﻿न्‍यायकर्ता.
18.
उगु इलय् इस्राएलय् जुजु धयापिं हे मदुनि। दान कुलयापिं मनूतय्‌सं च्‍वनेत थाय् माला च्‍वन, छाय्‌धाःसा मेगु कुलयापिं मनूतय्‌त जमिन दयेधुंकूसां इमिके धाःसा थःगु धयागु छकुचा नं जमिन मदुगु जुयाच्‍वन। 
उकिं दान कुलयापिन्‍सं थःगु कुलया फुक्‍क परिवारपाखें न्‍याम्‍ह मग्‍याःपिं मनूत ल्‍यल। अले इमित जमिन मालेत व उकियागु चिवा कायेत सोरा व एश्‍तोल शहरं छ्वल। उपिं न्‍याम्‍ह मनूत एफ्राइमया पहाडी देशय् थ्‍यने धुंकाः मीकाया छेँय् बाय् च्‍वन। 
अन च्‍वंबलय् इमिसं व ल्‍याय्‌म्‍हम्‍ह लेवीयागु सः म्‍हसीकाः वयात न्‍यन, “छ थन छु यानाः च्‍वनागु? सुनां छन्‍त थन हल? थन छंगु छु ज्‍या दु?” 
वं इमित मीकां थःगु लागि छु यात व कनाबिल। अले धाल, “मीकां जितः पुजाहारीया ज्‍या यायेत ज्‍यालाय् तःगु दु।” 
अले इमिसं वयात धाल, “अथे जूसा जिमिगु निंतिं परमेश्‍वरयाके जिमिगु ज्‍या ताःलाइ कि ताःलाइ मखु धकाः न्‍यँ।” 
पुजाहारीं लिसः बिल, “याउँक हुँ। छिमिसं यानाच्‍वंगु यात्रा परमप्रभुपाखेंयागु खः।” 
उपिं न्‍याम्‍ह मनूत व थाय् त्‍वःताः लेशय् थ्‍यंकवल। सीदोनयापिं मनूत थें अनयापिं मनूत शान्‍त व सुरक्षितकथं म्‍वानाच्‍वंगु खन। अले इमिगु देशय् छुं मगाःमचाः मजूगुलिं इपिं च्‍वन्‍ह्याःगु जुल। अले इपिं सीदोनीत स्‍वयाः यक्‍व तापाः। अले इमि मेपिं मनूतलिसें छुं कथंयागु स्‍वापु नं मदु। 
दान कुलयापिं उपिं न्‍याम्‍ह मनूत सोरा व एश्‍तोलय् लिहां वये धुंकाः इमि दाजुकिजापिन्‍सं इमित न्‍यन, “छिमिसं छु छु खना?” 
इमिसं लिसः बिल, “वा! झीसं इमित हमला याः वनेनु! धात्‍थें जिमिसं खनागु व देश तसकं बांलाः। छिपिं छाय् सुम्‍क च्‍वनाच्‍वनागु? अन वनाः व देशयात त्‍याका कायेत लिचिले मते। 
छिपिं अन थ्‍यनीबलय् छिमिसं छगू चक्‍कंगु देशय् याउँक म्‍वानाच्‍वंपिं छगू जातियात खनी। धात्‍थें परमेश्‍वरं व जमिन छिमिगु ल्‍हातय् बियादीगु दु, व थासय् पृथ्‍वीइ दुगु छुं नं चीजयागु मगाःमचाः मदु।” 
अथे जूगुलिं सोरा व एश्‍तोलं दान कुलयापिं खुसः मनूत ल्‍वाभः घानाः पिहां वल। 
इपिं थाहां वनाः यहूदाया किर्यत-यारीमयागु पच्‍छिमपाखे छाउनी तल। उकिं व थाय्‌यात थौं तक नं मनेह-दान धाः। 
अनं इपिं न्‍ह्यज्‍यानाः एफ्राइमया पहाडी देशय् मीकाया छेँया न्‍ह्यःने वल। 
अबलय् लेश देशया चिवा काःवंपिं न्‍याम्‍ह मनूतय्‌सं थथे धकाः थः दाजुकिजापिंलिसें खँ ल्‍हात, “छु थुपिं छेँ मध्‍ये छखा छेँय् एपोद, छेँ द्यःत, छगू कियातःगु झ्‍वाता व छगू ढलौतया मूर्ति दु धकाः छिमिसं स्‍यू ला? आः छु यायेमाःगु खः व छिमिसं स्‍यू।” 
उकिं इपिं मीकाया छेँ लिक्‍क व ल्‍याय्‌म्‍हम्‍ह लेवी च्‍वनीगु थासय् वन। अले वलिसें खँ ल्‍हात। 
ल्‍वाभः ज्‍वनातःपिं उपिं खुसःम्‍ह दान कुलयापिं मनूत मू लुखाय् दन। 
व पुजाहारी मू लुखाय् ल्‍वाभः ज्‍वनातःपिं खुसःम्‍ह मनूतलिसें दनाच्‍वंबलय् हे देशयागु चिवा काःवंपिं न्‍याम्‍ह मनूतय्‌सं छेँ दुने दुहां वनाः झ्‍वाता, मूर्ति, एपोद व छेँ द्यःत काल। 
उपिं न्‍याम्‍ह मनूतय्‌सं मीकाया छेँय् दुहां वनाः झ्‍वाता, मूर्ति, एपोद व छेँनं द्यःत काःबलय् व पुजाहारीं इमित न्‍यन, “छिपिं छु यानाच्‍वनागु?” 
