﻿यहोशू.
9.
यर्दनया पच्‍छिमपाखे पहाडी देशय् व पच्‍छिमया फेदीइ अले लेबनान तक भूमध्‍यसागरया सिथय् च्‍वनिपिं फुक्‍क हित्ती, एमोरी, कनानी, परिज्‍जी, हिव्‍वी व यबूसी जुजुपिन्‍सं थ्‍व खँ न्‍यनाः 
छप्‍पँ जुयाः यहोशू व इस्राएलीतलिसें ल्‍वायेत छथाय् मुन। 
गिबोनयापिं मनूतय्‌सं धाःसा यहोशूं यरीहो व ऐयात छु याःगु खः व न्‍यने धुंकाः 
थःपिन्‍त बचय् यायेत ध्‍वंलायेगु बिचाः यात। अले राजदूतत थें जुयाः थःपिनि गधाया म्‍हय् भ्‍वाथःगु बोरा, गुइ धुंकूगु व पर्का तःगु दाखमद्ययागु भ्‍वाथःगु छेँगूया म्‍हिचात तल। 
अले मिजंतय्‌सं पुलांगु लाकां न्‍ह्यात अले भ्‍वाथःगु वसः फित। अले नयेत गंगु व फ्‍वसा वःगु मरि काल। 
अले इमिसं गिलगालयागु छाउनीइ यहोशूयाथाय् वयाः वयात व इस्राएलीतय्‌त धाल, “जिपिं तापाःगु देशं वयापिं खः। उकिं जिपिंलिसें सन्‍धि यानादिसँ।” 
अले इस्राएली मिजंतय्‌सं हिव्‍वीतय्‌त धाल, “छिपिं जिमिगु लिक्‍कसं च्‍वंपिं मनूत जुइफु। छिपिंलिसे जिमिसं गथे यानाः सन्‍धि याये फइ?” 
इमिसं यहोशूयात धाल, “जिपिं छिम्‍ह हे दासत खः।” तर यहोशूं इमित धाल, “छिपिं सु खः, गनं वयागु खः?” 
इमिसं लिसः बिल, “जिपिं छिम्‍ह दासत यक्‍व तापाःगु देशं परमप्रभु छिमि परमेश्‍वरयागु नां न्‍यनाः वयागु खः, छाय्‌धाःसा जिमिसं वय्‌कलं मिश्र देशय् यानादीगु फुक्‍क ज्‍याया बारे न्‍यनागु दु। 
यर्दनया पुर्बय् एमोरीतय् निम्‍हं जुजु, हेश्‍बोनया जुजु सीहोनयात व अस्‍तारोतय् च्‍वंम्‍ह बाशानया जुजु ओगयात छु छु यानादीगु खः व नं न्‍यनागु दु। 
उकिं जिमि ज्‍याथपिं मनूत व जिमिगु देशयापिं सकल मनूतय्‌सं जिमित थथे धाल, ‘लँयात माःगु नयेगु नसा ज्‍वनाः इमित नापलाः हुँ। अले इमित, “जिपिं ला छिकपिनि हे दासत खः, उकिं जिपिंलिसें सन्‍धि यानादिसँ धकाः धा।”’ 
जिपिं छितः नापलायेत छेँ त्‍वःतागु न्‍हिइ क्‍वाःगु मरि ज्‍वनाः वयागु खः। तर स्‍वयादिसँ! थौं थ्‍व मरि गनाः फ्‍वसा वये धुंकल। 
जिमिसं दाखमद्यया थुपिं छेँगूया म्‍हिचा जाय्‌काःबलय् थुपिं न्‍हूगु हे खः। तर स्‍वयादिसँ! आः गुइ धुंकल, लँपु ताहाःगुलिं जिमिगु वसः व लाकां भ्‍वाथः जुइ धुंकल।” 
इस्राएली मिजंतय्‌सं परमप्रभुयाके मन्‍यंसे इमिगु नयेगु नसां छुं कयाः गथे च्‍वं स्‍वल। 
अले यहोशूं इमित मस्‍यासे हे तये धकाः इपिंलिसें सन्‍धि यात। अले खलःयापिं नायःतय्‌सं नं सन्‍धियात मानय् याये धकाः पाफल। 
सन्‍धि याःगु स्‍वन्‍हु लिपा इपिं सतिक हे च्‍वनिपिं जलाःखलाः खः धयागु खँ इस्राएलीतय्‌सं सीकल। 
उकिं इस्राएलीत न्‍ह्याः वनाः स्‍वन्‍हु दुखुन्‍हु इमिगु शहर गिबोन, कपीरा, बेरोत व किर्यत-यारीमय् थ्‍यंकवल। 
अय्‌नं इस्राएलीतय्‌सं इमित मस्‍या, छाय्‌धाःसा खलःयापिं नायःतय्‌सं इपिंलिसें परमप्रभु इस्राएलया परमेश्‍वरयागु नामय् पाफःगु खः। फुक्‍क खलकं थ्‍व खँयात कयाः नायःतलिसें कचकच यात। 
तर सकल नायःतय्‌सं लिसः बिल, “जिमिसं हे इपिंलिसें परमप्रभु इस्राएलयाम्‍ह परमेश्‍वरया नामय् पाफयागु दु। उकिं आः झीसं इमित थी फइ मखु। 
झीसं पाफये धुंकूगुलिं इमित मस्‍यासे त्‍वःता हे बीमाः मखुसा परमेश्‍वरं झीत सजाँय बियादी।” 
हानं नायःतय्‌सं धाल, “इमित म्‍वाःका हे तयेमाः।” अथे जुयाः नायःतय्‌गु थ्‍व बचंकथं इपिं फुक्‍क खलःया लागिं सिँ पालीपिं व लः क्‍वबिपिं जुल। 
यहोशूं गिबोनयापिं मनूतय्‌त सःताः न्‍यन, “छिपिं थन जिमिगु सतिक्‍क च्‍वनीपिं जुयाः नं तापाःगु देशं वयागु धकाः धयाः छाय् जिमित ध्‍वंलानागु? 
अथे जुयाः आः छिमित सराः लाःगु दु। छिमि मनूत न्‍ह्याबलें दास दासी जुयाः जिमि परमेश्‍वरयागु छेँय् सिँ पालीपिं व लः क्‍वबिपिं जुया हे च्‍वनी।” 
अले इमिसं यहोशूयात लिसः बिल, “परमप्रभु छिकपिनि परमेश्‍वरं थः दास मोशायात थ्‍व देश फुक्‍क छिकपिन्‍त बीगु व थ्‍व देशयापिं फुक्‍क मनूतय्‌त नाश यायेगु उजं बियादीगु खँ जिमित धाःगु दु। छिकपिं खनाः जिपिं तसकं ग्‍यात। उकिं जिमिसं थथे यानागु खः। 
आः स्‍वयादिसँ! जिपिं छिगु ल्‍हातय् दु। जिमित छु याःसा छितः भिं व पाय्‌छि जुइ व हे यानादिसँ।” 
थथे यहोशूं इमित इस्राएलीतपाखें बचय् यात अले इमिसं इमित मस्‍यात। 
उखुन्‍हु हे यहोशूं इमित दास दासी दय्‌कल, अले खलःया निंतिं व परमप्रभु ल्‍ययादीगु थासय् वय्‌कःया वेदीया निंतिं सिँ पालेगु ज्‍या व लः क्‍वबीगु ज्‍या याकल। परमप्रभुं थःगु आराधना यायेगु थाय् धकाः ल्‍ययादीगु थासय् थौं तक इमिसं उपिं ज्‍या यानाच्‍वंगु दु। 
