﻿१ इतिहास.
14.
टुरोसयाम्‍ह जुजु हीरामं दाऊदयाथाय् दूतत छ्वल। वं दाऊदया लाय्‌कू दनेत खयःसिँ, दँकःमित व सिँकःमित नं छ्वल। 
अले परमप्रभुं थःत धात्‍थें हे इस्राएलयाम्‍ह जुजु दय्‌कादीगु दु धइगु खँ दाऊदं सिल। छाय्‌धाःसा परमेश्‍वरया प्रजा इस्राएलया निंतिं वयागु राज्‍य यक्‍व तःधंगु जुइ धुंकूगु खः। 
यरूशलेमय् दाऊदं मेपिं मिस्‍तलिसें नं ब्‍याहा यात। वया येक्‍व काय्‌पिं दत। 
अन बूपिं वया काय्‌पिनिगु नां थथे दु – शम्‍मूअ, शोबाब, नातान, सोलोमन, 
यिभार, एलीशूअ, एल्‍पेलेत, 
नोगह, नेपेग, यापी, 
एलीशामा, बेलीयादा व एलीपेलेत। 
दाऊद इस्राएल न्‍यंकयाम्‍ह जुजु जूगु खँ न्‍यनाः पलिश्‍तीतय्‌सं वयात ज्‍वनेत थः सकल सेना छ्वल। दाऊद नं थ्‍व खँ न्‍यनाः इपिंलिसें ल्‍वायेत वन। 
पलिश्‍तीतय्‌सं रपाईमया ब्‍यासिइ च्‍वंपिं मनूतय्‌त हमला यानाः इमिगु सामान लुतय् यात। 
अथे जुयाः दाऊदं परमेश्‍वरयाके न्‍यन, “जिं पलिश्‍तीतय्‌त हमला याये ला? छिं इमित जिगु ल्‍हातय् बियादी ला?” परमप्रभुं लिसः बियादिल, “हुँ, जिं इमित छंगु ल्‍हातय् बी।” 
दाऊद व वया सेना बाल-पराजीमय् वन। अन इमिसं पलिश्‍तीतय्‌त बुकल। अले वं धाल, “लः पंम्‍हुया पिहां वःगु थें जिमि शत्रुतय् विरोधय् परमेश्‍वरं जिपाखें पंम्‍हुया पिहां झाःगु दु।” अथे जुयाः व थाय्‌या नां बाल-पराजीम तल। 
पलिश्‍तीत बिस्‍युं वंबलय् इमिसं अन थः द्यःतय्‌गु मूर्तित त्‍वःताथकल अले दाऊदं उपिं मूर्तितय्‌त छ्वय्‌काछ्वयेगु आज्ञा बिल। 
हाकनं छकः पलिश्‍तीत वयाः उगु ब्‍यासिइ लुटपीट यात। 
उकिं दाऊदं हाकनं परमेश्‍वरयाके सल्‍लाह काल, अले परमेश्‍वरं वयात लिसः बियादिल, “च्‍वय् तप्‍यंक थाहां वने मते, चाःहिला हुँ। अले मेखेपाखें थाकुराः सिमाया न्‍ह्यःनेनं हमला या। 
छं थाकुराः सिमाया च्‍वका च्‍वकां सिपाइँत न्‍यासि वंगु थें च्‍वंगु सः न्‍यनीबलय् हमला या, छाय्‌धाःसा जि परमेश्‍वर छंगु न्‍ह्यः न्‍ह्यः पलिश्‍ती सेनायात बुकेत वने।” 
दाऊदं परमेश्‍वरया आज्ञा कथं यात। अले वं पलिश्‍तीतय्‌त बुकल। वं अज्‍ज पलिश्‍तीतय्‌त गिबोनंनिसें गेजेर तक लँ दुच्‍छि हे लिनायंकल। 
थथे दाऊदया नां फुक्‍क थासय् थ्‍यन। अले परमप्रभुं फुक्‍क जातियात वयागु भय काइपिं दय्‌कादिल। 
