﻿२ शमूएल.
18.
दाऊदं थःनापं दुपिं मनूतय्‌त लडाइँ यायेत मुंकल, अले द्वःछि द्वःछि व सछि-सछि पुचःया कप्‍तानत ल्‍यल। 
अनंलि वं थः सिपाइँतय्‌त स्‍वब्‍वः थल। स्‍वब्‍वय् छब्‍व योआबया अधीनय्, स्‍वब्‍वय् छब्‍व सरूयाहया काय् योआबया किजा अबीशैया अधीनय्, व स्‍वब्‍वय् छब्‍व गित्ती इत्तैया अधीनय् तयाः छ्वल। जुजुं सिपाइँतय्‌त धाल, “जि नं छिपिंनापं लडाइँलय् वने।” 
तर मनूतय्‌सं धाल, “मखु, छसपोल झायादी म्‍वाः। छुं जुयाः जिपिं बिस्‍युं वये माःसा जिमित सुनानं वास्‍ता याइ मखु। जिपिं बच्‍छि हे सीसां नं इमिसं वास्‍ता याइ मखु। तर छसपोल ला जिपिं झिद्वःति हे ग्‍यं। अथे जुयाः छपिं शहरय् हे च्‍वनाः जिमित ग्‍वाहालि यानादीसा बांलाइ।” 
जुजुं लिसः बिल, “अथे खःसा छिमित छु पाय्‌छि जू जिं व हे याये।” अथे जुयाः जुजु मू ध्‍वाखाय् दनाच्‍वन, अले सिपाइँत द्वःछि द्वःछि व सछि सछिया झ्‍वः जुजुयागु हे न्‍ह्यःनं वन। 
जुजुं योआब, अबीशै व इत्तैयात थथे आज्ञा बिल, “जिगु कारणं व ल्‍याय्‌मम्‍ह अब्‍शालोमयात बांलाःगु व्‍यवहार या।” अब्‍शालोमयात बचय् या धकाः जुजुं कप्‍तानतय्‌त ब्‍यूगु आज्ञा फुक्‍क सिपाइँतय्‌सं नं न्‍यन। 
अनंलि दाऊदया सिपाइँत इस्राएलीतय्‌गु विरोधय् लडाइँ यायेत वन, अले लडाइँ एफ्राइमया जंगलय् जुल। 
अन दाऊदया सिपाइँत नापं इस्राएलीत बुत। उखुन्‍हु हे निइद्वः मनूत सित। थुकथं इपिं बांमलाक नाश जुल। 
अन नं लडाइँ प्‍यखेरं न्‍यनावन। जंगलय् नाश जूपिं तरवारं स्‍याःपिं स्‍वयाः अप्‍वः जुल। 
दाऊदया छुं मनूतय्‌सं अब्‍शालोमयात खन। व छम्‍ह खच्‍चर गयाः वनाच्‍वंगु खः। खच्‍चर छमा तःमागु सिमा क्‍वसं वनाच्‍वंगुलिं अब्‍शालोमया सँ सिमाया कचाय् तक्‍यनाः यग्‍गात। व आकाश व पृथ्‍वीया दथुइ यग्‍गानाच्‍वन। खच्‍चर धाःसा अनं पुलावन। 
दाऊदया छुं मनूत मध्‍ये छम्‍हय्‌सिनं थ्‍व खनाः योआबयात थथे धाल, “धात्‍थें जिं अब्‍शालोमयात तःमागु सिमाया कचाय् यग्‍गानाच्‍वंगु खना।” 
थ्‍व खँ कंवःम्‍हय्‌सित योआबं धाल, “छं वयात धात्‍थें हे खंगु खः ला? अय्‌सा छं उबलय् छाय् वयात मस्‍यानागु? छं वयात स्‍याःगु जूसा जिं छन्‍त झिकू वहःया कुचा व पद थकयागु चिंकथं जँनी बिइगु।” 
