﻿१ इतिहास.
17.
थःगु लाय्‌कुलिइ च्‍वनेधुंकाः छन्‍हु दाऊदं नातान अगमवक्तायात धाल, “थन जि देवदारु सिँ दय्‌कूगु लाय्‌कुलिइ च्‍वनाच्‍वनागु दु, तर परमप्रभुया बाचाया सनू धाःसा पालय् दु।” 
नातानं दाऊदयात धाल, “छिगु मनय् छु दु व यानादिसँ। परमेश्‍वर छिलिसे दी।” 
उखुन्‍हु चान्‍हय् परमेश्‍वरया वचन नातानयाथाय् वल, 
“आः वनाः जिम्‍ह दास दाऊदयात थथे धा। ‘परमप्रभुं थथे धयादी, जि च्‍वनेत जिगु लागि देगः दय्‌कीम्‍ह छ मखु। 
जिं इस्राएलीतय्‌त मिश्र देशं पित हयागु दिंनिसें थौं तक जि गुबलें देगलय् च्‍वनागु मदु। जि न्‍ह्याबलें पालय् च्‍वनागु दु अले छथासं मेगु थासय् वयेगु वनेगु यानाच्‍वना। 
गन गन जि इस्राएलनापं वयेगु वनेगु यानाः छु जिं जिगु लागि देवदारु सिँया देगः छाय् मदय्‌कागु धकाः इमि नायःतय्‌त न्‍यना ला?’” 
“उकिं आः वनाः जिम्‍ह दास दाऊदयात थथे धा, ‘दक्‍व शक्ति दुम्‍ह परमप्रभुं थथे धयादी, जिं छन्‍त ख्‍यलय् फैच्‍वलय् ज्‍वयेगु ज्‍यां लिकयाः इस्राएलया जिमि मनूतय् जुजु दय्‌का। 
छ गन गन वन, जि छनापं च्‍वना, अले जिं छिमि शत्रुतय्‌त छंगु न्‍ह्यःनेनं चीकाबिया। आः जिं छन्‍त पृथ्‍वीयापिं नांजाःपिं मनूत मध्‍ये छम्‍ह दय्‌काबी। 
जिं थः प्रजा इस्राएलया निंतिं छगूथाय् ल्‍यये। जिं अन हे इमित तये अले इपिं थःगु हे देशय् च्‍वनी। इमित आवंलि दुःख बी मखुत। 
अले जिं थः प्रजा इस्राएलया निंतिं न्‍याय याइपिं मनूत ल्‍ययागु इलंनिसें थुखे इमिसं न्‍हापा दुःख ब्‍यू थें दुष्‍ट मनूतय्‌सं इमित हाकनं गुबलें दुःख बी मखुत। जिं छिमि सकल शत्रुतय्‌त नं नाश यानाबी। “‘जि परमप्रभुं छंगु निंतिं छगू घराना दय्‌काबी धकाः जिं छन्‍त धाये। 
छ सिनाः छन्‍त थः पुर्खातनापं थुनेधुंकाः जिं छिमि छम्‍ह काय्‌यात जुजु दय्‌के, अले जिं वयागु राज्‍ययात बल्‍लाकाबी। 
जिगु लागि देगः दय्‌कीम्‍ह व हे जुइ, अले जिं वयागु सिंहासन न्‍ह्याबलेंया लागि पलिस्‍था याये। 
जि वया बौ जुइ अले व जिम्‍ह काय् जुइ। जिं छ स्‍वयाः न्‍हापा शासन याइम्‍ह शाऊलपाखें थःगु माया लित कयागु थें जिं वपाखें धाःसा जिगु सदां दयाच्‍वनीगु दयामाया गुबलें लित काये मखु। 
न्‍ह्याबलेंया लागि वयात जिं थःगु छेँ व राज्‍यया शासक दय्‌के। अले वयागु सिंहासन न्‍ह्याबलें दयाच्‍वनी।’” 
परमेश्‍वरं वयात धयादीगु फुक्‍क खँ नातानं दाऊदयात कन। 
अले दाऊद दुहां वनाः परमप्रभुया न्‍ह्यःने च्‍वन, अले वं थथे प्रार्थना यात, “हे परमप्रभु परमेश्‍वर, छिं जितः थन तक हयादीत जि सु खः धकाः अले जिगु परिवार छु खः धकाः? 
हे परमेश्‍वर, थ्‍व छिगु मिखाय् चिधंगु खँ जुल, छाय्‌धाःसा छिं थःदासया घरानाया लिपा वइगु ईया बारे धयादिल। हे परमप्रभु परमेश्‍वर, छिं जितः छम्‍ह तःधंम्‍ह मनू भापियादीगु दु। 
“थः दासयात ब्‍यूगु इज्‍जतया बारे दाऊदं छितः मेगु छु धाये फइ धकाः? हे परमप्रभु, छिं थः दासयात म्‍हस्‍यू। 
छिम्‍ह दासया लागि अले छिगु इच्‍छा कथं छिं थ्‍व तःधंगु ज्‍या यानादीगु दु, अले थुपिं फुक्‍क तःधंगु बचं सीके बियादीगु दु। 
“हे परमप्रभु, छि थें मेपिं सुं नं परमेश्‍वर मदु, अले जिमिसं थःगु हे न्‍हाय्‌पनं न्‍यनागु थें छि बाहेक मेम्‍ह मदु। 
अले छिगु जाति इस्राएल थें ज्‍याःगु जाति मेगु छु जाति दु धकाः? उद्धार यायेत परमेश्‍वर थः हे झाःगु पृथ्‍वीइ मेगु छुं जाति दु ला? छिं मिश्रं थः मनूतय्‌त त्‍वःतकाः थःगु नां तःधंकादिल, छिं अजू चायापुगु ज्‍या क्‍यनादिल अले इमिगु लँय् दंपिं जाति जातियात ख्‍यानाः छ्वयादिल। 
छिं थः प्रजा इस्राएलयात न्‍ह्याबलेंया लागि थःगु दय्‌कादीगु दु। अले छि हे परमप्रभु, इमि परमेश्‍वर जुयादीगु दु। 
“आः हे परमप्रभु, थः दास व जिगु घरानायात छिं छु बचं बियादीगु खः व न्‍ह्याबलेंया लागि थापं जुयाच्‍वनेमा। छिं बचं बियादीगु थें यानादिसँ। 
अले व थापं जुइमा व छिगु नां न्‍ह्याबलेंया लागि तःधनेमा। अले मनूतय्‌सं थथे धाइ, ‘दक्‍व शक्ति दुम्‍ह परमप्रभु इस्राएलयाम्‍ह खः, वय्‌कः इस्राएलया लागि हे परमेश्‍वर खः।’ अले छिं जिगु घरानायात सदा तयातइ। 
“जिमि परमेश्‍वर, छिम्‍ह दासं छिगु न्‍ह्यःने थ्‍व प्रार्थना यायेगु आँट यानागु दु छाय्‌धाःसा छिं थुपिं फुक्‍क खँ जि छिम्‍ह दासयात क्‍यनादिल अले जिमि सन्‍तानयात जुजु दय्‌के धकाः जितः धयादिल। 
हे परमप्रभु, छि हे परमेश्‍वर खः, अले छिं थः दासयात थ्‍व भिंगु बचं बियादीगु दु, 
व छिगु न्‍ह्यःने न्‍ह्याबलें दयाच्‍वनेमा धकाः आः छिं यय्‌काः थःदासया घरानायात सुवाः बियादीगु दु। परमप्रभु, छिं वयात सुवाः बियादिल अले वयाके न्‍ह्याबलें छिगु सुवाः दइ।” 