तर इमिसं लिसः बिल, “हाले मते! सुम्‍क च्‍वँ। वयाः जिमि पुजाहारी व बौ जु। छम्‍ह मनूया छेँय् पुजाहारी जुइगु छन्‍त बांलाः कि इस्राएलया छगू कुल व वंशया पुजाहारी जुइगु बांलाः?” 
अले व पुजाहारी लय्‌ताल। व एपोद, कियातःगु झ्‍वाता व छेँ द्यःत ज्‍वनाः इपिंलिसें वन। 
बांलाक न्‍यासि वने मफुपिं मनूत, सा-द्वहंत व थिकेथिकेगु सामान न्‍ह्यः न्‍ह्यः तयाः इपिं अनं वन। 
दान कुलयापिं मनूत मीकाया छेँनं भचा तापाक थ्‍यंबलय् मीकाया जःलाखःलातय्‌त छक्‍वलं सःतल। अले इमिसं इमित लिनाः नापलाकल। 
इमिसं दान कुलयापिन्‍त तसकं हालाः सःतल अले दानया मनूतय्‌सं फहिलाः मीकायात धाल, “छन्‍त छु जुल? जिपिंलिसें ल्‍वायेत छं छाय् मनूत सःतागु?” 
मीकां धाल – “जिं थःगु लागि दय्‌कागु जिमि द्यःत छिमिसं यंकल। छिमिसं जिमि पुजाहारी नं यंकल। छिमिसं जितः छुं नं त्‍वःमतू। छिमिसं– ‘छन्‍त छु जुल? धकाः गथे यानाः न्‍यने फुगु?’” 
दान कुलयापिन्‍सं वयात धाल, “जिपिंलिसें हाले मते, मखुसा छुं तंगुलु मनूतय्‌सं छिमित हमला याइ अले छ व छिमि परिवार सिनावनेमाली।” 
थुलि धयाः दान कुलयापिं मनूत थःगु लँपुइ वन। इपिं थःपिं स्‍वयाः यक्‍व बल्‍लाःपिं खनाः मीका थःगु छेँपाखे लिहां वन। 
अले व पुजाहारी व मीकां थःगु निंतिं दय्‌कूगु मूर्ति ज्‍वनाः इपिं लेशयापिं शान्‍त व सुरक्षितकथं म्‍वानाच्‍वंपिं मनूतय्‌त हमला यायेत लेशय् वन। इमिसं इमित तरवारं पाल, अले इमिगु शहरयात मिं नकाबिल। 
इमित बचय् याइपिं सुं नं मदु, छाय्‌धाःसा व लेश शहर सीदोनं यक्‍व तापाः। अनयापिं मनूत मेपिं सुंलिसें स्‍वापु मतइपिं जुयाच्‍वन। व शहर बेथ-रहोबया लिक्‍क बेसीइ लाः। दान कुलयापिं मनूतय्‌सं व शहरयात हाकनं दय्‌काः उकी च्‍वन। 
अले इमिसं व शहरयागु नां इस्राएलया काय्, थः पुर्खाया नामय् दान तल। न्‍हापा उकियागु नां लेश खः। 
दान कुलयापिन्‍सं उपिं मूर्तितय्‌त पलिस्‍था यात। अले इस्राएल जातियात ज्‍वनाः मयंतले मोशाया काय् गेर्शोमया काय् जोनाथन व वया काय्‌पिं दान कुलया पुजाहारी जुल। 
शीलोय् परमेश्‍वरयागु नापलायेगु पाल दतले मीकां दय्‌कूगु मूर्तितय्‌त पुजा यात। 
