﻿यहोशू.
13.
यहोशू बुरा जुइ धुंकाः परमप्रभुं वयात धयादिल, “छ तसकं बुरा जुइ धुंकल अय्‌नं त्‍याका कायेमानिगु देशत यक्‍व दनि।” 
“थुपिं देशत ल्‍यंदनि, पलिश्‍ती व गशूरीतय् फुक्‍क इलाका– 
मिश्रया पुर्बयागु शिहोर खुसिंनिसें उत्तरपाखे एक्रोनयागु इलाका तक, थुपिं फुक्‍कयात कनानीतय्‌गु इलाका धकाः धाइ। थुकी पलिश्‍तीतय् न्‍याम्‍ह जुजुपिनिगु इलाका– गाजा, अश्‍दोद, अश्‍कलोन, गात व एक्रोन नं दुथ्‍या। अले दच्‍छिनय् अव्‍वीतय्‌गु इलाका। 
उत्तरय् कनानीतय्‌गु फुक्‍क देश, सीदोनीतय्‌गु आरांनिसें एमोरीतय्‌गु इलाका अपेक तक, 
गबालीतय्‌गु देश, पुर्बय् लाःगु हेर्मोन पर्वतया क्‍वय्‌यागु बाल-गादंनिसें लेबो-हमात तक लेबनानया फुक्‍क थाय्। 
“लेबनानंनिसें मिस्रपोत-मैम तक सीदोनीतय् पहाडयागु देशयापिं मनूत, जिं थःम्‍हं हे इपिं सकसित इस्राएलीतय्‌गु न्‍ह्यःनें लिनाछ्वये। जिं छन्‍त धया थें व देश इस्राएलीतय्‌त चिट्ठा तयाः सर्बयकथं इनाब्‍यु। 
अले थुकियात गुंगू कुल व मनश्‍शेया बच्‍छि कुलयात सर्बयकथं इनाब्‍यु।” 
मनश्‍शेया बच्‍छि कुल, रूबेनीत, व गादीतय्‌सं धाःसा यर्दन पुर्बयागु देश परमप्रभुया दास मोशापाखें थथःगु सर्बयकथं काये धुंकूगु खः। 
अर्नोनया खोँचया च्‍वसं दुगु अरोएर शहर अले खोँचया दथुइ लाःगु गामं न्‍यनावंगु दु। दीबोन तक हे मेदबाया माथु नं लाः। 
अले हेश्‍बोनय् च्‍वनीम्‍ह सी धुंकूम्‍ह एमोरीतय् जुजु सीहोनया फुक्‍क शहरया अम्‍मोनीतय् सिमाना तक। 
गशूरी व माकातीयापिं मनूतय्‌गु इलाका गिलाद, हेर्मोन पर्वत, फुक्‍क बाशान सलका तक हे 
अथे धयागु अस्‍तारोत व एद्रईलय् शासन याइम्‍ह बाशानयाम्‍ह जुजु ओगया फुक्‍क देश, व रपाइँ धाःगु ततःधिकःपिं मनूतय् पुचःयाम्‍ह लिपांम्‍ह मनू खः। मोशां इमित बुकाबिल अले इमिगु जमिनयात कब्‍जा यात। 
अय्‌नं इस्राएलीतय्‌सं गशूरीत व माकातीतय्‌त लिना मछ्वः। अथे जुयाः इपिं थौं तक नं इस्राएलीतय् दथुइ च्‍वनाच्‍वंगु दु। 
तर वं लेवी कुलयात सर्बय् मब्‍यू, छाय्‌धाःसा वय्‌कःया बचंकथं परमप्रभु इस्राएलया परमेश्‍वरयात छाःगु विशेष देछा हे इमिगु सर्बय् खः। 
मोशां रूबेनया कुलयात इमिगु वंश वंशकथं थथे इनाब्‍यूगु खः – 
इमिगु सिमाना थुकथं दु – अर्नोन खोँचया च्‍वसं दुगु अरोएर शहर व खोँचया दथुइ लाःगु गां, व मेदबाया फुक्‍क माथुंनिसें कयाः 
हेश्‍बोन व माथुयागु फुक्‍क शहर, दीबोन, बमोत-बाल, बेथ-बाल-मोन, 
यहसा, कदेमोत, मेपात, 
किर्यातैम, सिब्‍मा व ब्‍यासियागु डाँडाय् लाःगु सेरेथशेहार, 
बेथ-पोर, पिसगाया पाःचा, व बेथ-यशीमोत तक। 
माथुयागु फुक्‍क शहर व हेश्‍बोनय् राज्‍य याइम्‍ह एमोरीतय् जुजु सीहोनयागु फुक्‍क राज्‍य, मोशां वयात व वलिसें मिलय् जूपिं एवी, रेकेम, सूर, हूर, रेबा नांयापिं मिद्यानयापिं नायःतय्‌त बुकूगु खः। 
लडाइँलय् स्‍याःपिं मनूत बाहेक इस्राएलीतय्‌सं बओरया काय् ज्‍वखना स्‍वइम्‍ह बालामयात नं तरवारं स्‍याःगु खः। 
रुबेनीतय्‌गु पच्‍छिमया सिमाना यर्दनयागु सिथ खः। थुपिं शहर व गां वंश वंशकथं रुबेनीतय्‌गु सर्बय् खः। 
मोशां गादया कुलयात इमिगु वंश वंशकथं जमिन थुकथं इनाब्‍यूगु खः – 
इमिगु सिमाना थथे दु – याजेरया इलाका व गिलादया फुक्‍क शहर, अम्‍मोनीतय्‌गु बच्‍छि देश, रब्‍बाया लिक्‍कयागु अरोएर तक, 
अले हेश्‍बोनंनिसें रामत-मस्‍पा व बेतोनीम तक अले महनोमंनिसें दबीरयागु इलाका तक, 
अले ब्‍यासिया बेथ-हाराम, बेथ-निम्रा, सुक्‍कोत व सापोननापं हे हेश्‍बोनया जुजु सीहोनं न्‍हापा राज्‍य याःगु देश तक। इमिगु पच्‍छिमी सिमाना यर्दन खुसि, गालील समुद्रया दच्‍छिनया सिथ तक खः। 
थुपिं शहर व गां वंश वंशकथं गादीतय्‌गु सर्बय् खः। 
हाकनं मोशां मनश्‍शेया बच्‍छि कुलयात वंश वंश यानाः थुकथं इनाब्‍यूगु खः – 
इमिगु सिमाना थथे दु – महनोमंनिसें बाशान तक, बाशानया जुजु ओगं न्‍हापा राज्‍य याःगु फुक्‍क देश, बाशानय् दुगु फुक्‍क याईरया बस्‍ती व खुइगू शहर, 
अले गिलादया बच्‍छि ब्‍व व न्‍हापा बाशानया जुजु ओग च्‍वनीगु शहरत अस्‍तारोत व एद्रई। थुपिं इलाका मनश्‍शेया काय् माकीरया बच्‍छि सन्‍तानतय्‌त वंश वंश यानाः बिल। 
यरीहो शहरयागु पुर्बपाखे, यर्दन खुसिया उखे मोआबया मैदानय् मोशां सम्‍पत्तिकथं इनाब्‍यूगु ब्‍वत थुपिं हे खः। 
लेवी कुलयात धाःसा मोशां छुं नं सर्बय् मब्‍यू। वं इमित धाल, “परमप्रभु इस्राएलयाम्‍ह परमेश्‍वर हे वय्‌कःया बचंकथं इमिगु सर्बय् खः।” 
