﻿व्‍यवस्‍था.
22.
थः इस्राएली जःलाखःलाया द्वहं वा फै मखुगु लँय् वनाच्‍वंगु खनाः नं मखं पहः याये मते। वयात थः इस्राएली जःलाखःलायाथाय् लित यंकाब्‍यु। 
अय्‌नं व इस्राएली जःलाखःला छिमिगु सतिक च्‍वनीम्‍ह मखुसा वा छं पशुया थुवाःयात म्‍हमस्‍यूसा वया पशुयात व माः मवतले थःगु छेँय् तयाति। अनंलि वयात लितब्‍यु। 
थः इस्राएली जःलाखःलाया गधा वा वसः वा वं तंकूगु न्‍ह्यागु हे लुल धाःसा नं अथे हे या। 
थः इस्राएली दाजुकिजाया गधा वा द्वहं लँय् ग्‍वतुलाच्‍वंगु खनाः नं मखं पहः याये मते। अय्‌नं व पशुयात थनेत इस्राएली जःलाखःलायात ग्‍वाहालि या। 
मिजंनं पुनीगु वसः मिसां पुने मते अले मिसाया वसः नं मिजंनं पुने मते। थथे याइपिं मनूतय्‌त परमप्रभु छिमि परमेश्‍वरं घृणा यानादी। 
लँय् लिक्‍क सिमाय् वा बँय् गनं झंगःया स्‍वः खन धाःसा अले उकी मांम्‍ह झंगः मचानापं वा खेँचय् च्‍वनाच्‍वंगु दुसा मचा झंगः नापं मां झंगःयात यंके मते। 
मांम्‍हय्‌सित त्‍वःताः मचायात छिमिसं यंके फु। अले छिमिगु भिं जुइ व छिपिं ताःई तक म्‍वाइ। 
न्‍हूगु छेँ दय्‌कीबलय् कःसिइ प्‍यखेरं पखाः ग्‍व, अले अनं सुं मनू कुतुं वंसा मनू सीगु दोष छिमिगु छेँयात लाइ मखु। 
दाखक्‍यबय् निगू किसिमयागु पुसा पी मते। अथे याःसा छिमिसं प्‍यूगु दाखया पुसा जक मखु सःगु दाखनापं अशुद्ध जुइ। 
द्वहं व गधा नापं ककुसिँइ तयाः बुँज्‍या याये मते। 
तँय व सुति ल्‍वाकछ्यानाः थानातःगु वसः पुने मते। 
छिमिसं छिमिगु गाय् प्‍यकुन्‍चाय् फुर्का तयेमाः। 
सुं मनुखं सुं मिसालिसे ब्‍याहा यानाः वलिसे द्यने धुंकाः वयात मयय्‌के फु, 
अले व मिसायात बदनाम यायेत, “थ्‍व मिसालिसे ब्‍याहा यानाबलय् थ्‍वयाके जिं कुमारीया चिं मखं धकाः धयाः मखुगु खँ ल्‍हाये फु।” 
व मिसामचाया मांबौनं शहरया मू ध्‍वाखाय् थकालितथाय् म्‍ह्याय् सुं नापं मद्यंगुया दसि हयेमाः। 
अले व मिसामचाया बौनं थकालितय्‌त थथे धायेमाः “जिं थः म्‍ह्याय् थ्‍व मनूयात बिया, अय्‌नं वं थ्‍वयात मयय्‌कू। 
‘छिमि म्‍ह्याय्‌याके सुं नापं मद्यंगु दसि खने मदु’ धकाः थ्‍व मनुखं द्वपं बियाच्‍वंगु दु अय्‌नं जिमि म्‍ह्याय् सुं नापं मद्यंगु दसि थन दु। हि किनाच्‍वंगु थ्‍व तन्‍नां जिमि म्‍ह्याय् कुमारी खः धयागु दसि बी।” अले मिसाया बौनं थकालितय् न्‍ह्यःने व तन्‍ना लायाबीमाः। 
