﻿१ इतिहास.
3.
हेब्रोनय् बूपिं दाऊदया काय्‌पिं थुपिं हे खः – तःधिकःम्‍ह काय् अमनोन, थ्‍वया मां यिजरेलयाम्‍ह अहीनोम खः। माइलाम्‍ह दानिएल, थ्‍वया मां कर्मेलयाम्‍ह अबीगेल खः। 
साइँलाम्‍ह काय् अब्‍शालोम, थ्‍वया मां गशूरयाम्‍ह जुजु तल्‍मैया म्‍ह्याय् माका खः। काइँलाम्‍ह अदोनियाह, थ्‍वया मां हग्‍गीत खः। 
न्‍याम्‍हम्‍ह शपत्‍याह, थ्‍वया मां अबीतल खः। अले चिधिकःम्‍ह यित्राम, थ्‍वया मां दाऊदया कलाः एग्‍ला खः। 
हेब्रोनय् दाऊदया खुम्‍ह काय्‌पिं दत। अन वं न्‍हय्‌दँ व खुला राज्‍य यात। यरूशलेमय् वं स्‍विस्‍वदँ राज्‍य यात। 
यरूशलेमय् अम्‍मीएलया म्‍ह्याय् बतशेबापाखें प्‍यम्‍ह काय्‌पिं बुल- शम्‍मूअ, शोबाब, नातान व सोलोमन। थुपिं पेम्‍हसित अम्‍मीएलया म्‍ह्याय् बतशेबां बुइकूगु खः। 
वया मेपिं गुम्‍ह काय्‌पिं नं दु। थुपिं यिभार, एलीशूअ, एलीपेलेत, 
नोगह, नेपेग, यापी, 
एलीशामा, एल्‍यादा व एलीपेलेत खः। 
थुपिं सकलें दाऊदया काय्‌पिं खः। थुमित त्‍वःताः दाऊदया मथ्‍याःपिं कलाःपिनिपाखें नं मस्‍त दु। इमि क्‍यहेँ तामार खः। 
सोलोमनया काय् रहबाम खः, रहबामया काय् अबिया खः, अबियाया काय् आसा खः, आसाया काय् यहोशापात खः, 
यहोशापातया काय् यहोराम खः, यहोरामया काय् अहज्‍याह खः, अहज्‍याहया काय् योआश खः, 
योआशया काय् अमस्‍याह खः, अमस्‍याहया काय् अजर्याह खः, अजर्याहया काय् योताम खः, 
योतामया काय् आहाज खः, आहाजया काय् हिजकिया खः, हिजकियाया काय् मनश्‍शे खः, 
मनश्‍शेया काय् अमोन खः, अमोनया काय् योशियाह खः। 
योशियाहया काय्‌पिं तःधिकःम्‍ह योहानान, माइलाम्‍ह येहोयाकीम, साइँलाम्‍ह सिदकियाह, व चिधिकःम्‍ह शल्‍लूम खः। 
यहोयाकीमया काय्‌पिं यहोयाकीन व सिदकियाह खः। 
बेबिलोनय् ज्‍वनायंकूपिं यहोयाकीन जुजुया काय्‌पिं थुपिं खः – शालतिएल, 
मल्‍कीराम, पदायाह, शेनस्‍सर, यकम्‍याह, होशामा व नदब्‍याह खः। 
पदायाहया काय्‌पिं यरूबाबेल व शिमी खः। यरूबाबेलया काय्‌पिं मशुल्‍लाम व हनन्‍याह खः। इमि केहेँ शलोमीत खः। 
यरूबाबेलया मेपिं न्‍याम्‍ह काय्‌पिं दु। थुपिं हशूबा, ओहेल, बेरेक्‍याह, हसदयाह व यूशप-हेसेद खः। 
हनन्‍याहया काय्‌पिं पलत्‍याह व यशयाह खः। यशयाहया काय् रपायाह खः, रपायाहया काय् अर्नान खः। अर्नानया काय् ओबदिया व ओबदियाया काय् शकन्‍याह खः। 
शकन्‍याहया सन्‍तान – शकन्‍याहया छम्‍ह काय् शमायाह व न्‍याम्‍ह छय्‌पिं, हत्तूश, यिगाल, बारीह, नार्याह व शाफात खः। 
नार्याहया स्‍वम्‍ह काय्‌पिं दु। थुपिं एल्‍योएनैया, हिस्‍कियाह व अज्रीकाम खः। 
एल्‍यहोएनैया न्‍हय्‌म्‍ह काय्‌पिं दु। थुपिं होदबिया, एल्‍यासीब, पलयाह, अक्‍कूब, योहानान, दलायाह व अनानी खः। 