तर व मनुखं लिसः बिल, “छिं जितः द्वःछि कुचा वहः ब्‍यूसां नं जिं जुजुया काय्‌या विरोधय् थःगु ल्‍हाः ल्‍ह्वने फइ मखु। छाय्‌धाःसा जुजुं छि, अबीशै व इत्तैयात थथे आज्ञा ब्‍यूगु जिं न्‍यनागु दु, ‘सुनां व ल्‍याय्‌म्‍हम्‍ह अब्‍शालोमयात नापलाइ जिगु कारणं वयात स्‍याये मते।’ 
छुं जुयाः जिं जुजुया उजं मानय् मयासें अब्‍शालोमयात स्‍याःगु जूसा जुजुं थ्‍व खँ सी अले छिसं जितः बचय् यानादी मखुगु।” 
योआबं धाल, “छनापं खँ ल्‍हानाः जिं थःगु ई सितिं छ्वये मखु।” अले योआब अब्‍शालोम दुथाय् वन, अले वं स्‍वंगू च्‍वामुसे च्‍वंगु कथि कयाः म्‍वाःम्‍वाकं हे सिमाय् यग्‍गायाच्‍वंम्‍ह अब्‍शालोमया छातिइ सुयाबिल। 
अले योआबया ल्‍वाभः ज्‍वनिपिं झिम्‍ह सिपाइँतय्‌सं अब्‍शालोमयात घेरय् यानाः स्‍यानाबिल। 
अनंलि योआबं तुरही पुल, अले सिपाइँतय्‌सं इस्राएलीतय्‌त लिइगु त्‍वःतल छाय्‌धाःसा योआबं सिपाइँतय्‌त अथे याये मते धकाः पंगु खः। 
अले इमिसं अब्‍शालोमया सीम्‍हयात यंकाः जंगलया तःधंगु गालय् वान्‍छ्वयाः उकी द्यःने ल्‍वहं द्वँचिनाबिल। अबलय् हे फुक्‍क इस्राएलीत थथःगु छेँय् बिस्‍युं वन। 
अब्‍शालोमं थः म्‍वानाच्‍वंबलय् जुजुया ब्‍यासिइ छगू थां धस्‍वाकूगु खः छाय्‌धाःसा वं थथे बिचाः याइगु, “जिगु नां ल्‍यंकातयेत जि छम्‍ह नं काय् मदु।” अथे जुयाः वं व थांयात थःगु हे नां तल, अले थौं तक नं व थांयात अब्‍शालोमया झ्‍वाता धकाः धाइ। 
सादोकया काय् अहीमासं धाल, “परमप्रभुं जुजुयात थः शत्रुतय्‌गु ल्‍हातं बचय् यानादिल धयागु खबर जुजुयात याकनं ब्‍यु वनेत जितः अनुमति बियादिसँ।” 
तर योआबं लिसः बिल, “थौंयागु दिं छं समाचार यंके मते, मेगु दिनय् जक यंकूसां ज्‍यू, तर थौं मखु, छाय्‌धाःसा जुजुया काय् सी धुंकूगु दु।” 
अनंलि योआबं छम्‍ह कूशी दासयात धाल, “छं खंगु फुक्‍क खँ वनाः जुजुयात धयाब्‍यु।” व कूशीं क्‍वछुनाः योआबयात दण्‍डवत यात अले अनं ब्‍वाँय् वन। 
अले सादोकया काय् अहीमासं योआबयात हाकनं बिन्‍ति यानाः थथे धाल, “न्‍ह्यागु हे जूसां जितः व कूशीया ल्‍यूल्‍यू ब्‍वाँय् वनेबियादिसँ।” योआबं न्‍यन, “हे जिमि काय्, छ छाय् वनेमाल? छंगु समाचारया निंतिं छन्‍त छुं नं सिरपाः दइ मखु।” 
अहीमासं धाल, “न्‍ह्यागु हे जूसां जि ब्‍वाँय् वने।” अथे जुयाः योआबं धाल, “अथे जूसा हुँ।” अनंलि अहीमास यर्दनया ख्‍यलय्‌यागु लँपु जुयाः ब्‍वाँय् वन अले व कूशीयात लिपालाकाः न्‍ह्यःने ब्‍वाँय् वन। 
