﻿१ इतिहास.
26.
ध्‍वाखा पिवाःतय्‌गु पुचःत थथे दु – कोरहीतपाखें – कोरेया काय् मेशेलेम्‍याह, कोरे आसापया सन्‍तान मध्‍ये छम्‍ह खः। 
मेशेलेम्‍याहया काय्‌पिं दक्‍वसिबय् तःधिकःम्‍ह जकरिया निम्‍हम्‍ह येदीएल, स्‍वम्‍हम्‍ह जबदियाह, प्‍यम्‍हम्‍ह यत्‍नीएल, 
न्‍याम्‍हम्‍ह एलाम, खुम्‍हम्‍ह येहोहानान, अले न्‍हय्‌म्‍हम्‍ह एल्‍यहोएनै खः। 
ओबेद-एदोमया नं काय्‌पिं दु – दक्‍वसिबय् तःधिकःम्‍ह शमायाह निम्‍हम्‍ह यहोजाबाद, स्‍वम्‍हम्‍ह योआ, प्‍यम्‍हम्‍ह साकार, न्‍याम्‍हम्‍ह नतनेल, 
खुम्‍हम्‍ह अम्‍मीएल, न्‍हयम्‍ह इस्‍साखार, अले च्‍याम्‍हम्‍ह पुल्‍लतै खः। (छाय्‌धाःसा परमेश्‍वरं ओबेद-एदोमयात सुवाः बियादीगु खः।) 
वया काय् शमायाहया नं काय्‌पिं दु। इपिं तसकं बहादुर जूगुलिं इमिसं थः बौया परिवारयात अधिकार याइगु खः। 
शमायाहया काय्‌पिं ओत्‍नी, रपाएल, ओबेद व एल्‍जाबाद। इमि थःथिति एलीहू व समक्‍याह नं बहादुर मनूत खः। 
थुपिं सकलें ओबेद-एदोमया सन्‍तान खः। इपिं, इमि काय्‌पिं व इमि थःथितिपिं थ्‍व ज्‍या यायेफुपिं व बहादुर मनूत खः। इपिं फुक्‍क ६२ म्‍ह दु। 
मेशेलेम्‍याहया झिंच्‍याम्‍ह बहादुर काय्‌पिं व थःथितिपिं दु। 
मरारी होसाया काय्‌पिं – न्‍हापाम्‍ह शिम्री (व दकलय् तःधिकःम्‍ह मखु, अय्‌नं वया बौनं वयात न्‍हापाम्‍ह दय्‌काब्‍यूगु खः), 
निम्‍हम्‍ह हिल्‍कियाह, स्‍वम्‍हम्‍ह तबलियाह व प्‍यम्‍हम्‍ह जकरिया। होसाया काय्‌पिं व थःथितिपिं फुक्‍क १३ म्‍ह दु। 
थुपिं ध्‍वाखा पिवाःतय् पुचः पुचःयात इमि परिवारया नायःतय् लागिं ल्‍यल। अले इमिसं मेपिं लेवीतय्‌सं थें परमप्रभुया देगलय् सेवा यात। 
चिधिकःपिं व तःधिकःपिं सकसिनं थथःगु पुर्खाया परिवारकथं छगू छगू ध्‍वाखाया निंतिं चिट्ठा तल। 
पुर्ब ध्‍वाखाया चिट्ठा शेलेम्‍याहया नामय् लात। अनंलि वया काय् जकरियाया नामय् उत्तरया ध्‍वाखा लात। जकरियां न्‍ह्याबलें भिंगु सल्‍लाह बीगु खः। 
दच्‍छिन ध्‍वाखाया चिट्ठा ओबेद-एदोमया नामय् लात। अले धुकूया चिट्ठा वया काय्‌पिनिगु नामय् लात। 
पच्‍छिमया ध्‍वाखा व च्‍वय्‌पाखे देगलय् वनीगु शल्‍केत धाःगु ध्‍वाखाया चिट्ठा शुप्‍पीम व होसाया नामय् लात। छम्‍ह पिवाः च्‍वनीम्‍ह मेम्‍ह पिवाः च्‍वनीम्‍ह मनूया लिक्‍कसं च्‍वनीगु। 
