﻿यहोशू.
5.
इस्राएलीतय्‌सं खुसि मछीतले परमप्रभुं यर्दनयात गंगु बँ यानादीगु खँ यर्दनया पच्‍छिमय् च्‍वंपिं एमोरी जुजुपिन्‍सं व समुद्रया सिथय् च्‍वंपिं कनानी फुक्‍क जुजुपिन्‍सं न्‍यन। इस्राएलीतय्‌सं यानाः इमिगु नुगः भाराभारा मिनाः साहस मन्‍त। 
उबलय् परमप्रभुं यहोशूयात धयादिल, “चोल्‍वहंया चुपित दय्‌काः इस्राएलीतय्‌गु म्‍हय् चिं तयाब्‍यु।” 
उकिं यहोशूं चोल्‍वहंया चुपि दय्‌काः गिबियथ-हाअरालोथय् इस्राएलीतय्‌गु म्‍हय् चिं तयाबिल। 
यहोशूं इमित म्‍हय् चिं तय्‌के माल, छाय्‌धाःसा मिश्रं पिहांवःपिं लडाइँलय् वनेफुगु उमेर दुपिं सकलें मनूत मरुभूमिया लँय् हे सित। 
मिश्रं पिहांवःपिं इपिं फुक्‍क मिजंतय्‌गु म्‍हय् चिं तये धुंकूगु खः, तर मिश्रं वये धुंकाः मरुभूमिया लँय् बूपिं मिजंमस्‍तय्‌गु धाःसा म्‍हय् चिं तःगु मदुनि। 
मिश्र त्‍वःतूबलय् लडाइँलय् वनेफुगु उमेर दुपिं फुक्‍क मनूतय्‌सं परमप्रभुया उजं मानय् मयाःगुलिं इपिं मसितले इस्राएलीत पिइदँ तक चाचाःहिला जुल। छाय्‌धाःसा दुरु व कस्‍ति बाः वयाच्‍वंगु देश झीत बी धकाः इमि पुर्खातलिसें पाफयाः बचं बियादीगु देश इमित खंकेबी मखु धकाः वय्‌कलं पाफयादीगु खः। 
अथे जुयाः वय्‌कलं इमिगु थासय् इमि काय्‌पिन्‍त ब्‍वलंकादिल, लँय् थुमिगु म्‍हय् गुबलें चिं मतःगुलिं यहोशूं इमिगु म्‍हय् चिं तय्‌कल। 
उगु फुक्‍क जातियापिं मनूतय् म्‍हय् चिं तके धुंकाः, इपिं घाः मलंतले छाउनीइ हे च्‍वनाच्‍वन। 
अले परमप्रभुं यहोशूयात धयादिल, “थौं जिं छिमिकेनं मिश्रय् दास जुयाच्‍वंगुया लज्‍या चीकाछ्वयागु दु।” उकिं व थाय्‌यात थौं तक नं गिलगाल धकाः धाइ। 
इस्राएलीत यरीहोया मैदानया गिलगालय् पाल ग्‍वयाच्‍वने धुंकाः लाया झिंप्‍यंगूगु न्‍हिया सन्‍ध्‍याकाः इलय् इमिसं छुत्‍काराया नखः हन। 
छुत्‍काराया नखःया कन्‍हय् खुन्‍हु इमिसं उगु देशय् सःगु नसा, सोडा मतःगु मरि व सियातःगु अन्‍न नल। 
इमिसं व देशय् सःगु अन्‍न नःगु कन्‍हय् खुन्‍हु हे मन्‍ना कुतुं वयेगु दित। उबलय् निसें इस्राएलीतय्‌के मन्‍ना हानं गुबलें मन्‍त। उकिं उगु दंनिसें इमिसं कनान देशयागु अन्‍न नल। 
यहोशू यरीहोया न्‍ह्यःने दुबलय् वं थःगु न्‍ह्यःने छम्‍ह मनू ल्‍हातय् तरवार ज्‍वनाः दनाच्‍वंगु खन। यहोशूं वयागु न्‍ह्यःने वनाः न्‍यन, “छि जिमि पाखेयाम्‍ह खः कि शत्रु पाखेयाम्‍ह?” 
व मनुखं धाल, “मखु, जि ला आः परमप्रभुया सेनाया कप्‍तान जुयाः वयागु दु।” अनंलि यहोशूं बँय् भ्‍वसुलाः भागि यात अले वयात न्‍यन, “जिमि प्रभुं, थः दासयात छु धयादी?” 
परमप्रभुया सेनाया कप्‍तानं यहोशूयात धाल, “थःगु तुतिं लाकां त्‍व, छाय्‌धाःसा छ दनाच्‍वंगु थाय् पवित्र खः।” अले यहोशूं अथे हे यात। 
