﻿१ राजा.
9.
सोलोमन जुजुं परमप्रभुया देगः, दरबार व थःत यःगु फुक्‍क दय्‌के धुंकाः 
परमप्रभुं गिबोनय् थें हाकनं वयात दर्शन बियादिल। 
परमप्रभुं वयात धयादिल, “जिं छंगु प्रार्थना व जिगु न्‍ह्यःने याःगु बिन्‍ति न्‍यनागु दु। छं दय्‌कूगु थ्‍व देगलय् जिं थःगु नां न्‍ह्याबलेंया निंतिं तयाः उकियात पवित्र यानागु दु। जिगु मिखा व मन न्‍ह्याबलें अन वनाच्‍वनी। 
“छ इमान्‍दार नुगलं व सोझा जुयाः छिमि बौ दाऊद थें जिगु न्‍ह्यःने जुल धाःसा, जिं बियागु फुक्‍क आज्ञा, विधित व नियमत मानय् यात धाःसा 
जिं छंगु सिंहासनयात सदां बल्‍लाकाबी। जिं छिमि अबु दाऊदयात थथे धकाः बचं बियागु खः, ‘छिमि परिवारय् इस्राएलया सिंहासनय् च्‍वनेत न्‍ह्याबलें छम्‍ह मनू दइ।’ 
“तर छ वा छिमि सन्‍तानं जिपाखें फहिलाः जिं छन्‍त बियागु आज्ञा व विधित मानय् मयात धाःसा अले मेपिं द्यःत पुजायात धाःसा 
जिं इस्राएलयात बियागु देशं इमित लिनाछ्वये अले जिं जिगु नांया इज्‍जतया निंतिं पवित्र यानागु थ्‍व देगः नं त्‍वःताबी। अले इस्राएलीत खनाः फुक्‍क मनूत न्‍हिली, अले फुक्‍क मनूतय्‌गु दथुइ इमित हेस्‍याइ अले क्‍वह्यंकी। 
आः थ्‍व देगः ल्‍वहंया द्वं जुइ, थ्‍व देगःयागु न्‍ह्यःनें वनीपिं सकलें थ्‍व खनाः थारान्‍हुइ अले इमिसं थथे धाइ, ‘छाय् परमप्रभुं थ्‍व देशयात व थ्‍व देगःयात थथे यानादीगु जुइ?’ 
मनूतय्‌सं थथे लिसः बी, ‘थः पुर्खातय्‌त मिश्रं पित हयादीम्‍ह परमप्रभु थः परमेश्‍वरयात त्‍वःताः इमिसं मेपिं द्यःतय्‌त पुजायात। उकिं परमप्रभुं थ्‍व विपत्ति इमिथाय् हयादीगु खः।’” 
परमप्रभुया देगः व थःगु दरबार दनेत सोलोमनयात निइदँ बीत। 
टुरोसया जुजु हीरामं सोलोमनयात माःगु फुक्‍क स्‍वसिमा सिँ, थसिँ व लुँ ब्‍यूगु खः। उकिं सोलोमन जुजुं हीरामयात गालीलय् निइगू शहर बिल। 
सोलोमनं ब्‍यूगु शहरत स्‍वयेत टुरोसं हीराम अन वःबलय् वयात उपिं मयय्‌ल। 
वं सोलोमनयात धाल, “अय् जिमि किजा, छिं जितः गज्‍याःगु गज्‍याःगु शहर बियादियागु?” अले वं उमिगु नां काबुल तल। थौं तक नं उमिगु नां काबुल हे जुयाच्‍वंगु दु। 
हीरामं सोलोमनयात ४,००० किलोग्राम लुँ छ्वःगु खः। 
परमप्रभुया देगः, थःगु दरबार, तिबः बीगु तगिं, यरूशलेमया पखाः, हासोर, मगिद्दो व गेजेर दय्‌केत जुजु सोलोमनं मनूतय्‌त दास थें ज्‍या याकूगु खः। 
(मिश्रयाम्‍ह जुजु फारों हमला यानाः गेजेर त्‍याका काल। अन च्‍वंपिं कनानीतय्‌त स्‍यानाः शहरयात छ्वय्‌काबिल। अले वं उगु शहर सोलोमनं ब्‍याहायाम्‍ह थःम्‍ह्याय्‌यात क्‍वसः बिल। 
सोलोमनं गेजेरयात हाकनं दय्‌कल।) व क्‍वय् च्‍वंगु बेथ-होरोन, 
बालात व मरुभूमिइ वयागु हे देशय् लाःगु तदमोर। 
अले थःगु फुक्‍क धुकू दुगु शहरत व थःगु रथत, सलत तयेत शहरत नं दय्‌कल। यरूशलेमय्, लेबनानय् व थःगु राज्‍यया फुक्‍क इलाकाय् थःम्‍हं छु छु दय्‌के मास्‍तिवय्‌कूगु खः वं फुक्‍क दय्‌कल। 
अन इस्राएली मखुपिं मनूत नं च्‍वनाच्‍वंगु दु। थुपिं एमोरी, हित्ती, परिज्‍जी व यबूसीत खः। 
थुपिं इस्राएलीतय्‌सं भज्‍यंक नाश मयाःपिं जात जातियापिनि सन्‍तान खः। थुमित सोलोमनं दासयात थें ज्‍या याकल। थौं तक नं इपिं अथे हे दु। 
तर सोलोमनं इस्राएलीत सुयातं नं दास दासी मदय्‌कू। इस्राएलीतय्‌सं ला सिपाइँ, सरकारी हाकिम, सेनापति, रथया कप्‍तान व रथ चले याइपिं मनूया ज्‍या याइगु। 
सोलोमनं न्‍यासः व नेय्‌म्‍हसित (५५०) मनूतय्‌गु ज्‍या स्‍वइपिं नायः जुइत ल्‍यल। 
दाऊदया शहरं फारोया म्‍ह्याय् सोलोमनं दय्‌कूगु दरबारय् वयेधुंकाः वं तिबः बीगु तगिं दय्‌कल। 
थःम्‍हं परमप्रभुया निंतिं दय्‌कूगु वेदीइ सोलोमनं दँय् स्‍वक्‍वः परमप्रभुया न्‍ह्यःने होमबलि व मेलबलि छाइगु खः। अले उपिंनापं धुपाँय् नं च्‍याकीगु खः। थुकथं वं देगः दय्‌केगु ज्‍या सिधय्‌कल। 
जुजु सोलोमनं लाल समुद्रया सिथय् दुगु एदोमया एलात लिक्‍कया एस्‍योन-गेबेरय् जहाजत नं दय्‌कल। 
अले हीरामं समुद्रया बारे ज्ञान दुपिं थः मनूतय्‌त सोलोमनया मनूतनापं जहाज चले यायेत छ्वल। 
इपिं जहाजं ओपीरय् वन अले अनं झिंखुगू (१६) टन लुँ हयाः सोलोमन जुजुयात बिल। 
