﻿व्‍यवस्‍था.
26.
परमप्रभु छिमि परमेश्‍वरं छिमित सर्बयकथं बियादीगु देशय् थ्‍यंकाः उकियात त्‍याकाकयाः अन च्‍वने धुंकाः 
परमप्रभु छिमि परमेश्‍वरं छिमित बियादीगु देशय् सःगु न्‍हापांगु बालीया छुं फल छगः दालाय् तयाः परमप्रभु छिमि परमेश्‍वरं थःगु निंतिं ल्‍ययादीगु विशेष थासय् यंकि। 
अबलय् अन ज्‍या याइम्‍ह पुजाहारीयात थथे धा, “परमप्रभं छिमि परमेश्‍वरं झीत बी धकाः झी पुर्खातलिसें पाःफयादीगु देशय् जिपिं थ्‍यने धुंकाः थ्‍व दाला हया।” 
अले पुजाहारीं छिमिगु ल्‍हातं व दाला कयाः परमप्रभु छिमि परमेश्‍वरया वेदीया न्‍ह्यःने तयाबी। 
अले छिमिसं परमप्रभु थः परमेश्‍वरयागु न्‍ह्यःने थथे धा, “जिमि तापाःबाज्‍या चाःहिला जुइम्‍ह छम्‍ह अरामी खः। व कम मनूतलिसें मिश्रय् वन अले अन हे च्‍वन। अन वपाखें बल्‍लाःगु व यक्‍वः ल्‍याः दुगु छगू तःधंगु जाति दत। 
अय्‌नं मिश्रीतय्‌सं जिमित क्‍वत्‍यलातयाः दुःखकष्‍ट बिल। अले जिमित थाकुगु ज्‍या याकल। 
उबलय् जिमिसं परमप्रभु जिमि पुर्खाया परमेश्‍वरयात इनाप यानाः वय्‌कलं जिमिगु सः न्‍यनादिल, अले जिमिगु सास्‍ती, थाकुगु ज्‍या व जिमित क्‍वत्‍यलातःगु स्‍वयादिल। 
अथे जुयाः परमप्रभुं झीत थःगु बल्‍लाःगु ल्‍हाः व चकंगु लप्‍पू तःधंगु ग्‍यानपुस्‍से च्‍वंगु अजू चाइपुगु चिं व ज्‍या क्‍यनाः मिश्रं पितहयादिल। 
वय्‌कलं झीत थ्‍व थासय् हयाः थ्‍व दुरु व कस्‍ति बाः वयाच्‍वंगु देश बियादिल। 
हे परमप्रभु, छिं जितः बियादीगु बुँयागु न्‍हापांगु फल जिं छिथाय् हयागु दु” धाये धुंकाः परमप्रभु छिमि परमेश्‍वरया न्‍ह्यःने व दाला तयाः वय्‌कःयात छ्यं क्‍वछुकाः आराधना या। 
अले गुलि भिंगु भिंगु खँत परमप्रभु छिमि परमेश्‍वरं छिमित व छिमि छेँजःयात बियादीगु दु, उपिं फुक्‍कया निंतिं छिमिसं लेवीया सन्‍तानत व छिपिंलिसे च्‍वनिपिं परदेशी नापं लसता हनेमाः। 
स्‍वंगूगु दँय्, झिब्‍वय् छब्‍व बीगु दँय् छिमिसं थःगु फुक्‍क बालीया झिब्‍वय् छब्‍व छायेमाः। विशेष देछा छायेगु थ्‍व दँय् छिमिसं लेवीया सन्‍तानत, परदेशीत, मांबौ मदुपिं व भाःत सी धुंकूपिन्‍त झिब्‍वय् छब्‍व बीमाः। अले छिमिगु शहरय् इमिके नयेत गाक्‍क दइ। 
अनंलि परमप्रभु थः परमेश्‍वरयात थथे धा, “जिं थःगु छेँनं पवित्र ब्‍व लिकयाः छिगु आज्ञाकथं लेवीया सन्‍तान, परदेशी, मांबौ मदुपिं व भाःत सी धुंकूपिं मिसातय्‌त बियागु दु। छिगु आज्ञा जिं त्‍वःतागु मदु। अले ल्‍वःमंकागु मदु। 
दुखं च्‍वनाबलय् जिं पवित्र ब्‍वतिं छुं नयागु मदु। अले अशुद्ध जूबलय् उकिं छुं लिकयागु मदु, अले उकिं छुं सिनावंपिन्‍त छायागु मदु। छिं आज्ञा बियादीगु फुक्‍क खँ जिं यानागु दु। 
थःगु पवित्रथाय् स्‍वर्गं स्‍वयाः थः मनू इस्राएलयात सुवाः बियादिसँ अले छिं जिमि पुर्खालिसें पाफयाः बचं बियाः जिमित बियादीगु दुरु व कस्‍ति बाः वयाच्‍वंगु देशयात नं सुवाः बियादिसँ।” 
थुपिं विधि व नियम मानय् यायेत थौंया दिं परमप्रभु छिमि परमेश्‍वरं छन्‍त आज्ञा बियादीगु दु। अले दुनुगलंनिसें व थःगु प्राणं वय्‌कःयागु सेवा याःगु यय्‌कादी 
“परमप्रभु हे झी परमेश्‍वर खः, झीपिं वय्‌कःया लँपुइ वने, वय्‌कःया विधि, आज्ञा व नियम मानय् याये, वय्‌कःया खँ न्‍यने” धकाः छिमिसं थौं बचं याःगु दु। 
परमप्रभु छिमि परमेश्‍वरं थःगु बचंकथं थौं छिमित थः विशेष मनूत व मू वंगु सम्‍पत्ति दय्‌कादीगु दु, अले छिमिसं वय्‌कःया आज्ञा मानय् याये हे माः। 
अथे यात धाःसा वय्‌कलं छिमित मेगु जातित स्‍वयाः तःधंकादी। अनंलि छिमित हनाबना व नां दइ। अले परमप्रभु छिमि परमेश्‍वरं बचं बियादीगु थें छिपिं वय्‌कःया पवित्र जाति जुइ। 
