﻿व्‍यवस्‍था.
28.
जिं थौं छिमित कनाच्‍वनागु परमप्रभु परमेश्‍वरया आज्ञा मानय् यात धाःसा अले वय्‌कःयागु वचन बांलाक न्‍यन धाःसा वय्‌कलं छिमित पृथ्‍वीयापिं फुक्‍क जातित स्‍वयाः तःधंकादी। 
परमप्रभु छिमि परमेश्‍वरयागु वचन मानय् यात धाःसा थुपिं फुक्‍क सुवाः छिमित लाइ, अले छिपिंनापं दयाच्‍वनी। 
छिमित शहरय् सुवाः लाइ अले बुँज्‍याय् सुवाः लाइ। 
छिमि मचाखाचा, अन्‍न, सा द्वहं, फैच्‍वलय्‌या मस्‍तय्‌त सुवाः लाइ। 
छिमिगु दालाय् अले छिमिगु छुचुं न्‍हायेगु थलय् सुवाः लाइ। 
दुने दुहां वइबलय् अले पिने पिहां वनीबलय् छिमित सुवाः लाइ। 
छिपिंलिसें ल्‍वाः वइपिं शत्रुतय्‌त परमप्रभुं छिमिगु न्‍ह्यःने हे बुकाबी। इपिं छपु लँपु जुयाः ल्‍वाः वइ अय्‌नं छिमिगु न्‍ह्यःनं न्‍हय्‌पु लँपु जुयाः बिस्‍युं वनी। 
परमप्रभुं छिमिगु धुकुति अले छिमिगु फुक्‍क ज्‍याय् सुवाः बियादी। अथे जुयाः परमप्रभु छिमि परमेश्‍वरं छिमित बियादीगु देशय् वय्‌कलं छिमित सुवाः बियादी। 
परमप्रभु छिमि परमेश्‍वरयागु आज्ञा मानय् यानाः वय्‌कःया लँपुइ वन धाःसा वय्‌कलं छिमित पाफयाः बचं बियादीगु थें छिमित थः मनूत दय्‌कादी। 
अले पृथ्‍वीयापिं सकलें मनूतय्‌सं छिमित परमप्रभुयापिं मनूत खः धकाः सियाः छिपिं खनाः ग्‍याइ। 
छिमि पुर्खातय्‌त पाफयाः बी धयादीगु देशय् परमप्रभुं छिमित यक्‍व मचाखाचा, अले सा द्वहं व यक्‍व अन्‍न बियादी। 
परमप्रभुं थःगु भिंगु धुकू आकाशं छिमिगु बुँइ पाय्‌छिगु इलय् वा वय्‌कादी, अले छिमिगु ल्‍हाःया फुक्‍क ज्‍याय् सुवाः बियादी। छिमिसं यक्‍व जातितय्‌त त्‍यासा बी अय्‌नं सुयाकें त्‍यासा कायेमाली मखु। 
जिं थौं छिमित बियागु परमप्रभु छिमि परमेश्‍वरयागु आज्ञा मन बियाः उपिं बांलाक मानय् यात धाःसा परमप्रभुं छिमित न्‍हिपं मखु अय्‌नं छ्यं हे यानादी। छिपिं क्‍वय् मखु च्‍वय् हे च्‍वनी। 
जिं थौं छिमित बियागु आज्ञापाखें फःहिले मते, मेपिं द्यःतय्‌गु ल्‍यूल्‍यू वनाः इमित पुजा याये मते। 
अय्‌नं छिमिसं परमप्रभु छिमि परमेश्‍वरया खँ मन्‍यंसा अले थौं जिं छिमित बियागु वय्‌कःयागु फुक्‍क आज्ञा व विधि बांलाक मानय् मयाःसा थुपिं फुक्‍क सराः छिमित लाइ। 
छिमित शहरय् सराः लाइ अले बुँज्‍याय् सराः लाइ। 
छिमिगु दाला व छुचुं न्‍हायेगु थलय् सराः लाइ। 
छिमि मचाखाचातय्‌त अले अन्‍न, सा द्वहं व फैच्‍वलय्‌या मस्‍तय्‌त सराः लाइ। 
दुने दुहां वइबलय् व पिने पिहां वनीबलय् छिमित सराः लाइ। 
वय्‌कःयात त्‍वःताः छिमिसं याःगु मभिंगु ज्‍यां यानाः छिमिसं छु छु ज्‍या ल्‍हातय् काइ उपिं फुक्‍क ज्‍याय् छिपिं भज्‍यंक स्‍यनामवंतले सराः, अलमल व ल्‍वापु छ्वयाहयादी। 
