﻿व्‍यवस्‍था.
19.
परमप्रभु छिमि परमेश्‍वरं छिमित बियादीगु देशया जातितय्‌त नाश यानादीबलय् अले इमिगु शहर व छेँ छिमिसं कयाः छिपिं अन च्‍वनीबलय् 
छिमिसं थःगु लागि परमप्रभु छिमि परमेश्‍वरं अधिकारय् बियादीगु देशया दथुइ स्‍वंगू शहर अलग या। 
सुयातं स्‍याःम्‍ह मनू अपुक बिस्‍युं वनेत परमप्रभु छिमि परमेश्‍वरं सर्बयकथं छिमित बियादीत्‍यंगु देशयात स्‍वब्‍व थलाः उपिं शहरय् वनीगु लँ नं दय्‌कि। 
थः जःलाखःलायात मसीसें वा ईख मदुसें स्‍यानाब्‍यूम्‍ह मनू बचय् जुइत अन बिस्‍युं वनेगु बारे थज्‍याःगु नियम दु। 
गथेकि निम्‍ह मनूत सिँ पालेत गुँइ वनेफु। सिमा पाःबलय् ज्‍वनेगु चुं पा कुतुवनाः छम्‍हसित लात अले व सित धाःसा मेम्‍ह मनुखं थुपिं शहर मध्‍ये छगुलिइ बिस्‍युं वनाः थःत बचय् याये फइ। 
वयात लँपु तापाः जुइ मज्‍यू, मखुसा हिया बदला काःवःम्‍हय्‌सिनं लँय् नापलाकाः वयात तंम्‍वय् स्‍यानाबी। व मनू स्‍याना छ्वयेमाःम्‍ह धाःसा मखु छाय्‌धाःसा वयागु थः जःलाखःलालिसें छुं ईख मदु। 
अथे जुयाः थःगु निंतिं स्‍वंगू शरण बीगु शहर अलग या धकाः जिं छिमित धया। 
परमप्रभु परमेश्‍वरं छिमि पुर्खालिसें पाफयाः बचं बियादीकथं छिमिगु देश तःकू यानादीबलय् अले वय्‌कलं इपिंलिसें बचं बियादीगु फुक्‍क देश बियादीबलय् 
जिं थौं बियागु आज्ञाकथं परमप्रभु छिमि परमेश्‍वरयात माया यात अले वय्‌कःया लँपुइ न्‍ह्याबलें वन धाःसा छिमिसं मेगु नं स्‍वंगू शहर अलग या। 
परमप्रभु छिमि परमेश्‍वरं छिमित सर्बयकथं बियादीगु देशय् द्वं मदुपिं मनूतय्‌गु हिबाः मवयेमा धकाः अले छिमित उकिया दोष मलायेमा धकाः छिमिसं थथे या। 
अथे जूसां सुं मनुखं ईख दयाः मेम्‍ह मनूयात लँय् पियाच्‍वंबलय् नापलाकल अले दायाः स्‍यानाः व ज्‍यानमारा उपिं शहर मध्‍ये छगुलिइ बिस्‍युं वंसा 
वयागु हे शहरयापिं थकालितय्‌सं मनू छ्वयाः वयात अनं ज्‍वनाहयाः हिया बदला काःवःम्‍हय्‌सिया ल्‍हातय् स्‍यायेत लःल्‍हाना बीमाः। 
वयात माया याये मते! द्वं मदुपिन्‍त स्‍यायेगु ज्‍या इस्राएलं न्‍हंकाः छ्वयेमाः। अले छिमिगु भिं जुइ। 
परमप्रभु छिमि परमेश्‍वरं छिमिगु अधिकारय् बियादीगु देशय् छिमिगु थःगु सर्बयलय् पुर्खातय्‌सं क्‍वःछिनाब्‍यूगु जःलाखःलाया सिमानाया ल्‍वहं चीके मते। 
छुं नं अपराध वा अधर्मय् सुं मनूयात छम्‍ह जक मनूया साक्षीं सजाँय बी मते। वयात सजाँय बीत निम्‍ह वा स्‍वम्‍ह मनुखं साक्षी बीमाः। 
सुं मनूयात दोष बीत सुं मभिंम्‍ह मनुखं साक्षी बिल धाःसा 
इपिं निम्‍हं मनूत उबलय्‌यापिं पुजाहारीत व न्‍यायाधीशतय्‌गु लिक्‍क परमप्रभुया न्‍ह्यःने वयेमाः। 
उपिं न्‍यायकर्तातय्‌सं बांलाक जाँचय् यायेमाः। व साक्षी ब्‍यूम्‍ह मनुखं मखुगु खँ ल्‍हाःगु थहरे जूसा अले व मनूया विरोधय् मखुगु साक्षी ब्‍यूगु जूसा 
छिमिसं व मखुगु साक्षी ब्‍यूम्‍ह मनूयात अथे हे या गथे व मनूयात यायेगु बिचाः यानागु खः। छिमिसं थज्‍याःगु मभिंगु ज्‍या छिमिगु दथुं चीकाः छ्वयेमाः। 
थ्‍व खँ न्‍यनाः मनूत ग्‍याइ, अले छिमिगु दथुइ थज्‍याःगु मभिंगु ज्‍या हानं गुबलें याइ मखु। 
थज्‍याःम्‍ह मनूयात माया याये मते। प्राणया पलेसा प्राण, मिखाया पलेसा मिखा, वाया पलेसा वा, ल्‍हाःया पलेसा ल्‍हाः व तुतिया पलेसा तुति कायेमाः। 
