﻿२ राजा.
8.
एलीशां शूनम्‍मीय् च्‍वंम्‍ह गुम्‍ह मिसाया काय्‌यात हाकनं म्‍वाकूगु खः वयात वं धाःगु खः, “थः परिवारनापं छ छुं ईया लागि मेगु देशय् च्‍वंहुँ, छाय्‌धाःसा परमप्रभुं न्‍हय्‌दँ तक अनिकाल जुइगु आज्ञा बियादीगु दु। न्‍हय्‌दँ तक थ्‍व देशय् अनिकाल जुयाच्‍वनी।” 
परमेश्‍वरया मनुखं धाःथें व मिसां यात। अले व मिसा थः परिवारनापं वनाः पलिश्‍तीतय् देशय् न्‍हय्‌दँ तक च्‍वन। 
न्‍हय्‌दँ लिपा व पलिश्‍तीतय् देशं लिहां वल, अले थःगु छेँ व बुँ लित कायेगु लागि बिन्‍ति यायेत जुजुयाथाय् वन। 
जुजु उबलय् परमेश्‍वरया मनूया च्‍यः गेहजीनापं खँ ल्‍हानाच्‍वंगु खः। वं धाल, “एलीशां याःगु फुक्‍क ततःधंगु ज्‍या जितः कँ।” 
गेहजीं जुजुयात एलीशां छम्‍ह सीम्‍ह मनूयात म्‍वाकूगु खँ कनाच्‍वंबलय् हे गुम्‍ह मिसाया काय्‌यात वं म्‍वाकूगु खः व हे मिसा थःगु छेँबुँया निंतिं बिन्‍ति यायेत वल। गेहजीं धाल, “हे जिमि प्रभु महाराज, व मिसा थ्‍व हे खः, एलीशां म्‍वाकूम्‍ह वया काय् थ्‍व हे खः।” 
जुजुं व मिसायाके उकिया बारे न्‍यन, वं जुजुयात फुक्‍क खँ कन। अले वं वयागु मुद्दा छम्‍ह हाकिमया जिम्‍माय् बियाः वयात थथे धाल, “वयागु छु छु खः, व फुक्‍क वयात लितब्‍यु, व देश त्‍वःतावंबलय्‌ निसें आः तक वयागु बुँइ छु छु सल व फुक्‍क वयात लितब्‍यु।” 
अरामया जुजु बेन-हदद म्‍हं मफयाच्‍वंबलय् एलीशा दमस्‍कसय् वन। “परमेश्‍वरया मनू थन वयाच्‍वंगु दु” धकाः जुजुयात खबर बिल। 
जुजुं थः भारदार हजाएलयात धाल, “छगू कोस्‍यलि ज्‍वनाः परमेश्‍वरया मनूयात नापलाः हुँ। वपाखें परमेश्‍वरयाके सल्‍लाह का अले न्‍यँ ‘छु जि थ्‍व ल्‍वय्‌पाखें लनी ला?’” 
हजाएलं कोस्‍यलि बीत दमस्‍कसया दकलय् भिंगु भिंगु ज्‍वलं कयाः पिइम्‍ह ऊँटया म्‍हय् तल। अले व एलीशायात नापलाः वन। वयात नाप लानाः हजाएलं धाल, “छिकपिनि च्‍यः बेन-हदद जुजुं व लनी कि लनी मखु धकाः न्‍यनेत जितः छिथाय् छ्वयाहःगु खः।” 
एलीशां लिसः बिल, “वनाः वयात धा, ‘छ धात्‍थें लनी।’ तर परमप्रभुं जितः व धात्‍थें सीगु क्‍यनादीधुंकूगु दु।” 
अनंलि एलीशां वयात त्‍वालां स्‍वयाच्‍वन, हजाएल मछाल। अले परमेश्‍वरया मनू ख्‍वल। 
हजाएलं न्‍यन, “हे जिमि प्रभु, छाय् ख्‍वयादियागु?” एलीशां लिसः बिल, “छं इस्राएलया मनूतय्‌गु विरोधय् गज्‍याःगु मभिंगु ज्‍या याइ धकाः जिं स्‍यू। छं इमिगु किल्‍ला किल्‍लाय् मि तयाबी। छं इमि ल्‍याय्‌म्‍हपिन्‍त तरवारं स्‍याइ, इमि चिचिधिकःपिं मस्‍तय्‌त बँय् बस्‍वानाः स्‍याइ। प्‍वाथय् दुपिं मिसातय्‌गु प्‍वाः चिरिफायाबी।” 
