﻿१ इतिहास.
11.
इस्राएलयापिं सकल मनूत हेब्रोनय् दाऊदयाथाय् मुंवयाः वयात थथे धाल, “जिपिं छिगु हे ला व हि खः। 
न्‍हापा शाऊल जुजु जुयाच्‍वंबलय् नं छि लडाइँलय् जिमि सिपाइँतय् न्‍ह्यलुवाः जुयादीगु खः। अले परमप्रभु छिकपिनि परमेश्‍वरं छितः थथे धयादिल, ‘छ जिम्‍ह मनूतय् जवाः व शासक जुइ।’” 
इस्राएलयापिं सकल थकालित हेब्रोनय् जुजु दाऊदयाथाय् वल। दाऊदं इपिंलिसें परमप्रभुया न्‍ह्यःने बाचा चिन। परमप्रभुं शमूएलया म्‍हुतुं धयादीगु थें हे इमिसं दाऊदयात इस्राएलया जुजु अभिषेक यात। 
दाऊद जुजु व सकल इस्राएलीत वनाः यरूशलेम शहरय् हमला यात। उबलय् यरूशलेम शहरयात यबूस धाइगु खः। उबलय् अन यबूसीत च्‍वनाच्‍वंगु खः। 
यबूसीतय्‌सं दाऊदयात धाल, “छ थ्‍व शहरय् गुबलें दुहां वये फइ मखु!” तर दाऊदं इमिगु सियोनया किल्‍ला त्‍याका काल। उकिं मनूतय्‌सं व शहरयात “दाऊदया शहर” धाल। 
दाऊदं धाल, “यबूसीतय्‌त दकलय् न्‍हापा हमला याइम्‍ह मनू सेनापति जुइ।” सरूयाहया काय् योआबं दकलय् न्‍हापा यबूसीतय्‌त हमला यात अले व सेनापति जुल। 
दाऊद वनाः किल्‍लाय् च्‍वंगु जुयाः उकियात “दाऊदया शहर” धयाहल। 
डाँडाया पुर्बपाखे चा जाय्‌काः माथं वंकाः तःगु थासय् शुरु यानाः वं शहर दय्‌कल। योआबं शहरयागु ल्‍यं दुगु ब्‍व दय्‌कल। 
अले दाऊद झन झन बल्‍लानावन। छाय्‌धाःसा दक्‍व शक्ति दुम्‍ह परमप्रभु वलिसे दी। 
सकल इस्राएलीतलिसें मिलय् जुयाः परमप्रभुयागु बचंकथं दाऊदयात इस्राएल न्‍यंकयाम्‍ह जुजु दय्‌केत व वयागु राज्‍य बल्‍लाकेत ग्‍वाहालि ब्‍यूपिं बहादुर सिपाइँतय् नायः थुपिं हे खः – 
हक्‍मोनी याशोबाम। याशोबाम नांजाःपिं स्‍वम्‍हय्‌सिया नायः खः। छगू लडाइँलय् वं याकचां हे स्‍वसःम्‍हय्‌सित भालां स्‍याःगु खः। 
वया लिपा अहोही दोदैया काय् एलाजार। व स्‍वम्‍ह बहादुर सिपाइँत मध्‍ये छम्‍ह खः। 
व पास-दम्‍मीमय् दाऊदलिसे दु। अन तछ्वया छगू बुँइ पलिश्‍तीत लडाइँ यायेत मुंगु खः। 
मनूत पलिश्‍तीतय् न्‍ह्यःनं बिस्‍युं वन तर दाऊद अले व जक बुँया दथुइ दनाः ल्‍वानाच्‍वन। अले उगु बुँयात बचय् यानाः इमिसं पलिश्‍तीतय्‌त बुकल। थुकथं परमप्रभुं इस्राएलीतय्‌त त्‍याकादिल। 
स्‍विम्‍ह सिपाइँत मध्‍ये तसकं नांजाःपिं स्‍वम्‍ह अदुल्‍लामया गुफाया लिक्‍क लाःगु ल्‍वहँतय् दाऊदयाथाय् क्‍वहां वन। पलिश्‍तीत रपाईमया ब्‍यासिइ छाउनी दय्‌काच्‍वनाच्‍वंगु खः। 
उबलय् दाऊद किल्‍लाय् दु। अले उबलय् बेथलेहेम कब्‍जा यानाः छपुचः पलिश्‍ती सिपाइँत अन च्‍वनाच्‍वंगु खः। 
दाऊद तसकं प्‍याः चाःगुलिं तःसलं धाल, “सुनां जितः बेथलेहेमया ध्‍वाखाया लिक्‍क च्‍वंगु तुंथिं लः त्‍वंकी?” 