उबलय् दाऊद निगू लुखाया दथुइ च्‍वनाच्‍वंगु खः। अले पिवाः च्‍वनीम्‍हं पखाःया मू ध्‍वाखाया पिवाः च्‍वनीगु थासय् वनाः स्‍वःवंबलय् छम्‍ह मनू याकःचा ब्‍वाँय् वयाच्‍वंगु खन। 
व पिवाः च्‍वनीम्‍ह मनुखं तःसलं दाऊदयात थ्‍व खँ कनाबिल। जुजुं धाल, “व याकःचा जक ब्‍वाँय् वःगु खःसा वं पक्‍का हे बांलाःगु समाचार हःगु जुइमाः।” अले व मनू लिक्‍क थ्‍यंकः वल। 
अनंलि हाकनं व पिवाः च्‍वनीम्‍ह मनुखं मेम्‍ह छम्‍ह मनू नं याकःचा हे ब्‍वाँय् वयाच्‍वंगु खन। अले व पिवालं क्‍वय् ध्‍वाखाय् च्‍वंम्‍ह पिवाःयात धाल, “स्‍वसा हाकनं मेम्‍ह छम्‍ह मनू नं याकःचा हे ब्‍वाँय् वयाच्‍वंगु दु।” “जुजुं धाल, वं नं बांलाःगु हे समाचार हःगु जुइमाः।” 
व पिवालं धाल, “स्‍वयादिसँ, व न्‍हापां ब्‍वाँय् वःम्‍ह ला सादोकया काय् अहीमास थें च्‍वं।” जुजुं धाल, “व छम्‍ह बांलाःम्‍ह हे मनू खः, भिंगु हे समाचार ज्‍वनाः वयाच्‍वंगु दु।” 
अनंलि अहीमासं जुजुया न्‍ह्यःने बँय् भ्‍वसुलाः तःसलं थथे धाल, “फुक्‍क पाय्‌छि जू।” “परमप्रभु छिकपिनि परमेश्‍वरया प्रशंसा जुइमा! छिगु विरोधय् दंपिं मनूतय्‌त छिगु हे ल्‍हातय् बियादीगु दु।” 
जुजुं वयाके न्‍यन, “छु ल्‍याय्‌म्‍हम्‍ह अब्‍शालोमयात आराम दु ला?” अले अहीमासं लिसः बिल, “छसपोलया दास योआबं जुजुया सेवक व जि छिकपिनि दासयात छ्वयाहःगु खः। जिं ला तसकं खलबल जूगु खनागु दु, तर छु जूगु खः व धाःसा जिं मस्‍यू।” 
जुजुं आज्ञा बिल, “चिलाः थन दँ।” अले व वनाः छखेपाखे दंवन। 
अनंलि व कूशी वयाः धाल, “जिमि मालिक महाराज, स्‍वयादिसँ, समाचार बांलाः! छसपोलया विरोधय् दंपिं सकसिगुपाखें परमप्रभुं छितः थौं उद्धार यानादीगु दु।” 
अले जुजुं कूशीयाके न्‍यन, “छु व ल्‍याय्‌म्‍हम्‍ह अब्‍शालोमयात आराम दु ला?” कूशीं लिसः बिल, “जुजुया फुक्‍क शत्रुत व फुक्‍क छिगु विरोधय् दनिपिं अले छसपोलयात मभिं याइपिंनिगु गति नं व ल्‍याय्‌म्‍हम्‍ह मनूया थें हे जुइ।” 
अनंलि जुजु तसकं दुःख मन ताय्‌काः मू ध्‍वाखाया च्‍वय्‌यागु कोथाय् वनाः ख्‍वः वन, अले जुजु थथे धाधां ख्‍वख्‍वं वन, “जिम्‍ह पुताः! जिमि काय् अब्‍शालोम, जिकाय् अब्‍शालोम! छंगु पलेसा जि सीगु जूसा ज्‍यूगु नि! अय् अब्‍शालोम, जिकाय्, जिकाय्!” 