हजाएलं धाल, “जि ला खिचा थें ज्‍याःम्‍ह खः। जि ला छुं नं मखु। जिं थज्‍याःगु ततःधंगु ज्‍या गथे यानाः याये फइ?” एलीशां लिसः बिल, “छ अरामया जुजु जुइ धकाः परमप्रभुं जितः क्‍यनादीगु दु।” 
हजाएल एलीशाया थासं बेन-हददयाथाय् लिहां वल। जुजुं न्‍यन, “एलीशां छु धाल थें?” हजाएलं लिसः बिल, “छ धात्‍थें लनी धकाः वं धाल।” 
कन्‍हय् खुन्‍हु वं फांगा कयाः लखय् प्‍याकाः जुजुया ख्‍वाः त्‍वपुयाबिल। उकिं व सित। अनंलि हजाएल जुजु जुल। 
इस्राएलया जुजु आहाबया काय् योराम जुजु जूगु न्‍यादँ दुबलय्, अले यहोशापात यहूदायाम्‍ह जुजु जुयाच्‍वंबलय् हे यहोशापातया काय् यहोरामं यहूदाया जुजु जुयाः थःगु शासन शुरु यात। 
व स्‍विनिदँ दुबलय् गद्दीइ च्‍वन। वं यरूशलेमय् च्‍यादँ राज्‍य यात। 
आहाबया घरानां याःथें व इस्राएलयापिं जुजुपिं जूगु थें जुल। छाय्‌धाःसा वं आहाबया म्‍ह्याय्‌नापं ब्‍याहा यात। वं परमप्रभुयात मयःगु मभिंगु ज्‍या यात। 
अथेसां थः दास दाऊदया निंतिं परमप्रभुं यहूदायात नाश याये मास्‍ति वय्‌कामदी, छाय्‌धाःसा दाऊद व वया सन्‍तानयात न्‍ह्याबलें जः बियाच्‍वनीगु छप्‍वाः मत बी धकाः वय्‌कलं बचं बियादीगु खः। 
यहोरामया इलय् एदोमीतय्‌सं यहूदाया विरोधय् विद्रोह यानाः थःगु लागि छम्‍ह जुजु ल्‍यल। 
अथे जुयाः यहोराम थःगु फुक्‍क रथत ज्‍वनाः जाईरपाखे वन। एदोमीतय्‌सं वयात व वया रथया कप्‍तानतय्‌त घेरय् यात, तर व चान्‍हय् दनाः बिस्‍युं वन। वया सिपाइँत धाःसा थथःगु छेँय् बिस्‍युं वन। 
उकिं थौं तक नं एदोमं यहूदाया विरोधय् विद्रोह यानाच्‍वंगु दु। अबलय् हे लिब्‍नां नं विद्रोह यात। 
यहोराम जुजु जुयाच्‍वंबलय् जूगु फुक्‍क खँ, वं याःगु फुक्‍क ज्‍या यहूदाया जुजुपिनिगु इतिहासया सफुलिइ च्‍वयातःगु दु। 
यहोराम थः पुर्खात थें सित। वयात इपिंनापं दाऊदया शहरय् थुन। वयागु थासय् वया काय् अहज्‍याह जुजु जुल। 
आहाबया काय् योराम इस्राएलया जुजु जूगु झिंनिदँ दुबलय् यहोरामया काय् अहज्‍याह यहूदाया जुजु जुल। 
अहज्‍याह निइनिदँ दुबलय् जुजु जूगु खः। वं दच्‍छि यरूशलेमय् राज्‍य यात। वया मांया नां अतल्‍याह खः। अतल्‍याह इस्राएलया जुजु ओम्रीया छय् खः। 
अहज्‍याह आहाबया घराना जू थें जुल। आहाब जुजुलिसें वयागु ब्‍याहाया स्‍वापु दु। आहाबया घरानां थें वं नं परमप्रभुयात मयःगु मभिंगु ज्‍या यात। 
अहज्‍याह जुजु आहाबया काय् योरामलिसें अरामया जुजु हजाएललिसें रामोत-गिलादय् लडाइँ यायेत वन। तर लडाइँलय् अरामीतय्‌सं योरामयात घाःपाः यानाबिल। 
उकिं अरामया जुजु हजाएललिसें लडाइँ याःवंबलय् जूगु घाः लंकेत व यिजरेल शहरय् लिहां वल। अहज्‍याह वयात अन स्‍वःवन। 