अले उपिं स्‍वम्‍ह बहादुर सिपाइँत पलिश्‍तीतय् दथुं दुहां वनाः बेथलेहेमया ध्‍वाखाया लिक्‍क च्‍वंगु तुंथिं लः कयाः दाऊदयाथाय् हल। तर दाऊदं व लः त्‍वने मखु धाल। अले परमप्रभुया न्‍ह्यःने व लः प्‍वंकाः वं थथे धाल, 
“छु जिं थुपिं मनूतय्‌गु हि त्‍वनेगु ला? परमेश्‍वरं जितः थज्‍याःगु ज्‍या यायेत पनादीमा। थुमिसं थ्‍व लः थःगु ज्‍यान पानाः हःगु खः।” उकिं वं व लः त्‍वने मखु धाल। थुपिं स्‍वम्‍ह बहादुर सिपाइँतय्‌सं अज्‍याःगु तःधंगु ज्‍या याःगु खः। 
योआबया किजा अबीशै उपिं स्‍विम्‍हय्‌सिया नायः खः। छकः वं भालां स्‍वसःम्‍हय्‌सित स्‍यात अले थुकथं व उपिं स्‍वम्‍ह थें हे नांजाःम्‍ह मनू जुल। 
उपिं स्‍वम्‍ह स्‍वयाः व यक्‍व नांजाःम्‍ह जुयाः इमि नायः जुल, तर व उपिं स्‍वम्‍ह मध्‍ये छम्‍ह मजू। 
यहोयादाया काय् कब्‍सेलयाम्‍ह बनायाह बहादुर ज्‍या याःम्‍ह छम्‍ह बहादुर सिपाइँ खः। मोआबयापिं निम्‍ह दकलय् ल्‍वायेसःपिं सिपाइँतय्‌त स्‍याःम्‍ह व हे खः। छकः च्‍वापु गायाच्‍वंबलय् वं छगू गालय् क्‍वहां वनाः छम्‍ह सिंहयात स्‍यानाबिल। 
वं निगूत्‍या मिटर तःधीम्‍ह छम्‍ह मिश्रीयात नं स्‍यात। उम्‍ह मिश्रीया ल्‍हातय् तसकं ताहाकःगु व तःपुगु भाला दु। बनायाहं ल्‍हातय् छपु तःपुगु कथि कयाः वयात हमला यात। वं मिश्रीया ल्‍हातं भाला लाकाकाल। अले उकिं हे वयात स्‍यानाबिल। 
यहोयादाया काय् बनायाहं अज्‍याःगु तःधंगु ज्‍या याःगु खः। व उपिं स्‍वम्‍ह बहादुर सिपाइँत थें हे नांजाःम्‍ह सिपाइँ जुल। 
उपिं स्‍विम्‍ह मनू स्‍वयाः वयात यक्‍व इज्‍जत दत। तर व स्‍वम्‍ह मध्‍ये छम्‍ह मजू। वयात दाऊदं थः अङ्गरक्षकतय् नायः ल्‍यल। 
वया बहादुर सिपाइँत थुपिं हे खः – योआबया किजा असाहेल, बेथलेहेमयाम्‍ह दोदैया काय् एल्‍हानान, 
हारोदी शम्‍मोत, पेलोनी हेलेस, 
तकोयाम्‍ह इक्‍केशया काय् ईरा, अनातोतयाम्‍ह अबीएजेर, 
हूशाती सिब्‍बकै, अहोही ईलै, 
नतोपाती महरै, नतोपाती बानया काय् हेलेद, 
बेन्‍यामीनपाखें गिबाया रीबैया काय् ईथै, पिरातोनी बनायाह, 
गाशया खुसिचाया लिक्‍क च्‍वम्‍ह हूरै, अर्बाती, अबीएल, 
बहूरीमी अज्‍मावेत, शाल्‍बोनी एल्‍याहबा, 
गीजोनी हाशेमया काय्‌पिं, हरारी शागेया काय् जोनाथन, 
हरारी साकारया काय् अहीआम, ऊरया काय् एलीपाल, 
मकेराती हेपेर, पेलोनी अहियाह, 
कर्मेलया हेस्रो, एज्‍बैया काय् नारै, 
नातानया किजा योएल, हग्रीया काय् मिभार, 
अम्‍मोनी सेलेक, बेरोती नहरै गुम्‍ह सरूयाहया काय् योआबया ल्‍वाभः ज्‍वनीम्‍ह खः। 
यित्री ईरा, यित्री गारेब, 
हित्ती उरियाह, अहलैया काय् जाबाद, 
स्‍विम्‍ह मिजंतनापं रूबेनी शीजाया काय् अदीना। अदीना रूबेनीतय् छम्‍ह नायः खः। 
माकाया काय् हानान, मित्‍नी योशापात, 
अस्‍तेराती उज्‍जीया, अरोएरयाम्‍ह होतामया काय्‌पिं शमा व यीएल, 
शिम्रीया काय् येदीएल, वया किजा तिजी योहा, 
महाबी एलीएल, एल्‍नामया काय्‌पिं यरीबै व योशब्‍याह, मोआबी यित्‍मा, 
एलीएल, ओबेद व मेजोबी यासीएल। 