अले थकालितय्‌सं मनूयात यंकाः सजाँय बीमाः। 
इस्राएलया छम्‍ह मिसामचायात द्वपं ब्‍यूगुलिं वं मिसाया बौयात सछि शेकेल वहः बं पुलेमाः। मिसा धाःसा वया कलाः जुयाच्‍वनेमाः। व मिजं म्‍वातले वं मिसायात त्‍वःते दइ मखु। 
अय्‌नं मिसायाके सुं नापं मद्यंगु दसि मलूसा अले व मिजंया खँ खःगु थहरय् जूसा, 
वयात थः बौयागु छेँया लुखाय् हयाः वया शहरयापिं मिजंतय्‌सं ल्‍वहँतं कय्‌काः स्‍यायेमाः। थः बौया छेँ दुबलय् हे स्‍यनाः वं इस्राएलय् छगू मछालापुस्‍से च्‍वंगु ज्‍या याःगु दु। छिमिसं थज्‍याःगु मभिंगु ज्‍या छिमिगु दथुं चीकाः छ्वयेमाः। 
सुं मिजं मेम्‍ह मनूया कलाःलिसे लसपस यानाच्‍वंबलय् नापलाःसा व नापं द्यंम्‍ह मिजं व मिसा निम्‍हय्‌सित स्‍याना छ्वयेमाः। छिमिसं थज्‍याःगु मभिंगु ज्‍या इस्राएलया दथुं चीका छ्वयेमाः। 
ब्‍याहा क्‍वःछी धुंकूम्‍ह मिसामचायात शहरय् मेम्‍ह मिजंनापं द्यनाच्‍वंगु छिमिसं खन धाःसा, थथे छिमिगु शहरय् जूगु खःसा 
इपिं निम्‍हय्‌सित शहरया मू ध्‍वाखाय् यंकाः ल्‍वहँतं कय्‌काः स्‍यायेमाः। शहर दुने हे जुयाः नं ग्‍वाहालिया लागि चिल्‍लाय् दनाः महाःगुलिं व मिसायात स्‍यायेमाः। अले थः इस्राएली जःलाखःलाया कलाःयात स्‍यंकूगुलिं व मिजंयात स्‍याना छ्वयेमाः। छिमिसं थज्‍याःगु मभिंगु ज्‍या छिमिगु दथुं चीकाः छ्वयेमाः। 
अय्‌नं ब्‍याहा क्‍वःछी धुंकूम्‍ह मिसामचायात मेम्‍ह मनुखं सुं मनू मदुगु थासय् नापलाकाः स्‍यंकाबिल धाःसा व मिजंयात जक स्‍यायेमाः। 
मिसायात धाःसा छुं मयायेमाः। वं स्‍याना छ्वयेमाःगु ज्‍या छुं याःगु मदु। थ्‍व धाःसा सुं मनुखं थः इस्राएली जःलाखःलायात हय्‌कायाः स्‍याःगु थें खः। 
व ब्‍याहा क्‍वःछी धुंकूम्‍ह मिसामचा हाःसा नं सुं मनू मदुगु थासय् मभिं ज्‍या जूबलय् वयात बचय् याइम्‍ह अन सुं मदु। 
सुं मनुखं ब्‍याहा क्‍वःमछ्यूम्‍ह मिसामचायात जबरजस्‍ती यानाच्‍वंगु मनूतय्‌सं खन धाःसा 
व मिजंनं व मिसाया बौयात वहःयागु नेय्‌गू शेकेल वहः बीमाः। व मिजंनं व मिसामचायात जबरजस्‍ती याःगुलिं वयात थः कलाः दय्‌केमाः। अले वं म्‍वातले त्‍वःते दइ मखु। 
सुं मिजंनं थः बौया न्‍हापायाम्‍ह कलाःनापं ब्‍याहा मयायेमाः। अथे यानाः थः बौयात लज्‍या मचाय्‌केमाः। 