खुम्‍ह लेवीत न्‍हियान्‍हिथं पुर्बपाखे, प्‍यम्‍ह उत्तरपाखे, प्‍यम्‍ह दच्‍छिनपाखे, व निम्‍ह निम्‍ह धुकूया पिवाः च्‍वनीगु। 
अले पच्‍छिमया चुकय् वनीगु लँय् प्‍यम्‍ह व चुकय् हे निम्‍ह पिवाः च्‍वनीगु। 
कोरही व मरारीया सन्‍तानयात ब्‍यूगु पिवाः च्‍वनेगु ज्‍या थ्‍व हे खः। 
परमेश्‍वरया धुकू व परमप्रभुयात छाःगु सामान तयेगु धुकूया जिम्‍मा इमि मेपिं लेवी पासापिनिगु खः। 
गेर्शोनया काय् लादान यहीएलया बाः खः। लादान यक्‍व हे परिवारया पुर्खा खः। 
यहीएलीया निम्‍ह काय्‌पिं जेताम व योएलया जिम्‍माय् परमप्रभुया देगःया धुकू व मेमेगु सामानया धुकू दु। 
अम्रामीत, यिसहारीत, हेब्रोनीत, व उज्‍जीएलीतपाखें – 
मोशाया काय् गेर्शोमया सन्‍तान शूबाएल देगःया धुकू नायः खः। 
एलीएजरपाखें वया थःथितिपिं थुपिं खः - वया काय् रहब्‍याह, रहब्‍याहया काय् यशयाह, यशयाहया काय् योराम, योरामया काय् जिक्री, जिक्रीया काय् शलोमीत। 
दाऊद जुजु, परिवार परिवारया नायःत व द्वःछिम्‍ह व सछिम्‍ह सिपाइँतय् व सेनाया मेपिं नायःतय्‌सं देछाःगु सामानया धुकूया फुक्‍क जिम्‍मा शलोमीत व वया थःथितिपिन्‍त ब्‍यूगु खः। 
लडाइँलय् त्‍याकाहःगु छुं छुं सामानत परमप्रभुया देगः ल्‍ह्वनेत इमिसं देछाःगु खः। 
अगमवक्ता शमूएल, कीशया काय् शाऊल, नेरया काय् अबनेर व सरूयाहया काय् योआबं मेगु देछाःगु फुक्‍क सामान शलोमीत व वया थःथितितय्‌गु जिम्‍माय् दु। 
यिसहारीतपाखें – कनन्‍याह व वया काय्‌पिन्‍त इस्राएलीतय्‌गु पिनेया ज्‍याया लागि हाकिम व न्‍याय यायेगु ज्‍याया जिम्‍मा ब्‍यूगु खः। 
हेब्रोनीतपाखें – हशब्‍याह व वया झिंन्‍हय्‌सः बहादुर मनूतय्‌त यर्दन खुसिया पच्‍छिमपाखे इस्राएलय् परमप्रभुया फुक्‍क ज्‍या स्‍वयेत व जुजुया सेवाया लागि ल्‍यःगु खः। 
हेब्रोनीतय् नायः यरियाह खः। दाऊद जुजु जूगु पिइगूगु दँय् हेब्रोनीतय्‌गु वंशावलीइ माला स्‍वल। अले उगु परिवारयापिं मू मू मनूत गिलादया याजेरय् च्‍वनाच्‍वंगु लुइकल। 
दाऊद जुजुं यरियाहया थःथितितपाखें परिवार परिवारयापिं निद्वः व न्‍हय्‌सःम्‍ह नायःतय्‌त ल्‍यल, अले इमित रूबेनीत, गादीत व मनश्‍शेया बच्‍छि कुलया निंतिं जुजुयागु ज्‍या व परमेश्‍वरयागु ज्‍या स्‍वयेगु जिम्‍मा बिल। 