अले परमप्रभुं छिमिसं अधिकार यायेत दुहां वनाच्‍वंगु देशय् छिपिं न्‍हना मवंतले पालंपाः ल्‍वय् छ्वयादी। 
परमप्रभुं छिमित सुकूगनावनीगु ल्‍वचं काय्‌कादी अले छिपिं ज्‍वर व मनावइगु ल्‍वचं दने फइ मखु। छिमिगु अन्‍न बाली नाश यानाछ्वयेत वय्‌कलं वा मवइगु ई व तसकं क्‍वाःगु फय् छ्वयाहयादी। वय्‌कलं क्‍वःगु व फ्‍वसा वःगुलिं कय्‌कादी, अले म्‍वातले छिमिके थुपिं आपत विपत वया हे च्‍वनी। 
छिमिगु छेनय् च्‍वय् दुगु आकाश कँय् व छिमिगु बुँ नँ थें जुइ। 
परमप्रभुं छिमिगु देशय् आकाशं वइगु वाया पलेसा छिपिं भज्‍यंक स्‍यनामवंतले धू व फि छ्वयाहयादी। 
परमप्रभुं छिमित शत्रुतय्‌गु न्‍ह्यःने बुकेबी। इपिंलिसें ल्‍वायेत छिपिं छपु लँ जुयाः वइ अय्‌नं न्‍हय्‌पु लँ जुयाः बिस्‍युं वनी। छिपिं पृथ्‍वी न्‍यंकंया निंतिं भयया खँ जुइ। 
छिपिं सिनावने धुंकाः झंगःत व पशुत वयाः छिमिगु सीम्‍ह नइ। इमित ख्‍यानाछ्वइम्‍ह सुं दइ मखु। 
परमप्रभुं छिमित मिश्रीतय्‌त याःथें लनी मखुगु म्‍हय् वइगु कै, ला ग्‍वारा, न्‍हि दुगु घाः व चासु कइनं दुःख बियादी। 
परमप्रभुं छिमित कां व वँय् यानादी अले न्‍हेपुइ भ्‍वेभ्‍वे कंकाबी। 
कांम्‍ह मनुखं खिउँगु थासय् पचिपचि याः थें न्‍हिनय् छिमिसं पचिपचि याना जुइ। छिमिगु न्‍ह्यागु ज्‍याय् नं छिपिं ताःलाइ मखु। न्‍हियान्‍हिथं छिमित क्‍वत्‍यलातइ, छिमिके दुगु लाकायंकी। छिमित ग्‍वाहालि याइम्‍ह सुं नं दइ मखु। 
छिपिंनापं ब्‍याहा क्‍वःछ्यूम्‍ह मिसायात मेम्‍ह मिजंनं यंकाः स्‍यंकाबी। छिमिसं दय्‌कूगु छेँय् थःपिं च्‍वने खनी मखु। छिमिसं दाखमा पी अय्‌नं उकिया फल नयेखनी मखु। 
छिमि द्वहं छिमिगु मिखाया न्‍ह्यःने हे स्‍याइ, तर छिमिसं वयागु ला नयेखनी मखु। छिमि गधायात छिमिसं खंक हे बलं लाकायंकी तर छिमिसं लित काये फइ मखु। छिमि फैच्‍वलय्‌त छिमि शत्रुतय्‌गु ल्‍हातय् लाइ अले छिपिंपाखें इमित त्‍वःतकीम्‍ह सुं दइ मखु। 
छिमि काय्‌म्‍ह्याय्‌पिं मेगु देशयापिं मनूतय्‌गु ल्‍हातय् ला वनी। छिमि काय्‌म्‍ह्याय्‌पिं लिहां वइ ला धकाः न्‍हियान्‍हिथं छिमिसं मिखा ब्‍वयाच्‍वनी। अय्‌नं छिमिसं छुं याये फइ मखु। 
छिमिसं थाकुगु ज्‍या यानाः सयेकूगु अन्‍न बाली म्‍हमस्‍यूपिं मनूतय्‌सं लाकायंकी। छिमित धाःसा इमिसं न्‍ह्याबलें क्‍वत्‍यला हे तइ। 
छिमिसं खंगु खं यानाः छिपिं वँय् जुइ। 
परमप्रभुं छिमिगु पुलि व तुतिइ, पुर्खालिसें पाफयाः बाचा यानाः छ्यनंनिसें पालि तक हे लनी मखुगु स्‍याइगु कै छ्वयाहयाः छिमित सास्‍ती बियादी। 
