﻿१ इतिहास.
24.
हारूनया सन्‍तानयात थुकथं पुचः पुचः यानाः ब्‍यागलं तःगु खः। हारूनया काय्‌पिं नादाब, अबीहू, एलाजार व ईतामार खः। 
नादाब व अबीहू धाःसा थः बौ स्‍वयां न्‍हापा हे सित, इमि सुं काय्‌पिं मदु। उकिं एलाजार व ईतामार पुजाहारीया ज्‍या यात। 
दाऊद जुजुं हारूनया सन्‍तानयात इमिगु ज्‍याकथं पुचः पुचः यानाः ब्‍यागलं तयाबिल। उगु ज्‍या यायेत वयात एलाजारया काय् सादोक व ईतामारया काय् अहीमेलेकं ग्‍वाहालि बिल। 
एलाजारया सन्‍तानयात झिंखुगू पुचलय् ब्‍यागलं तयाब्‍यूगु खः। अले ईतामारया सन्‍तानयात च्‍यागू पुचलय् ब्‍यागलं यानाब्‍यूगु खः। एलाजारया परिवारय् ईतामारया परिवारय् स्‍वयाः यक्‍व परिवार नायःत दुगुलिं अथे याःगु खः। 
एलाजार व ईतामार निम्‍हय्‌सिया सन्‍तानया दथुइ तःम्‍ह हे देगःया हाकिमत व परमेश्‍वरया हाकिमत दुगुलिं सुयागुं नं पँ मलीसें चिट्ठा तयाः इमित ब्‍यागलं तयाबिल। 
चिट्ठा तइगु ज्‍या नं एलाजार व ईतामारया सन्‍तानं पालंपाः याइगु। अनंलि इमिगु नां छम्‍ह लेवी छ्यान्‍जे नतनेलया काय् शमायाहं च्‍वइगु। जुजु, जुजुया भारदारत, पुजाहारी सादोक, अबियाथारया काय् अहीमेलेक, लेवी परिवार व पुजाहारी परिवारया नायःत फुक्‍क साक्षी च्‍वनीगु। 
न्‍हापांगु चिट्ठा यहोयारीबया नामय्, निगूगु यदायाहया नामय्, 
स्‍वंगूगु हारीमया नामय्, प्‍यंगूगु सोरीमया नामय्, 
न्‍यागूगु मल्‍कियाहया नामय्, खुगूगु मियामीनया नामय्, 
न्‍हय्‌गूगु हक्‍कोसया नामय्, च्‍यागूगु अबियाया नामय्, 
गुंगूगु येशूअया नामय्, झिगूगु शकन्‍याहया नामय्, 
झिंछगूगु एल्‍यासीबया नामय्, झिंनिगूगु याकीमया नामय्, 
झिंस्‍वंगूगु हुप्‍पाया नामय्, झिंप्‍यंगूगु येशेबाबया नामय्, 
झिंन्‍यागूगु बिल्‍गाया नामय्, झिंखुगूगु इम्‍मेरया नामय्, 
झिंन्‍हय्‌गूगु हेजीरया नामय्, झिंच्‍यागूगु हप्‍पिसेसया नामय्, 
झिंगुगूगु पतहियाहया नामय्, निइगूगु यहेजकेलया नामय्, 
निइछगूगु याकीनया नामय्, निइनिगूगु गमूएलया नामय्, 
निइस्‍वंगूगु दलायाहया नामय्, व निइप्‍यंगूगु माज्‍याहया नामय् लात। 
परमप्रभु इस्राएलयाम्‍ह परमेश्‍वरयागु आज्ञा मानाय् यानाः इमि पुर्खा हारूनं पलिस्‍था यानाथकूगु थ्‍व नियमकथं इपिं परमप्रभुया देगलय् थःगु सेवाया ज्‍या याः वनीबलय् इमिगु ज्‍या थ्‍व हे खः। 
ल्‍यंदुपिं लेवीया सन्‍तानया मेपिं परिवारया नायःतपाखें – अम्रामया काय्‌पिंपाखें – शूबाएल, शूबाएलया काय्‌पिंपाखें – येहदयाह। 
रहब्‍याहया सन्‍तानपाखें – यिशियाह, यिशियाह जेठाम्‍ह खः। 
यिसहारयापिंपाखें – शलोमोत। शलोमोतया काय्‌पिं – यहत। 
हेब्रोनया सन्‍तान न्‍हापाम्‍ह यरियाह, निम्‍हम्‍ह अमर्याह, स्‍वम्‍हम्‍ह यहासेल, प्‍यम्‍हम्‍ह यकमाम। 
उज्‍जीएलया सन्‍तान – मीका। मीकाया सन्‍तानपाखें – शामीर। 
मीकाया किजा यिश्‍याह। यिश्‍याहया सन्‍तानपाखें – जकरिया। 
मरारीया सन्‍तान – महली व मूशी। यजियाहया सन्‍तान बनो। 
मरारीया सन्‍तान – यजियाहपाखें बनो, शोहम, जक्‍कूर व इब्री। 
महलीपाखें – एलाजार। एलाजारया सुं नं सन्‍तान मदु। 
कीशया सन्‍तान यरहमेल। 
अले मूशीया सन्‍तान – महली, एदेर व यरीमोत। लेवीत थथःगु परिवारकथं थुपिं हे खः। 
जुजु दाऊद, सादोक, अहीमेलेक, अले पुजाहारी व लेवीतय् नायःतय्‌गु न्‍ह्यःने थः थःथिति हारूनया सन्‍तानतय्‌सं याःगु थें इमिसं नं चिट्ठा तल। दकलय् तःधिकःम्‍ह दाजुया परिवारतय्‌त दकलय् चिधिकःम्‍हसिया परिवारयात थें हे व्‍यवहार यात। 
