﻿१ इतिहास.
6.
लेवीया काय्‌पिं – गेर्शोन, कहात व मरारी खः। 
कहातया काय्‌पिं – अम्राम, यिसहार, हेब्रोन व उज्‍जीएल खः। 
अम्रामया मस्‍त हारून, मोशा व मिरियम खः। हारूनया काय्‌पिं – नादाब, अबीहू, एलाजार व ईतामार खः। 
एलाजार पीनहासया बाः खः। पीनहास अबीशूया बाः खः। 
अबीशू बुक्‍कीया बाः खः। बुक्‍की उज्‍जीया बाः खः। 
उज्‍जी जरयाहया बाः खः। जरयाह मरायोतया बाः खः 
मरायोत अमर्याहया बाः खः। अमर्याह अहीतूबया बाः खः। 
अहीतूब सादोकया बाः खः। सादोक अहीमासया बाः खः। 
अहीमास अजर्याहया बाः खः। अजर्याह योहानानया बाः खः। 
योहानान अजर्याहया बाः खः। (थ्‍व अजर्याहं यरूशलेमय् सोलोमनं दय्‌कूगु परमप्रभुया देगलय् पुजाहारीया ज्‍या याइगु खः।) 
अजर्याह अमर्याहया बाः खः। अमर्याह अहीतूबया बाः खः। 
अहीतूब सादोकया बाः खः। सादोक शल्‍लूमया बाः खः। 
शल्‍लूम हिल्‍कियाहया बाः खः। हिल्‍कियाह अजर्याहया बाः खः। 
अजर्याह सरायाहया बाः खः। सरायाह यहोसादाकया बाः खः। 
परमप्रभुं नबूकदनेसरपाखें यहूदा व यरूशलेमयापिं मनूतय्‌त देशं पितिना यंकूबलय् यहोशापातयात नं पितिनायंकूगु खः। 
लेवीया काय्‌पिं – गेर्शोन, कहात व मरारी खः। 
गेर्शोनया, काय्‌पिनिगु नां लिब्‍नी व शिमी खः। 
कहातया काय्‌पिं – अम्राम, यिसहार, हेब्रोन व उज्‍जीएल खः। 
मरारीया काय्‌पिं – महली व मूशी खः। इमि बाःपिनि वंशकथं धलखय् च्‍वयातःगु लेवीया वंशत थुपिं हे खः – 
गेर्शोनया वंश थुपिं खः – लिब्‍नी गेर्शोनया काय् खः। येहाथ लिब्‍नीया काय् खः। जिम्‍माह येहाथया काय् खः। 
योआ जिम्‍माहया काय् खः। इद्दो योआया काय् खः। जेरह इद्दोया काय् खः। यातरै जेरहया काय् खः। 
थुपिं कहातया सन्‍तान खः – अम्‍मीनादाब कहातया काय् खः। कोरह अम्‍मीनादाबया काय् खः। अस्‍सीर कोरहया काय् खः। 
एल्‍काना अस्‍सीरया काय् खः। एब्‍यासाप एल्‍कानाया काय् खः। अस्‍सीर एब्‍यासापया काय् खः। 
तहत अस्‍सीरया काय् खः। उरीएल तहतया काय् खः। उज्‍जियाह उरीएलया काय् खः। शौल उज्‍जियाहया काय् खः। 
एल्‍कानाया काय्‌पिं – अमासै व अहीमोत खः। 
एहीमोतया काय् एल्‍काना खः। सोफै एल्‍कानाया काय् खः। नहत सोफैया काय् खः। 
एलीआब नहतया काय् खः। यरोहाम एलीआबया काय् खः। एल्‍काना यरोहामया काय् खः। शमूएल एल्‍कानाया काय् खः। 
शमूएलया काय्‌पिं – न्‍हापां बूम्‍ह योएल व मेम्‍ह अबिया खः। 
मरारीया सन्‍तान थुपिं खः – महली मरारीया काय् खः। लिब्‍नी महलीया काय् खः। शिमी लिब्‍नीया काय् खः। उज्‍जाह शिमीया काय् खः। 
शिमेअ उज्‍जाहया काय् खः। हग्‍गियाह शिमेअया काय् खः। असायाह हग्‍गियाहया काय् खः। 
