﻿१ राजा.
6.
इस्राएलीत मिश्र देशं पिहां वःगु प्‍यसः व चयदँ (४८०) लिपा, सोलोमनं इस्राएलय् राज्‍य यानाच्‍वंगु प्‍यंगूगु दँया जीभ धाःगु निगूगु लाय् वं परमप्रभुया देगः दय्‌केगु ज्‍या शुरु यात। 
जुजु सोलोमनं परमप्रभुया निंतिं दय्‌कूगु देगः २७ मिटर ताहाकःगु व ९ मिटर तब्‍यागु व १३.५ मिटर तज्‍जाःगु खः। 
देगःया मू क्‍वथाया न्‍ह्यःने च्‍वंगु दलान देगःया ब्‍या ति हे ९ मिटर ताहाः। देगःया न्‍ह्यःनेपाखे व ४.५ मिटर पिहां वःगु दु। 
हानं वं देगलय् चिब्‍यागु तिकिझ्‍याःत दय्‌कल। 
मू क्‍वथा व तसकं पवित्रगु थाय्‌या अंगःया अःखःपाखे व देगःया प्‍यखेरं अंगःनापं स्‍वानाच्‍वंगु क्‍वथात दय्‌कल। 
दकलय् क्‍वय्‌या २.२ मिटर तब्‍या। दथुइया तँ २.७ मिटर तब्‍या अले दकलय् च्‍वय्‌या तँ ३.१ मिटर तब्‍या। धलिं अंगलय् दुवामवनेमा धकाः क्‍वथात देगःया अंगःतनापं स्‍वाकातःगु दु गुगु अंगलय् फलय् लिधनाच्‍वंगु दु। 
देगः दय्‌कूबलय् ल्‍वहंया खानिइ हे चाना हःगु कुचात जक छ्यल। देगः दय्‌काच्‍वंतले उगु थासय् मुगः, कतां वा छुं नं कथंयागु नया ज्‍याभःया सः ताये मदु। 
दकलय् क्‍वय् च्‍वंगु तँया लुखा देगःया दच्‍छिनपाखे दु। अनं दथुइयागु व दकलय् च्‍वय्‌यागु तँय वनेत स्‍वहाने दु। 
थुकथं धलिं व देवदारुया सिँ पतिं उकिया पौ दय्‌काः वं देगः सिधय्‌कल। 
वं देगःया प्‍यखेरं चिचिकुगु क्‍वथा दय्‌कल। छगू छगू क्‍वथा २.२ मिटर तजाः। अले स्‍वसिमाया सिँया धलिमं देगःनापं स्‍वाःगु दु। 
परमप्रभुया थ्‍व वचन सोलोमनयाथाय् वल- 
“छं दय्‌काच्‍वंगु थ्‍व देगःया बारे धाःसा थथे जुइ- छं जिगु विधि व नियम मानय् यात धाःसा अले जिगु आज्ञा मानय् यात धाःसा जिं छिमि बौ दाऊदयात बियागु बचं छपाखें पुरा याये। 
अले जि इस्राएलया दथुइ च्‍वने, जिं जिमि प्रजा इस्राएलयात गुबलें नं त्‍वःते मखु।” 
थुकथं सोलोमनं परमप्रभुया देगः दय्‌के सिधय्‌कल। 
वं देगःया अंगलय् दुनेपाखे देवदारुया सिँपौ बंनिसें कयाः धलिं तक हे तयाबिल। अले देगःया बँय् धाःसा थसिँया सिँपौत लायाबिल। 
देगः दुने ल्‍यूनेपाखे वं बंनिसें धलिं तक देवदारुया सिँपौत मिलय् यानाः ९ मिटर ताहाकःगु महा-पवित्रगु थाय् दय्‌कल। 
महा-पवित्रगु थाय्‌या न्‍ह्यःनेया पवित्रगु क्‍वथा १८ मिटर ताहाः। 
देगःया दुने पाखेया देवदारुया सिँइ धाःसा ह्वयाच्‍वंगु स्‍वां व लौकाया बुत्ता कियातःगु दु। उपिं फुक्‍क देवदारुयागु खः। ल्‍वहं छगः नं खने मदु। 