परमप्रभुं छिमि जुजुयात छिमिसं व छिमि पुर्खातय्‌सं म्‍हमस्‍यूगु छगू जातिया दथुइ लिना छ्वयादी। अले इमिगु दथुइ च्‍वनाः छिमिसं सिँ व ल्‍वहंयापिं मेपिं द्यःतय्‌त पुजा याइ। 
परमप्रभुं छिमित गन गन लिना छ्वयादी अनयापिं मनूत छिमिगु हालत खनाः अजू चाइ। छिमित खनाः इपिं न्‍हिली अले हेस्‍याइ। 
छिमिसं बुँइ यक्‍व पुसा ह्वली अय्‌नं कम अन्‍न मुनी, छाय्‌धाःसा क्‍वःबुइँचां छिमिगु अन्‍न नइ। 
छिमिसं दाखक्‍यब पिनाः उकी ज्‍या याइ अय्‌नं छिमिसं दाखमद्य त्‍वनेखनी मखु, दाख मुने खनी मखु, छाय्‌धाःसा कीचातय्‌सं उपिं नयाबी। 
छिमिगु देशन्‍यंक जैतूनया सिमा ला दइ अय्‌नं जैतूनया चिकं छिमित दइ मखु। छाय्‌धाःसा जैतून सिमाया फल पाके मजूबलय् हे हायावनी। 
छिमि काय्‌म्‍ह्याय् ला दइ, अय्‌नं इपिं छिपिंनापं दइ मखु, छाय्‌धाःसा इमित लडाइँलय् ज्‍वनाः यंकी। 
क्‍वःबुइँचातय्‌सं छिमिगु फुक्‍क सिमा व अन्‍न बाली नयाबी। 
छिमिगु दथुइ च्‍वनिपिं परदेशीत छिपिं सिबें च्‍वय् च्‍वय् थाहांवनी अय्‌नं छिपिं क्‍वय् क्‍वय् कुहां वनी। 
इमिसं छिमित त्‍यासाबी। अय्‌नं छिमिसं इमित त्‍यासाबी फइ मखु। इपिं ला छ्यं जुइ, छिपिं धाःसा न्‍हिपं जुइ। 
थुपिं फुक्‍क सराः छिमित लाइ। परमप्रभु छिमि परमेश्‍वरं छिमित बियादीगु आज्ञा व विधि मानय् मयाःगुलिं अले वय्‌कःया खँ मन्‍यंगुलिं छिपिं नाश मजुतले थुपिं सराः छिमिथाय् दयाच्‍वनी। 
थुपिं सरापं छ व छिमि सन्‍तानतय् दथुइ न्‍ह्याबलें छगू चिं व ख्‍याच्‍वःकथं ज्‍या याइ। 
छाय्‌धाःसा छिमिसं थःपिं ज्‍यूबलय् परमप्रभु छिमि परमेश्‍वरयागु सेवा न्‍ह्याइपुक व लय्‌ताःया मयाः। 
अथे जुयाः परमप्रभुं छिमिगु विरोधय् छ्वया हयादीत्‍यंपिं शत्रुतय्‌गु छिमिसं सेवा याइ। छिपिं नये पित्‍याःपिं, प्‍याय्‌चाःपिं व नांगा जुइ। छिमित फुक्‍क खँय् मगाःमचाः जुइ। छिपिं नाश जुया मवंतले परमप्रभुं छिमिगु गःपतय् ल्‍वहंयागु जुवा तयादी। 
तःधिकःम्‍ह इमा स्‍वात्त क्‍वय् कुहां वइगु थें हे परमप्रभुं छिमिगु विरोधय् तापाकं पृथ्‍वीयागु कुन्‍चानिसें छिमिसं मथूगु भाय् ल्‍हाइपिं छगू जाति हयादी। 
इमिगु ख्‍वाः ग्‍यानपुस्‍से च्‍वनी। इमिके बुरा बुरीपिन्‍त हनाबना व मस्‍तय्‌त माया दइ मखु। 
अले छिपिं भज्‍यंक मस्‍यंतले इमिसं छिमि बथांयापिं सा-द्वहंया मचा वा फैच्‍वलय्‌या मचा अले छिमिगु बुँइ सःगु बालि नयाबी। अले इमिसं छिमिगु अन्‍न, न्‍हूगु दाखमद्य व जैतूनया चिकं छुं नं ल्‍यंकी मखु। 
छिमिगु फुक्‍क शहरयात इमिसं घेरय्‌ याइ। अले छिमिसं भलसा तःगु देश न्‍यंकया ततःजाःगु पखाः इमिसं थुनाबी। परमप्रभु छिमि परमेश्‍वरं बियादीत्‍यंगु देशन्‍यंक शहर शहरय् छिमित घेरय्‌ याइ। 
