﻿१ राजा.
14.
अबलय् हे यारोबामया काय् अबिया बिरामी जुल। 
यारोबामं थः कलाःयात धाल, “छ यारोबामया कलाः खः धकाः सुनानं म्‍हमसीकेत छं थःत मेम्‍ह थें च्‍वंकि। अले छ शीलोय् हुँ। अन जि इस्राएलयाम्‍ह जुजु जुइ धकाः धाःम्‍ह अहियाह अगमवक्ता दु। 
छ वयाथाय् झिपा मरि, भचा ग्‍वारमरि व छथल कस्‍ति ज्‍वनाः हुँ। झी काय्‌यात छु जुइ धकाः वयाके न्‍यँ, वं छन्‍त धाइ।” 
यारोबामया कलातं वं धाःथें हे यात। व शीलोय् अहियाहया छेँय् वन। बुरा जूगुलिं अहियाहं मिखा मखने धुंकल। 
परमप्रभुं अहियाहयात थथे धयादीगु खः, “यारोबामया कलाः छंके थः बिरामी जूम्‍ह काय्‌या बारे न्‍यनेत वयाच्‍वंगु दु। छं वयात थथे धा। व वइबलय् वं थःत म्‍हमसीक मेम्‍ह थें च्‍वंकी।” 
लुखाय् वयागु पलाःया सः न्‍यनाः अहियाहं धाल, “अय् यारोबामया कलाः, दुहां वा! छाय् छं थथे बहाना यानागु? जिके छंगु लागि छगू बांमलाःगु खबर दु। 
वनाः यारोबामयात थथे धा, परमप्रभु, इस्राएलया परमेश्‍वरं थथे धयादी, ‘जिं छन्‍त मनूतय्‌गु दथुं थकयाः जिमि प्रजा इस्राएलया शासक दय्‌का। 
दाऊदया घरानाया ल्‍हातं राज्‍य लाकाकयाः जिं छन्‍त बिया। तर छ जिम्‍ह दास दाऊद थें मजू। दाऊदं जिगु आज्ञा मानय् यात, जितः यःगु ज्‍या यायेत दुनुगलंनिसें जिगु ल्‍यू जुल। 
छंगु न्‍हापा शासन याःपिं जुजुपिन्‍सं स्‍वयाः छं यक्‍व अप्‍वः मभिंगु ज्‍या याःगु दु। छं जितः हेला याःगु दु अले पुजा यायेत धातुया मूर्तित दय्‌काः जितः तंचाय्‌कूगु दु। छं थःगु जँ जिपाखे फहीकूगु दु। 
“‘अथे जुयाः जिं यारोबामया घरानाय् विपत्ति हयाबी। जिं इस्राएलय् दुपिं यारोबामया परिवारयापिं दासतनापं फुक्‍क सन्‍तानतय्‌त स्‍यानाबी। जिं यारोबामया घरानायात नाश यानाबी अले सौयात च्‍याकू थें च्‍याकाबी। 
यारोबामया छेँयाम्‍ह सुं शहरय् सित धाःसा वयात खिचां नइ, बुँइ सित धाःसा गिद्धतय्‌सं नइ। परमप्रभुं थथे धयादीगु दु!’ 
