‍याहया काय् होशिया, मनश्‍शेया बच्‍छि कुल – पदायाहया काय् योएल, 
गिलादय् दुगु मनश्‍शेया बच्‍छि कुल – जकरियाया काय् इद्दो। बेन्‍यामीन कुल – अबनेरया काय् यासीएल। 
दान कुल – अबनेरया काय् अज्रेल। इस्राएलया कुल कुलया मू हाकिमत थुपिं हे खः। 
दाऊदं निइदँ स्‍वयाः क्‍वय्‌यापिन्‍त ल्‍याः मखाः, छाय्‌धाःसा परमप्रभुं इस्राएलया मनूतय्‌त आकाशया नगुत थें यक्‍व दय्‌काबी धकाः बचं बियादीगु खः। 
सरूयाहया काय् योआबं मनूतय्‌गु ल्‍याः खायेगु ज्‍या शुरु याःगु खः, अय्‌नं वं व ज्‍या पूरा मया। थ्‍व ल्‍याः खायेगु ज्‍याया कारणं परमेश्‍वर तंचायाः इस्राएलयात सजाँय बियादिल। उकिं मनूतय्‌गु ल्‍याः दाऊद जुजुया इतिहासय् मच्‍वः। 
जुजुया धुकूत अदीएलया काय् अज्‍मावेतया जिम्‍माय् खः। देशयागु, शहर-शहरयागु धुकूत, गांयागु धुकूत व किल्‍ला-किल्‍लायागु धुकूत उज्‍जियाहया काय् जोनाथनया जिम्‍माय् खः। 
देशय् बुँज्‍या याइपिं कलूबया काय् एस्रीया जिम्‍माय् खः। 
दाखया क्‍यबत रामती शिमीया जिम्‍माय् खः। दाखया क्‍यबय् सःगु दाख, दाखमद्य तइगु धुकूया निंतिं शेपेमी जब्‍दीया जिम्‍माय् खः। 
पच्‍छिमपाखेया क्‍वय् लाःगु इलाकाय् दुगु जैतून व अन्‍जीर स्‍वयेगु ज्‍या गेदेरी बाल-हानानयागु खः। चिकं तइगु धुकू योआशया जिम्‍माय् खः। 
शारोनया ख्‍यलय् च्‍वंपिं सा-द्वहंत शारोनी शित्रैया जिम्‍माय् खः। ब्‍यासिइ च्‍वंपिं सा-द्वहंत अदलैया काय् शाफातया जिम्‍माय् खः। 
ऊँटत इश्‍माएली ओबीलया जिम्‍माय् खः। गधात मेरोनोती येहदयाहया जिम्‍माय् खः। 
फैच्‍वलय् हग्री याजीजया जिम्‍माय् खः। दाऊद जुजुया थःगु सम्‍पत्ति थुपिं हे हाकिमतय्‌गु जिम्‍माय् खः। 
दाऊदया कका जोनाथन छम्‍ह सल्‍लाह बीम्‍ह, बुद्धि दुम्‍ह व शास्‍त्री खः। हक्‍मोनीया काय् यहीएल जुजुया काय्‌पिन्‍त स्‍वइम्‍ह खः। 
अहीतोपेल जुजुयात सल्‍लाह बीम्‍ह खः। अरकी हूशै जुजुया पासा खः। 
अहीतोपेलया लिपा बनायाहया काय् यहोयादा व अबियाथार सल्‍लाहबीपिं जुल। योआब जुजुया सेनाया सेनापति खः। 