घेरय्‌ यानातःगु इलय् छिमि शत्रुतय्‌सं बीगु सास्‍तीं यानाः परमप्रभु छिमि परमेश्‍वरं बियादीपिं थः हे काय्‌म्‍ह्याय्‌यागु ला नं छिमिसं नइ। 
छिपिं मध्‍ये नुगः क्‍यातुम्‍ह व तसकं भिंम्‍ह मनुखं नं थः हे किजा, थःम्‍हं माया याःम्‍ह कलाः, अले थः ल्‍यंदुपिं मचाखाचातय्‌त माया याइ मखु। 
थःम्‍हं नयाच्‍वंगु थः मचाखाचातय्‌गु म्‍हया ला वं सुयातं बी मखु। शत्रुतय्‌सं छिमिगु शहरत घेरये यानाः सास्‍तीबीबलय् वयाके छुनं ल्‍यं दइ मखु। 
छम्‍ह नुगः क्‍यातुसे च्‍वंम्‍ह मिसा गुबलें बँय् पलाः तयेम्‍वाय्‌क ब्‍वलंगु जुइफु। तर ई तसकं मभिनावनी, 
गुकिं यानाः वं थः भाःत वा मेपिं मस्‍ततय्‌त इनामब्‍युसें सुनां मसीक थः नकतिनि बूम्‍ह मचा व वयागु साहा नइ। 
परमप्रभु छिमि परमेश्‍वरयागु हनेबहःगु व मानय् यायेमाःगु नांया भय मकाल धाःसा अले छिमिसं थ्‍व सफुली च्‍वयातःगु नियमया फुक्‍क वचन बांलाक मानय् मयात धाःसा 
परमप्रभुं छिमिके अले छिमि मचाखाचातय्‌के ग्‍यानपुसे च्‍वंगु महामारी अले तच्‍वःगु व तःन्‍हु तक दयाच्‍वनीगु ल्‍वय् छ्वयाहयादी। 
छिपिं ग्‍याःगु मिश्रया थीथी ग्‍यानपुसे च्‍वंगु ल्‍वय् वय्‌कलं छिमिगु म्‍हय् हयादी, अले उपिं ल्‍वय् छिमिके दया हे च्‍वनी। 
थ्‍व व्‍यवस्‍थाया सफुतिइ च्‍वयामतःगु फुक्‍क ल्‍वय् व महामारी नं छिपिं नाश मजुतले परमप्रभुं छिमिके हयादी। 
परमप्रभु छिमि परमेश्‍वरया खँ मन्‍यंगुलिं आकाशया नगु थें अल्‍याख दुपिं छिपिं यक्‍व कम जक ल्‍यं दइ। 
परमप्रभुं लय्‌ताःतां भिं यानादीगु व ल्‍याः अप्‍वयेकादीगु थें हे छिमित लय्‌ताःतां भज्‍यंक नाश यानादी। अले छिमिसं अधिकार यायेत दुहां वनेत्‍यंगु देशं छिमित लिनाः वांछ्वइ। 
अले पृथ्‍वीयागु छगू कुन्‍चांनिसें मेगु कुन्‍चा तक थीथी जातिया दथुइ परमप्रभुं छिमित छ्यालब्‍याल यानादी। अले अन च्‍वनाः छिमिसं थःपिन्‍सं व थः पुर्खां म्‍हमस्‍यूपिं सिँ व ल्‍वहंयापिं मेपिं द्यःतय्‌त पुजा याइ। 
उपिं जातितय् दथुइ छिमित आराम दइ मखु अले छिमि थःगु निंतिं छकुचा थाय् नं दइ मखु। अन परमप्रभुं छिमित च्‍यूताः दुगु मन, पिया च्‍वंच्‍वं त्‍यानुचाःगु मिखा व क्‍वतुंगु नुगः बियादी। 
छिमिगु जीवन अलमल जुया तुं च्‍वनी, छिपिं चान्‍हि थरथर खानाच्‍वनी, छिमिगु जीवनया छुं भलसा दइ मखु। 
न्‍ह्यागु खँसां नं छिपिं थुरथुर खाइ। सुथय् छिमिसं धाइ, “बहनी जूसा ला ज्‍यूनि,” अले बहनी धाइ, “सुथय् जूसा ला ज्‍यूनि।” 
अले जिं छिमिसं हानं खनी मखु धकाः धाःगु लँपुं परमप्रभुं छिमित मिश्र देशय् लःजाहाजं लित छ्वयादी। अन छिमिसं थःपिन्‍त दास दासी जुइगु लागिं मीत शत्रुतय्‌गु न्‍ह्यःने दनी अय्‌नं सुनानं छिमित न्‍यानाकाइ मखु। 