“उकिं छ दनाः थःगु छेँय् हुँ। छं शहरया दुने पलाः तयेवं हे व काय्‌मचा सी। 
इस्राएलयापिं फुक्‍क मनूतय्‌सं नुगः मछिंकाः वयात थुनाबी। छाय्‌धाःसा परमप्रभु, इस्राएलया परमेश्‍वरं वयाके जक छुं भिंगु खँ लुइकादीगुलिं यारोबामया परिवारयापिं मध्‍ये वयात जक थुनी। 
“परमप्रभुं इस्राएलय् छम्‍ह जुजु ल्‍ययादी, अले वं उखुन्‍हु हे यारोबामया परिवारयात नाश यानाबी। व दिं थौं हे खः। खः, थौं हे खः। 
परमप्रभुं इस्राएलयात सजाँय बियादी अले व खुसिइ तिंकथि संगु थें सनी। वय्‌कलं इस्राएलीतय्‌त इमि पुर्खातय्‌त बियादीगु थ्‍व भिंगु देशं लिनादी अले यूफ्रेटिस खुसिया पारि थुखेलाः उखेलाः मदय्‌काबी। छाय्‌धाःसा अशेरा द्यःमय्‌जुया मूर्ति दय्‌काः इमिसं वय्‌कःयात तंचाय्‌कूगु दु। 
यारोबामं याःगु पाप व वं इस्राएलीतय्‌त याकूगु पापं यानाः परमप्रभुं इस्राएलयात त्‍वःतादी।” 
अले यारोबामया कलाः तिर्साय् लिहां वन। वं छेँया लुखाखलुइ पलाः तयेवं काय्‌मचा सित। 
परमप्रभुं थः दास अहियाहपाखें धयादीगुकथं इमिसं वयात थुन, सकलें इस्राएलीतय्‌सं वयागु निंतिं नुगः मछिंकल। 
यारोबाम जुजु जुयाच्‍वंबलय् जूगु फुक्‍क खँ, वं याःगु लडाइँ व वं गुकथं शासन यात धइगु खँ इस्राएलया जुजुपिनिगु इतिहासया सफुलिइ च्‍वयातःगु दु। 
यारोबामं निइनिदँ शासन यात। व थः पुर्खात थें सीधुंकाः वयात थुन। वया लिपा वया काय् नादाब जुजु जुल। 
सोलोमनया काय् रहबामं यहूदाय् शासन यात। व पिइछदँ दुबलय् जुजु जुल। इस्राएलया फुक्‍क कुलया दथुं थःगु नां तयेत परमप्रभुं ल्‍ययादीगु शहर यरूशलेमय् वं झिंन्‍हय्‌दँ शासन यात। वया मांया नां नामा खः, व छम्‍ह अम्‍मोनी खः। 
यहूदाया मनूतय्‌सं परमप्रभुं याये मते धकाः धयादीगु मभिंगु ज्‍या यात। इमि पुर्खातय्‌सं स्‍वयाः अप्‍वः पाप यानाः इमिसं वय्‌कःयात तंचाय्‌का नुगः मुइकल। 
इमिसं थःगु निंतिं पुजा याइगु थाय्, च्‍वखगु ल्‍वहंया थां व अशेरा द्यःमय्‌जुया थांत फुक्‍क गुँच्‍वकाय् च्‍वकाय् व फुक्‍क वाउँगु सिमाया क्‍वय् थापं यात। 
देशया फुक्‍क पुजा याइगु थासय् मिजं वेश्‍यात नं दु। परमप्रभुं इस्राएलया न्‍ह्यःनं पितिनाछ्वःपिं जात जातियापिनि घच्‍चाइपुगु ज्‍या मनूतय्‌सं याना हल। 
रहबाम जुजु जुयाच्‍वंगु न्‍यागूगु दँय् मिश्र देशयाम्‍ह जुजु शीशकं यरूशलेमय् हमला यात। 
वं परमप्रभुया देगः व जुजुया दरबारया मू मू वंगु सामान लुटे यानायंकल। वं सोलोमनं दय्‌कूगु लुँया ढालतनापं फुक्‍क हे यंकल। 
उकिं रहबाम जुजुं उकिया पलेसा कँय्‌या ढालत दय्‌काः दरबारया लुखा पिवाःतय् कप्‍तानतय्‌त बिल। 
जुजु परमप्रभुया देगलय् वंक्‍वपतिकं लुखा पिवाःतय्‌सं उपिं ढालत पित हइगु, लिपा हाकनं उपिं ढालत पिवाःत च्‍वनीगु क्‍वथाय् लित यंकीगु। 
रहबाम जुजु जुयाच्‍वंबलय् जूगु फुक्‍क खँ, वं याःगु फुक्‍क ज्‍या यहूदाया जुजुपिनिगु इतिहासया सफुलिइ च्‍वयातःगु दु। 
रहबाम व यारोबामया दथुइ मदिक्‍क लडाइँ जुया हे च्‍वन। 
रहबाम थः पुर्खात थें सित। वयात दाऊदया शहरय् इपिंनापं थुन। वया मां नामा खः, व अम्‍मोन देशयाम्‍ह खः। रहबामया लिपा वया काय् अबिया जुजु जुल। 