बाचाया सनू परमप्रभुया पवित्र पालय् तयेधुंकाः अन भजन हालेत व बाजं थायेत दाऊद जुजुं थुपिं मनूतय्‌त जिम्‍मा ब्‍यूगु खः। 
इमिसं यरूशलेमय् सोलोमन जुजुं परमप्रभुया देगः मदंतलय् नापलायेगु पालय् संगीतपाखें सेवा याइगु खः। इमिसं इमिगु निंतिं दय्‌काब्‍यूगु नियमकथं थथःगु ज्‍या याइगु। 
थःकाय्‌पिंलिसें मिलय् जुयाः सेवा याइपिं मनूत थुपिं हे खः – कहात वंशयाम्‍ह म्‍ये स्‍यनीम्‍ह हेमान। हेमान योएलया काय् खः। योएल शमूएलया काय् खः। 
शमूएल एल्‍कानाया काय् खः। एल्‍काना यरोहामया काय् खः। यरोहाम एलीएलया काय् खः। एलीएल तोहया काय् खः। 
तोह सूपया काय् खः। सूप एल्‍कानाया काय् खः। एल्‍काना महतया काय् खः। महत अमासैया काय् खः। 
अमासै एल्‍कानाया काय् खः। एल्‍काना योएलया काय् खः। योएल अजर्याहया काय् खः। अजर्याह सपन्‍याहया काय् खः। 
सपन्‍याह तहतया काय् खः। तहत अस्‍सीरया काय् खः। अस्‍सीर एब्‍यासापया काय् खः। एब्‍यासाप कोरहया काय् खः। 
कोरह यिसहारया काय् खः। यिसहार कहातया काय् खः। कहात लेवीया काय् खः। लेवी इस्राएलया काय् खः। 
हेमानया न्‍हापांम्‍ह ग्‍वाहालिमि आसाप खः। आसाप बेरेक्‍याहया काय् खः। बेरेक्‍याह शिमेअया काय् खः। 
शिमेअ मिखाएलया काय् खः। मिखाएल बासेयाहया काय् खः। बासेयाह मल्‍कियाहया काय् खः। 
मल्‍कियाह एत्‍नीया काय् खः। एत्‍नी जेरहया काय् खः। जेरह अदायाहया काय् खः। 
अदायाह एतानया काय् खः। एतान जिम्‍माहया काय् खः। जिम्‍माह शिमीया काय् खः। 
शिमी यहतया काय् खः। यहत गेर्शोनया काय् खः। गेर्शोन लेवीया काय् खः। 
हामानया निम्‍हम्‍ह ग्‍वाहालिमि मरारी कुलयाम्‍ह एतान खः। एतान कीशीया काय् खः। कीशी अब्‍दीया काय् खः। अब्‍दी मल्‍लूकया काय् खः। 
मल्‍लूक हशब्‍याहया काय् खः। हशब्‍याह अमस्‍याहया काय् खः। अमस्‍याह हिल्‍कियाहया काय् खः। 
हिल्‍कियाह अम्‍सीया काय् खः। अम्‍सी बानीया काय् खः। बानी शेमेरया काय् खः। 
शेमेर महलीया काय् खः। महली मूशीया काय् खः। मूशी मरारीया काय् खः। मरारी लेवीया काय् खः। 
इमि लेवी थःथितितय्‌त परमेश्‍वरया नापलायेगु पालया मेगु ज्‍याया लागि ल्‍यःगु खः। 
अय्‌नं हारून व वया सन्‍तानतय्‌त जक होमबलिया वेदीइ होमबलि छायेगु व गुँगू थनेगु वेदीइ गुँगू थनेगु अनुमति दु। महा-पवित्र थासय् याइगु फुक्‍क आराधनाया ज्‍या व फुक्‍क इस्राएलया पाप प्रायश्‍चित यायेत होमबलि छायेगु ज्‍या इमिगु जिम्‍माय् खः। परमेश्‍वरया दास मोशां ब्‍यूगु आज्ञाकथं इमिसं व फुक्‍क ज्‍या याइगु। 
हारूनया सन्‍तान थुपिं खः – एलाजार हारूनया काय् खः। पीनहास एलाजारया काय् खः। अबीशू पीनहासया काय् खः। 
