﻿व्‍यवस्‍था.
30.
परमप्रभु छिमि परमेश्‍वरं जाति जातितय्‌गु दथुइ छिमित लिना छ्वयेधुंकाः जिं छिमित कनागु सुवाः व सराःया खँ छिमित लाइबलय् छिमिसं उपिं खँ लुमंकि। 
उबलय् छिपिं व छिमि मचाखाचा परमेश्‍वरयाथाय् लिहां वल धाःसा अले जिं थौं कनागु आज्ञाकथं दुनुगलंनिसें व थःगु प्राणं वय्‌कःयागु सेवा यात धाःसा 
ज्‍वनाः यंकूपिं छिमित परमप्रभु छिमि परमेश्‍वरं लित हयादी। अले वय्‌कलं छिमित गुगु जातितय्‌गु दथुइ छ्यालब्‍याल यानादीगु खः उपिं जातितय् दथुं माया यानाः हाकनं मुंकादी। 
छिमित आकाश क्‍वय्‌या तसकं ताताःपाःगु देशय् पितिनाछ्वःगु जूसां परमप्रभु छिमि परमेश्‍वरं छिमित अनं हयाः मुंकादी। 
वय्‌कलं छिमित छिमि पुर्खातय्‌गु देशय् हयादी। अले छिमिसं व देशयात अधिकार याइ। वय्‌कलं छिमिगु भिं यानादी अले छिमि पुर्खातय्‌गु ल्‍याः स्‍वयाः छिमिगु ल्‍याः अप्‍वः यानादी। 
गुकिं यानाः छिपिं म्‍वानाच्‍वनेत छिमिसं परमप्रभु थः परमेश्‍वरयात दुनुगलंनिसें व थःगु फुक्‍क प्राणं वय्‌कःयागु माया याये फयेमा, वय्‌कलं छिमिगु व छिमि सन्‍तानतय्‌गु नुगः हीकादी। 
परमप्रभु छिमि परमेश्‍वरं थुपिं फुक्‍क सराः छिमित क्‍वह्यंकीपिं व दुःख बीपिं शत्रुतय्‌थाय् हयादी। 
छिमिसं हाकनं परमप्रभुया खँ न्‍यनी अले थौं जिं छिमित बियागु वय्‌कःया फुक्‍क आज्ञा मानय् याइ। 
अले छिमिसं याःगु फुक्‍क ज्‍याय् परमप्रभुं बांलाकादी। छिमि यक्‍व मचाखाचा व सा द्वहंया मस्‍त दइ अले छिमिगु बुं यक्‍व अन्‍न बी। छिमि पुर्खालिसें वय्‌कः लय्‌तायादीगु थें परमप्रभु छिपिंलिसें हाकनं लय्‌तायादी, अले छिमिगु भिं यानादी। 
छिमिसं व्‍यवस्‍थाया थ्‍व सफुलिइ च्‍वयातःगु वय्‌कःया आज्ञा व विधि मानय् यात धाःसा अले दुनुगलंनिसें व थःगु प्राणं वय्‌कःयागु सेवा यात धाःसा अले परमप्रभु छिमि परमेश्‍वरपाखे छिपिं लिहां वल धाःसा थथे जुइ। 
आः जिं छिमित बियाच्‍वनागु आज्ञा छिमिगु लागि थाकु मजू वा तापाः नं मजू। 
“झीगु निंतिं स्‍वर्गय् थाहां वनाः सुनां व हयाः झीसं मानय् यायेत झीत कनी धकाः धायेत व स्‍वर्गय् मदु।” 
“अले व झीथाय् हयाः झीत कनेत व झीसं मानय् यायेत समुद्रया उखे सु वनी?” धकाः धायेत समुद्रया उखे नं मदु। 
मखु, छिमिसं मानय् यायेत थ्‍व वचन छिमिगु न्‍ह्यःने हे दु, छिमिगु म्‍हुतुइ हे अले छिमिगु नुगलय् हे दु। 
थौं जिं छिमिगु न्‍ह्यःने जीवन व भिं अले मृत्‍यु व मभिं तयागु दु। 
अथे जुयाः परमप्रभु परमेश्‍वरयात माया या, वय्‌कःया लँपुइ हुँ, वय्‌कःया आज्ञा, विधि व नियम मानय् या धकाः जिं थौं छिमित उजं बी। अले जक छिपिं म्‍वाइ, छिमिगु ल्‍याः अप्‍वः जुइ, अले छिमिसं अधिकार यायेत्‍यंगु देशय् परमप्रभु छिमि परमेश्‍वरं छिमित सुवाः बियादी। 
अय्‌नं छिमिगु मन स्‍यनाः छिमिसं खँ मन्‍यन अले मेपिं द्यःतय्‌त भागि यायेगु व इमित पुजा यायेगु याना हल धाःसा 
छिपिं धात्‍थें हे नाश जुइ धकाः जिं थौं धाये। अले यर्दनया उखे अधिकार यायेत वनेत्‍यंगु देशय् छिपिं यक्‍व म्‍वाइ मखु। 
जिं छिमिगु न्‍ह्यःने जीवन व मृत्‍यु, सुवाः व सराः तयागु दु धकाः थौं स्‍वर्ग व पृथ्‍वीयात छिमिगु न्‍ह्यःने साक्षी तये। अथे जुयाः जीवन हे ल्‍य, अले छिपिं व छिमि काय्‌म्‍ह्याय्‌पिं म्‍वाइ। 
अथे जुयाः परमप्रभु छिमि परमेश्‍वरयात माया या, अले वय्‌कःया खँ न्‍यँ। वय्‌कः नापं प्‍यपुनाच्‍वँ छाय्‌धाःसा वय्‌कः हे छिमिगु जीवन खः। अले थथे यात धाःसा परमप्रभुं छिमि पुर्खा अब्राहाम, इसहाक व याकूबलिसें बी धकाः पाफयादीगु देशय् वय्‌कलं छिमित ताः आयु बियादी। 