देगःया दुनेपाखे परमप्रभुया बाचाया सनू तयेत वं व महा-पवित्रगु थाय् दय्‌कल। 
थ्‍व महा-पवित्रगु थाय् ९ मिटर ताहाकः ९ मिटर तब्‍या अले ९ मिटर तःजाः। महा-पवित्रगु थाय्‌या लिक्‍क पिने वं देवदारुया सिँ दय्‌कूगु थ्‍व वेदीयात भिंगु लुं भुनाबिल। 
सोलोमनं देगःया दुनेया ब्‍वयात भिंगु लुं भुनाबिल, अले वं लुँया सिखःयात सालाः लुं भुनातःगु महा-पवित्रगु थाय् न्‍ह्यःने थ्‍यंकाबिल। 
थुकथं वं दुनेया ब्‍व फुक्‍कयात लुं भुनाबिल। वं पवित्रगु थाय्‌या न्‍ह्यःनेयागु वेदीयात नं लुं भुनाबिल। 
महा-पवित्रगु थासय् वं जैतूनया सिँयागु ४.४ – ४.४ मिटर तज्‍जाःपिं निम्‍ह करूब दय्‌कल। 
छम्‍ह करूबया निपुं पपू २.२ – २.२ मिटर ताहाः, अले मेगु नं २.२ मिटर ताहाः। अथे जुयाः छपु पपूया च्‍वकां मेगु पपूया च्‍वका तक ४.४ मिटर दु। 
मेम्‍ह करूबया नाप नं ४.४ मिटर दु, छाय्‌धाःसा निम्‍हं करूब छगू हे नाप व छगू हे आकारयापिं खः। 
निम्‍हं करूब ४.४ मिटर तज्‍जाः। 
वं उपिं करूबतय्‌त देगःया महा-पवित्र थासय् तल। उमिगु पपू थुकथं न्‍यनावंगु दु कि छम्‍ह करूबया छपु पपुतिं छखेपाखेया अंगःयात थ्‍यूगु दु, मेम्‍ह करूबया छपु पपुतिं मेखे पाखेया अंगःयात थ्‍यूगु दु। अले उमिगु मेगु निपु पपुतिं क्‍वथाया दथुइ थ्‍यूगु दु। 
वं उपिं करूबतय्‌त लुं भुनाबिल। 
देगःया महा-पवित्रगु थाय् व पवित्रगु थाय्‌या छचाःखेरं अंगलय् वं करूब, ताय्‌गः सिमात व ह्वयाच्‍वंगु स्‍वांयागु बुत्ता किल। 
वं देगःया दुनेयागु व पिनेयागु क्‍वथाया बँ नं लुं भुनाबिल। 
महा-पवित्रगु थाय्‌या लुखाया निंतिं न्‍याकुंलाःगु थां दुगु जैतूनया सिँयागु लुखात दय्‌कल। 
अले उपिं लुखाय् वं करूबत, ताय्‌गः सिमा व ह्वयाच्‍वंगु स्‍वांया बुत्ता कियाबिल। अले वं करूबत व ताय्‌गः सिमायात लुँया पातां भुनाबिल। 
अथे हे यानाः वं देगःया पवित्र थाय्‌या लुखाया निंतिं जैतूनया सिँया प्‍यकूंलाःगु थांत दय्‌कल। 
वं ह्वतय् चाःहिलिगु निपा खापा दुगु थसिँया निगू लुखा दय्‌कल। 
वं उकी करूबत, ताय्‌गः सिमा व ह्वयाच्‍वंगु स्‍वांया बुत्ता कियाबिल। अले उपिं बुत्तायात उत्‍थें यानाः लुं भुनाबिल। 
अले वं दुनेया चुक मिलय् यानाः चानातःगु ल्‍वहंया स्‍वझ्‍वः यानाः व देवदारुया धलिंया छझ्‍वः यानाः दय्‌कल। 
प्‍यंगूगु दँया जीभ लाय् परमप्रभुया देगःया जग तल। 
झिंछगूगु दँया बूल धाःगु च्‍यागूगु लाय् नमूनाकथं व देगः दय्‌के सिधय्‌कल। थुकथं वं न्‍हय्‌दँ बिकाः उगु देगः दय्‌कल। 