बुक्‍की अबीशूया काय् खः। उज्‍जी बुक्‍कीया काय् खः। जरयाह उज्‍जीया काय् खः। 
मरायोत जरयाहया काय् खः। अमर्याह मरायोतया काय् खः। अहीतूब अमर्याहया काय् खः। 
सादोक अहीतूबया काय् खः। अहीमास सादोकया काय् खः। 
हारूनया सन्‍तानया कहाती वंशयात ब्‍यूगु इलाकाय् इमिगु बस्‍तीत थुपिं हे खः – (लेवीतय्‌त ब्‍यूगु जमिनया न्‍हापांगु भाग कहातीतय्‌त दत।) 
इमित यहूदाय् हेब्रोन व उकिया जःखः च्‍वंगु पशु ज्‍वयेगु थाय्‌त बिल। 
तर शहरया जःखः च्‍वंगु बुँ व बस्‍तीत धाःसा यपुन्‍नेया काय् कालेबयात बिल। 
उकिं हारूनया सन्‍तानतय्‌त पशु ज्‍वयेगु थाय्‌तनापं थुपिं शहरत बिल – हेब्रोन (शरण शहर), अले लिब्‍ना, यत्तीर, एश्‍तमो, 
हीलन, दबीर, 
आशान, युत्ता व बेथ-शमेश। 
अले बेन्‍यामीन कुलया इलाकां गेबा, आलेमेत, अनातोत इमि पशु ज्‍वयेगु थाय्‌तनापं थुपिं शहरत बिल। कहातीया वंशतय्‌त झिंस्‍वंगू शहरत बिल। 
कहातया ल्‍यंदुपिं सन्‍तानतय्‌त धाःसा मनश्‍शेया बच्‍छि कुलया इलाकां झिगू शहर बिल। 
गेर्शोनया सन्‍तानतय्‌त इमि वंश वंशकथं इस्‍साखार, आशेर, नप्‍ताली व बाशानय् दुगु मनश्‍शे कुलया इलाकां झिंस्‍वंगू शहर बिल। 
मरारीया सन्‍तानतय्‌त इमि वंश वंशकथं रूबेन, गाद व जबूलून कुलया इलाकां झिंनिगू शहर बिल। 
थुकथं इस्राएलीतय्‌सं लेवीतय्‌त थुपिं शहरत व उकिया पशु ज्‍वयेगु थाय्‌तनापं बिल। 
च्‍वय् च्‍वयातःगु शहरत यहूदा, शिमियोन व बेन्‍यामीन कुलया इलाकां इमित ब्‍यूगु खः। 
कहातया छुं वंशतय्‌त एफ्राइम कुलया इलाकां छुं शहरत ब्‍यूगु खः। 
इमित एफ्राइमया पहाडी देशय् शकेम (छगू शरण नगर) गेजेर, 
योक्‍माम, बेथ-होरोन, 
अय्‌यालोन व गात-रिम्‍मोन, उकिया पशु ज्‍वयेगु थाय्‌तनापं बिल। 
मनश्‍शेया बच्‍छि कुलया इलाकां इस्राएलीतय्‌सं आनेर व बिलाम, उकिया पशु ज्‍वयेगु थाय्‌तनापं कहातया ल्‍यं दुगु वंशतय्‌त बिल। 
गेर्शोनीतय्‌त थुपिं शहरत उकिया जःखः च्‍वंगु पशु ज्‍वयेगु थाय्‌तनापं ब्‍यूगु खः। मनश्‍शेया बच्‍छि कुलया इलाकां बाशानय् गोलान व अस्‍तारोत। 
इस्‍साखारया इलाकां-केदेश, दाबरत, 
रामोत व अनेम। 
आशेरया इलाकां-माशाल, अब्‍दोन, 
हूकोक व रहोब। 
नप्‍तालीया इलाकां-गालीलय् केदेश, हम्‍मोन व किर्यातैम। 
मरारीतय्‌त (लेवीतय् ल्‍यंदुपिन्‍त) पशु ज्‍वयेगु थाय्‌नापं थुपिं शहरत बिल-जबूलुनया इलाकां-योक्‍माम, कर्तह, रिम्‍मोनी व तबोर। 
रूबेनया इलाकां यरीहोया पुर्बय् यर्दनया उखे मरुभूमिइ दुगु बेसेर, यहसाह, 
कदेमोत व मेपात। 
गादया इलाकां गिलादय् रामोत, महनोम, 
हेश्‍बोन व याजेर। 
